ރާއްޖޭގައި އިއާދަކުރަނިވި ހަކަތައިން 33 ޕަސެންޓު ކަރަންޓު އުފެއްދުމަށް 1.3 ބިލިއަން ޑޮލަރު ބޭނުންވާ ކަމަށާއި އޭގެތެރެއިން މިހާތަނަށް ހިލޭ އެހީއަށް ހަމަޖެހުނީ 13 ޕަސެންޓު ކަމަށް މަރުކަޒީ ބޭންކް، (އެމްއެމްއޭ)ގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެއެވެ.
ގަވަރުނަރު މިފަދައިން ވިދާޅުވީ، މިހާރު ވޮޝިންޓަންގައި ކުރިއަށްދާ ވޯލްޑް ބޭންކް އަދި އައިއެމްއެފްގެ އަހަރީ ބައްދަލުވުމުގައި ތަގުރީރު ކުރައްވަމުންނެވެ.
އެ ބައްދަލުވުމުގައި ތަގުރީރު ކުރައްވަމުން މުނައްވަރު ވިދާޅުވީ، މޫސުމަށް އަންނަ ބަދަލުތަކުގެ އެންމެ ބޮޑު އަސަރެއް ކުރަނީ ރާއްޖެ ފަދަ ކުދި ގައުމުތަކަށް ކަމަށާއި އެ ބަދަލުތަކުން އަރައިގަތުމަށް މަސައްކަތްތަކެއް ކުރަމުން އަންނަ ކަމަށެވެ.
އިއާދަކުރުވަނިވި ހަކަތަ ބޭނުންކުރުމުން މޫސުމަށް އަންނަ ބަދަލުތަކުން ލިބޭ ގެއްލުމަށް ހޭނުމާއި މާލީ ގޮތުން ވެސް ފައިދާވާނެ ކަމަށް މުނައްވަރު ވިދާޅުވިއެވެ. އެގޮތުން، ތެލަށް ކުރަންޖެހޭ ޚަރަދު ކުޑަވުމަކީ ބޭރު ފައިސާ ޚަރަދުކުރަންޖެހޭ މިންވަރު މަދުވެގެންދާ ކަމެއް ކަމަށް ވިދާޅުވިއެވެ.
ގަވަރުނަރު ތަގުރީރު ކުރެއްވުން: ވިދާޅުވީ، އިއާދަކުރަނިވި ހަކަތައިން 33 ޕަސެންޓު ކަރަންޓު އުފައްދަން 1.3 ބިލިއަން ޑޮލަރު ބޭނުންވާ ކަމަށް --- ފޮޓޯ/ އެމްއެމްއޭ
2028 ވަނަ އަހަރު ދިވެހިރާއްޖޭގައި 33 އިންސައްތަ ކަރަންޓް އިއާދަކުރުވަނިވި ހަކަތައިން އުފެއްދުމަށް ވަނީ އަޒުމް ކަނޑައަޅާފައި. މި މަޝްރޫއުއަށް ގާތްގަނޑަކަށް 1.3 ބިލިއަން ޑޮލަރު ބޭނުންވާއިރު، އަދި މިހާތަނަށް ހިލޭ އެހީގެ ގޮތުގައި ލިބިފައިވަނީ އެންމެ 13 އިންސައްތަ،
އިތުރަށް ވާހަކަދައްކަވަމުން ގަވަރުނަރު ވިދާޅުވީ، ރާއްޖޭގައި މި ދާއިރާއިން އައިއެމްއެފްގެ ރެސިލިއަންސް އެންޑް ސަސްޓެއިނަބިލިޓީ ފަންޑުން މިހާރު ވެސް ކުރަމުން އަންނަ މަސައްކަތަށް ތައުރީފު ޙައްގު ކަމަށެވެ.
މޫސުމީ ގެއްލުންތަކުން އަރައިގަތުމަށާއި އިއާދަކުރުވަނިވި ހަކަތައަށް ބަދަލުވާން އެހީވުމަށް އިތުރު އަމިއްލަ ފަރާތްތަކުގެ އިންވެސްޓްމަންޓްތައް އިތުރުކޮށް، އާ ސްޓްރެޓެޖީތައް އެކުލަވާލުން މުހިންމުކަމަށް ގަވަރުނަރު ވިދާޅުވިއެވެ.
ގަވަރުނަރު އަހުމަދު މުނައްވަރު: އޭނާ ގަވަރުނަރު ތަގުރީރު ކުރެއްވުން: ވިދާޅުވީ، އިއާދަކުރަނިވި ހަކަތައިން 33 ޕަސެންޓު ކަރަންޓު އުފައްދަން 1.3 ބިލިއަން ޑޮލަރު ބޭނުންވާ ކަމަށް -- ފޮޓޯ/ އަވަސް
މީގެއިތުރުން، ތަރައްގީވަމުން އަންނަ އިގްތިސާދުތަކުގެ ތެރެއިން ތިން ބައިކުޅަ ދެ ބަޔަކީ ބޮޑު ދަރަނިތަކެއް އަދާކުރަން ޖެހޭ ގައުމުތަކެއް ކަން މުނައްވަރު ވަނީ ފާހަގަކުރައްވާފައެވެ. އެހެންވެ، ތަރައްގީވަމުން އަންނަ ކުދި ޖަޒީރާ ގައުމުތަކާއި ބޭންކުތަކުގެ ހާލަތަށް މިހާރަށް ވުރެ ބޮޑަށް ވިސްނަންޖެހޭ ކަމަށް ގަވަރުނަރު ވަނީ ވިދާޅުވެފައެވެ.
ބޮޑަށް ދަރަނިވެރިވެފައިވާ ގައުމުތަކަށް ބޭނުންވާ އެހީތެރިކަން ދިނުމުގެ ގޮތުން ހަރުދަނާ ފިޔަވަޅުތަކެއް ވޯލްޑް ބޭންކާއި އައިއެމްއެފުން އަދި މަލްޓިލޭޓަރަލް ބޭންކްތަކުން އަޅަންޖެހޭ. ވެސް ކްލައިމެޓް އެޑަޕްޓޭޝަނަށް އިންވެސްޓްކުރާ ގައުމުތަކުގެ ދަރަނި ލުއި ކޮށްދެވޭނެ ގޮތެއް ރާވަންޖެހޭ،
ވޯލްޑް ބޭންކާއި އައިއެމްއެފް ފަދަ ތަންތަނުން ތަރައްގީވަމުން އަންނަ އިގްތިސާދު ތަކުގައި ވަޒީފާގެ ފުރުސަތުތައް އިތުރުކޮށް، ހަމަހަމަ ފުރުސަތުތަކެއް ދިނުމަށާއި އިގްތިސާދު ސިންދަފާތުކުރުމަށް ވިސްނަންޖެހޭ ކަމަށް ވެސް މުނައްވަރު ވިދާޅުވިއެވެ.
އޭގެއިތުރުން، ވޯލްޑް ބޭންކާއި އައިއެމްއެފްގެ މުސްތަގުބަލަށް ޕްލޭންތައް ރާވާއިރުގައި، މެންބަރު ގައުމުތަކުގެ ބޭންކުތަކާއި ކެޕޭސިޓީއަށް ފެތޭ ގޮތަށް ކުރުމަކީ މުހިންމު ކަމެއް ކަމަށް ގަވަރުނަރު ވިދާޅުވިއެވެ.
އެހެންވެ، އެ ކަންކަން އެގޮތަށް ނުކުރެވިއްޖެނަމަ އެނުއަލް މީޓިންގްސްގެ ފުރަތަމަ ޗެއާ ޖޯން ސްނައިޑާ ފާހަގަކުރައްވާފައިވާ ގޮތަށް ރައްޔިތުންގެ އުންމީދު ތަމްސީލުކުރުމަށް ފެއިލްވީ ކަމަށް މުނައްވަރު ސިފަކުރެއްވިއެވެ.
ފާހަގަކޮށްލެވޭ ގޮތުގައި، ރާއްޖޭގައި އިއާދަކުރަނިވި ހަކަތައިން 33 ޕަސެންޓު ކަރަންޓު އެފެއްދުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.