އިންފޮމޭޝަން ކޮމިޝަނަރުގެ އޮފީސް (އައިކޮމް)ގެ އަޑުއެހުމަށް ހައުސިން މިނިސްޓްރީއަށް ނުދެވުމުގެ ސަބަބުން މިނިސްޓްރީ ޖޫރިމަނާކުރީ މުވައްޒަފެއްގެ އިހުމާލުން ކަމަށާއި އެ މުވައްޒަފާ ދޭތެރޭ ފިޔަވަޅު އަޅާފައިވާ ކަމަށް ހައުސިން މިނިސްޓްރީން މިއަދު ބުނެފިއެވެ.
އައިކޮމްއިން އިއްޔެ ބުނީ، މައުލޫމާތު ފޯރުކޮށްދޭން އެދި ހައުސިން މިނިސްޓްރީއަށް ހުށަހަޅާފައިވާ ހުށަހެޅުމަކަށް ޖަވާބުނުދީގެން މައްސަލައެއް އެ ކޮމިޝަނަށް ހުށަހެޅި ކަމަށެވެ. އެހެންވެ، އެ މައްސަލަ ބަލަން މިމަހު ހަތެއްގައި ތަވާލުކުރި ބައްދަލުވުމަށް މިނިސްޓްރީ ހާޒިރުވެފައިނުވާތީ 350 ރުފިޔާއިން ހައުސިން މިނިސްޓްރީ ޖޫރިމަނާކޮށްފައި ވާކަމަށް އައިކޮމްއިން ބުންޏެވެ.
އެ މައްސަލައާ ގުޅުވައި މިއަދު ހައުސިން މިނިސްޓްރީން ނެރުނު ބަޔާނެއްގައި ބުނީ، މިނިސްޓްރީގެ ހުރިހާ ކަމެއް ހާމަކަން ބޮޑުގޮތެއްގައި ކުރިއަށް ގެންދިއުމަށްޓަކައި، މައުލޫމާތު ހޯދަން މިނިސްޓްރީއަށް ހުށަހަޅާ ހުށަހެޅުންތަކަށް ކަނޑައެޅިފައިވާ މުއްދަތުގައި މައުލޫމާތު ފޯރުކޮށްދިނުމަކީ ވަރަށް ބޮޑަށް އިސްކަންދޭ ކަމެއް ކަމަށެވެ.
މިގޮތުން، އައިކޮމްއިން އެ މިނިސްޓްރީ ޖޫރިމަނާކުރީ މުވައްޒަފެއްގެ އިހުމާލުން ހިނގި ކަމެއްގެ ސަބަބުން ކަމަށާއި އެ މުވައްޒަފާ ދޭތެރޭ ސިވިލް ސާވިސް ގަވައިދުގައިވާ ގޮތަށް ފިޔަވަޅު އަޅާފައިވާ ކަމަށް މިނިސްޓްރީން ބުންޏެވެ.
އެހެންވެ، މި ފަދަ މައްސަލަތައް ތަކުރާރު ވިޔަ ނުދިނުމަށްޓަކައި ކަމާ ގުޅޭ އުސޫލުތައް ހަރުދަނާކުރަން މަސައްކަތް ކުރަމުން އަންނަ ކަމަށް ހައުސިން މިނިސްޓްރީން ވަނީ ބުނެފައެވެ.