އިންފޮމޭޝަން ކޮމިޝަނަރުގެ އަމުރަށް ނުކިޔަމަންތެރިވުމަކީ ޖިނާއީ ކުށެއް ކަމަށާއި އެފަދަ މައްސަލަތަކުގައި، މައުލޫމާތު ހިއްސާނުކުރާ އިންފޮމޭޝަން އޮފިސަރަށް ޖަލު އަދަބު ދެވޭނެ ކަމަށް ކުރީގެ ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވީ މަޢުލޫމާތު ސިއްރުކޮށްގެންނާއި، ނުދީ ހިފަހައްޓައިގެންނާއި، އިންފޮމޭޝަން ކޮމިޝަނަރުގެ އަމުރަށް ނުކިޔަމަންތެރިވެގެން، ނޫސްވެރިން އަދާކުރަންޖެހޭ ޒިންމާ އަދާކުރަން ދަތިކުރުމުގެ ގާނޫނީ ނަތީޖާއާ ގުޅޭގޮތުން އޭނާގެ ބްލޮގުގައި ޝާއިއު ކުރެއްވި ލިޔުމެއްގައެވެ.
މަޢުލޫމާތު ހޯދައި ލިބިގަތުމުގެ ހައްގުގެ ގާނޫނުގައި، މަޢުލޫމާތެއް ފޯރުކޮށްދޭން ދައުލަތުގެ އިދާރާއަކަށް ލިބެނީ 21 ދުވަހުގެ މުއްދަތެކެވެ. އާދަޔާ ޚިލާފު ހާލަތެއް މެދުވެރިވާނަމަ، އިތުރު 14 ދުވަސް ލިބެއެވެ. އެ މުއްދަތުގެ ތެރޭގައި މަޢުލޫމާތެއް ނުދީފިނަމަ، ގާނޫނުގެ ބޭނުމަށް ބަލަނީ "މަޢުލޫމާތެއް ފޯރުކޮށްދިނުނަށް އިންކާރުކުރީ" ކަމަށެވެ.
ދައުލަތުގެ އިދާރާއަކުން މަޢުލޫމާތުދޭން އޮންނަ މުއްދަތުގައި މަޢުލޫމާތެއް ނުދީފިނަމަ، އެމައްސަލައެއް އިލްތިމާސްކުރަންޖެހެނީ އިންފޮމޭޝަން ކޮމިޝަނަރަށެވެ. ގާނޫނު އޮތް ގޮތުން، ކޮމިޝަނަރުގެ ނިންމުމަކީ ދަށު ކޯޓެއްގެ ނިންމުމަކާ އެއްވަރުގެ ގާނޫނީ ބާރު އޮތް ނިންމުމެއް ކަމަށް އެ ލިޔުމުގައިވެއެވެ. އެ ނިންމުން ތަންފީޒުކުރުމަކީ ދައުލަތުގެ އިދާރާއެއްގެ މައްޗަށް ލާޒިމުކަމެއް ކަމަށާއި، އެ ނިންމުމާމެދު ހިތްހަމަނުޖެހޭނަމަ، 30 ދުވަހުގެ ތެރޭގައި އެ މައްސަލައެއް ހައިކޯޓުގައި އިސްތިއުނާފުކުރެވޭނެކަން ވެސް ފާހަގަކޮށްފައިވެއެވެ.
ކޮމިޝަނަރުގެ ނިންމުމަކާމެދު އިސްތިއުނާފުނުކޮށް، އަދި އެ ނިންމުމަށް އަމަލު ވެސް ނުކޮށް ވަނިކޮށް، 45 ދުވަސް ފާއިތުވެއްޖެނަމަ، އިންފޮމޭޝަން ކޮމިޝަނަރަށް، އެ މައްސަލަ ޕީޖީ އޮފީހަށް ހުށަހެޅުމުގެ އިޚްތިޔާރު އޮވެއެވެ.
ގާނޫނުގެ ބާރު ހިންގުމަށް ހުރަސްއެޅުމާއި، އެކަމަށް ދަތިރުކުރުމާއި، އެ ކަމުގެ މަގުސަދު ޙާޞިލުވިޔަނުދިނުމަށް ކޮންމެ ކަމެއް ކުރާ މީހަކު އެ ކުރަނީ ކުށެއް ކަމަށް ގާނޫނުގައި ބުނެއެވެ.
އެ ކުށުގެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. އެ ކަންކުރީ، ދައުލަތުގެ ހިންގުމުގެ އިސް މަގާމެއްގައި ހުރި މީހަކުނަމަ، އަދަބު ބޮޑުވުމުގެ ފުރުސަތު ވެސް ގާނޫނުގައި އޮވެއެވެ. އެހެން ގޮސް، އެ ކުށުގެ ޖުމުލަ އަދަބު އެއް އަހަރު ދުވަހުގެ ޖަލު އަދަބަކަށް ވެސް ބަދަލު ކުރެވިދާނެކަން އެ ލިޔުމުގައި ފާހަގަކޮށްފައިވެއެވެ.
ގާނޫނުގައި ބުނާ ދުވަހަށް މައުލޫމާތު ނުދީފިނަމަ، ނުވަތަ މުއްދަތުގެ ފަހުން މައުލޫމާތު ދިނަސް ވެސް، ކުށުގެ ތަހުގީގުކޮށް، ފިޔަވަޅު އަޅަން ހުރަހެއް ނެތް ކަމަށް ޝަމީމްވަނީ ވިދާޅުވެފައެވެ.
"މިއީ، މައުލޫމާތު ދިނުމާ ހަވާލުވެ ތިއްބަވާ ސިވިލް ސާވިސްގެ މުވައްޒަފުން ޚާއްސަ ގޮތެއްގައި ސަމާލުވާންޖެހޭ ކަމެކެވެ. މަޢުލޫމާތެއް ނުދީގެން ތަހުގީގު ކުރާނީވެސް، ފުލުސް އޮފީހަށް ދަމާނީ ވެސް، ޖަލުގައި އޮންނަންޖެހޭނީވެސް އޭނާއެވެ،" ޝަމީމް ވިދާޅުވިއެވެ.
އެ ލިޔުމުގައިވަނީ ދައުލަތެއްގެ ހިންގުން ސިއްރުވުމަކީ ކޮރަޕްޝަނަށް މަގުފަހިވާ ކަމެއްކަން ފާހަގަ ކޮށްފައެވެ. ދުނިޔޭގެ ކޮރަޕްޝަން އިންޑެކްސްއިން ރަނގަޅު ނަތީޖާ ހޯދާ ޤައުމުތަކުން ކުރާ ކަމަކީ ވެސް މައުލޫމާތު ހާމަކުރުމުގެ ސަގާފަތެއް ގެންގުޅުމެވެ. މައުލޫމާތު ސިއްރުކުރާ ވަރަކަށް ކޮރަޕްޝަނާއި ހިންގުމުގެ ފެންވަރުދަށްކަމުގެ ސަގާފަތެއް އުފެދޭކަން އެ ލިޔުމުގައި ފާހަގަ ކޮށްފައިވެއެވެ.
މަޢުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުގެ މައުލޫމާތަށް އެދުމުން، ދައުލަތުގެ އިދާރާތަކުން މައުލޫމާތު ހިއްސާނުކުރާ މައްސަލަތައް މިފަހުން އިތުރުވެފައިވެއެވެ.
މިދިޔަ އޮގަސްޓު މަހު އިންފޮމޭޝަން ކޮމިޝަނަރުގެ އޮފީހުން ވަނީ މައުލޫމާތު ދިނުމުގެ ގާނޫނަށް ގިނަ އިދާރާތަކުން އަމަލެއް ނުކުރާ ކަމުގެ ކަންބޮޑުވުން ފާޅުކޮށްފައެވެ.
މީގެ އިތުރުން އިންފޮމޭޝަން ކޮމިޝަނަރުގެ އޮފީހުގެ އަޑުއެހުމަކަށް ހައުސިން މިނިސްޓްރީން ނުދިޔަ މައްސަލައެއްވެސް ޖެހި، އެ މިނިސްޓްރީ 350 ރުފިޔާއިން ޖޫރިމަނާކޮށްފައިވެއެވެ.
ހައުސިން މިނިސްޓްރީން ވަނީ އެ މައްސަލަ ދިމާވީ މުވައްޒަފެއްގެ އިހުމާލުން ކަމަށާއި އެ މުވައްޒަފާ ދޭތެރޭ ސިވިލް ސާވިސް ގަވައިދުގައިވާ ގޮތަށް ފިޔަވަޅު އަޅާފައިވާ ކަމަށް ބުނެފައެވެ.