އިންޑިއާއިން ރާއްޖެއަށް ކަނޑައަޅާ އާ ސަފީރަކަށް، ޖީ. ބަލަސުބްރަމާނިއަން އައްޔަންކުރަން އިންޑިއާގެ އެކްސްޓާނަލް އެެފެއާޒްއިން ނިންމައިފިއެވެ.
ބަލަސުބްރަމާނިއަމަކީ މި ވަގުތު އިންޑިއާއިން ނައިޖީރިއާއަށް ކަނޑައަޅައިފައި ހުންނަވާ ސަފީރެވެ. ނަމަވެސް އެ މަގާމަށްފަހު ދެން އޭނާ ހަވާލުވަނީ ރާއްޖޭގައި ހުންނަވާ ސަފީރުކަމުގެ މަގާމާއެވެ.
މި ވަގުތު އިންޑިއާ ސަފީރުގެ ގޮތުގައި ރާއްޖޭގައި ހުންނެވި މުނޫ މަހާވަރު އެ މަގާމުގެ ސަފީރުކަމުގެ ފަތްކޮޅު ކުރީގެ ރައީސް އިބްރާހިމް މުހައްމަދު ސޯލިހަށް އެރުވީ 17 ނޮވެމްބަރު 2021ގައެވެ.
އިންޑާއިން ރާއްޖެއަށް ކަނޑައަޅައިފައި ހުންނަ ސަފީރުގެ ގޮތުގައި މުނޫ މަހާވަރު ހަމަޖެއްސުމުގެ ކުރިން އެ މަގާމު ފުރުއްވަމުން ގެންދިޔައީ ސަންޖޭ ސުދީރެވެ.
އިދިކޮޅުގައި ތިއްބަވައިގެން "އިންޑިއާ އައުޓް" ހަރަކާތް ހިންގި ޕީޕީއެމް/ޕީއެންސީއިން ރާއްޖޭގެ ވެރިކަމާ މިދިޔަ އަހަރު ހަވާލުވުމާއެކު އިންޑިއާއާއި ރާއްޖޭގެ ގުޅުން ވަރަށް ގޯސްވިއެވެ. އެ ގުޅުން އިތުރަށް ގޯސްވީ މި ސަރުކާރުގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑު ވަޒީރު ނަރަންދުރަ މޯދީއަށް ކުޑާމީސްކޮށް ސޯޝަލް މީޑިއާގައި ވާހަކަ ދެއްކުމާ ގުޅިގެންނެވެ.
ނަމަވެސް އިންޑިއާއާއި ރާއްޖޭގެ ގުޅުން މިހާރު އަނެއްކާ ވެސް ވަރަށް ބޮޑަށް ވަނީ ބަދަހިވެފައެވެ. ގުޅުންތައް އަލުން ރަނގަޅުވެފައިވަނީ ރައީސް ޑރ. މުޙައްމަދު މުއިއްޒު، އިންޑިއާގެ ބޮޑުވަޒީރު ނަރެންދުރަ މޯދީ އާ ދައުރަކަށް ހުވައިކުރައްވަން އޮތް ރަސްމިއްޔާތަށް ވަޑައިގެންނެވިފަހުންނެވެ.
އޭގެފަހުން ރައީސްވަނީ އެ ގައުމަށް ފުރަމާނަ ދަތުރުފުޅެއް ވެސް ކުރައްވައިފައެވެ. އަދި މުހިންމު މަޝްވަރާތައް ކުރައްވައި، އިގްތިޞާދީ ދާއިރާއިން މުހިންމު އެއްބަސްވުންތަކުގައި ވެސް ސޮއިކުރައްވައިފައެވެ.