ރާއްޖެއަށް ޒިޔާރަތްކުރި ޖަޕާނު ފަތުރުވެރިންތަކެއް ޖޯލި ފައްޗަށް ހިތް ޖެހި، އެމީހުން އަމިއްލައަށް ޖަޕާނުގައި ޖޯލި ފައްޗެއް ހަދައިފިއެވެ.
ރާއްޖޭގައި ހުންނަ ޖަޕާނު އެންބަސީން ކުރި ޕޯސްޓެއްގައި ބުނީ، ޖަޕާނުގައި ޖޯލިފައްޗެއް ބަހައްޓާފައިވާ ކަމަށެވެ. މި ޕޯސްޓާއެކު ވަނީ ފޮޓޯތަކެއް ވެސް ހިއްސާ ކޮށްފައެވެ. ފޮޓޯއިން ފެންނަ ގޮތުގައި ޖަޕާނުގައި ބަހައްޓާފައި ވަނީ، ދެ ޖޯލީގެ ޖޯލިފައްޗެކެވެ.
ޖަޕާނުގައި ބެހެއްޓި ޖޯލިފަތި: މި ޖޯލިފަތި ހެދީ ޖަޕާނުގެ ފަތުރުވެރިންތަކެެއް އަމިއްލައަށް --- ފޮޓޯ/ ރާއްޖޭގައި ހުންނަ ޖަޕާނު އެންބަސީ
އެ ޖޯލިފަތީގެ ފަހަތުގައިވާ ވާހަކަ އެ ޕޯސްޓުގައި ވަނީ ހިއްސާކޮށްފައެވެ. އެގޮތުން، އެގައުމުން ރާއްޖެއަށް ޒިޔާރަތްކުރި ފަތުރުވެރިންތަކަށް ޖޯލިފަތި ވަރަށް ކަމުދިޔައެވެ.
އެހެންވެ، ގައުމަށް އެނބުރި ދިޔުމަށް ފަހު އެމީހުންގެ ރައްޓެހިންތަކެއް އެހީއާއެކު އަމިއްލައަށް ޖޯލި ފައްޗެއް ހަދައިގެން ބަހައްޓާފައިވާ ކަމަށް އެ ޕޯސްޓުގައި ބުނެއެވެ.
ފާހަގަކޮށްލެވޭ ގޮތުގައި، މި ޕޯސްޓަށް ގިނަ ބައެއްގެ ސަމާލުކަން ލިބިފައިވާއިރު، މިހާތަނަށް 12،000އަށް ވުރެ ގިނަ ވިއުސް މި ޕޯސްޓަށް ވަނީ ލިބިފައެވެ.
މި ޕޯސްޓާ ގުޅިގެން މީހަކު ކޮށްފައިވާ ޕޯސްޓެއްގައި ވަނީ މިއީ ސަގާފީ ބަދަލު ކުރުމުގެ ރީތި މިސާލެއްގެ ގޮތުގައި ސިފަކޮށްފައެވެ.
ޖަޕާނުގައި ބެހެއްޓި ޖޯލިފަތި: މި ޖޯލިފަތި ހެދީ ޖަޕާނުގެ ފަތުރުވެރިންތަކެެއް އަމިއްލައަށް --- ފޮޓޯ/ ރާއްޖޭގައި ހުންނަ ޖަޕާނު އެންބަސީޖޯލިފައްޗަކީ އިށީންދެ އުޅުމަށް ދިވެހިން އެންމެ ކުރީޒަމާނުއްސުރެ ބޭނުންކުރި އެއްޗެކެވެ. ރާއްޖެ އަންނަ ފަތުރުވެރިންނަށް ދިވެހިންގެ އާދަކާދައާއި ކެއިންބުއިން ވަރަށް ގިނަ ފަހަރަށް ކަމުދެއެވެ.