ތިން މަސް ދުވަސްތެރޭ ފެނަކަ ކޯޕަރޭޝަން ލިމިޓެޑުން، އެޕޯލޯ ހޯލްޑިންސް ޕްރައިވެޓް ލިމިޓެޑަށް ދައްކަންޖެހޭ 27 މިލިއަން ރުފިޔާ ދެއްކުމަށް އިއްޔެ ސިވިލް ކޯޓުން ހުކުމްކޮށްފިއެވެ.
އެޕޯލޯއިން ސިވިލް ކޯޓަށް ހުށަހެޅި މައްސަލާގައި ބުނެފައި ވަނީ، އެ 27،119،072.49 ރުފިޔާ (ހަތާވީސް މިލިއަން އެއްލައްކަ ނަވާރަހާސް ހަތްދިހަ ދެ ރުފިޔާ ސާޅީސް ނުވަ ލާރި) އަކީ އެޕޯލޯ ހޯލްޑިންގްސްއިން ފެނަކައަށް ކްރެޑިޓް އުސޫލުން ދޫކޮށްފައިވާ މުދަލަށް މިހާތަނަށް ދައްކަންޖެހި ނުދައްކާ ހުރި ފައިސާ ކަމަށެވެ. އަދި އެ ފައިސާއަކީ 2020 ވަނަ އަހަރުން ފެށިގެން ނުދައްކާ ހުރި ފައިސާކަމަށް އެ ކުންފުނިން ބުނެފައިވެއެވެ.
ސިވިލް ކޯޓުގެ ހުކުމުގައި ޝަރީއަތުން ފާހަގަކޮށްފައި ވަނީ، މުއްދަތު ހަމަވިއިރުވެސް ދައުވާ ފޯމާ ހަވާލުވިކަން އަންގައިދޭ ލިޔުން ފެނަކައިން ހުށަހަޅާފައި ނުވާ ކަމަށެވެ.
އަދި ސެޕްޓެމްބަރު އެކެއްގައި ފެނަކައިން ދައުވާގެ ދިފާއު ހުށަހެޅުމުގެ މުއްދަތު އިތުރުކޮށްދިނުމަށް އެދި ސިޓީއެއް ފޮނުވި ކަމަށެވެ. އަދި ސެޕްޓެމްބަރު 16ގައި ފެނަކައިން ދައުވާގެ ދިފާއު ހުށަހެޅިއިރުވެސް ދައުވާ ފޯމާ ހަވާލުވިކަން އަންގައިދޭ ލިޔުން ހުށަހަޅާފައި ނުވާކަމަށް ޝަރީއަތުން ފާހަގަކުރިއެވެ.
އެހެންކަމުން ފެނަކައިން ހުށަހެޅި ދިފާއުގެ ފޯމު ބަލައިގެންފައިނުވާ ކަމަށް ޝަރީއަތުން ވަނީ ފާހަގަކޮށްފައެވެ.
ހުކުމުގައި ބުނެފައި ވަނީ އެޕޯލޯ ހޯލްޑިންގްސްއިން ފެނަކައަށް ކްރެޑިޓް އުސޫލުން ދޫކޮށްފައިވާ މުދަލަށް މިހާތަނަށް ދައްކަންޖެހި ނުދައްކާ ހުރި 27.1 މިލިއަން ރުފިޔާއަކީ ދައްކަންޖެހޭ ފައިސާ ކަމުގައި ކަނޑައަޅާ ކަމަށެވެ. އަދި އެ ފައިސާ އިއްޔެއިން ފެށިގެން ތިން މަސް ދުވަސްތެރޭ އެކީ އެއްފަހަރާ ސިވިލް ކޯޓަށް ދައްކައި ޚަލާސްކުރުމަށް ފެނަކައިގެ ޣައިރު ހާޒިރުގައި ވަނީ ހުކުމްކޮށްފައެވެ.
މި މައްސަލަ އެޕޯލޯ ހޯލްޑިންގްސްއާ އެއްކޮޅަށް ނިންމި ނަމަވެސް، ފައިސާ ނުލިބި ލަސްވާ ލަސްވުމުގެ ސަބަބުން، އެޕޯލޯ ހޯލްޑިންގްސްއަށް ވަމުންދާ ގެއްލުމުގެ ބަދަލު ހޯދުމަށް ދައުވާކުރުމުގެ ހައްގު އެޕޯލޯ ހޯލްޑިންގްސްއަށް ލިބިގެންވާ ކަމަށް ކަނޑައަޅައިދޭނެ ތަނެއް ނެތް ކަމަށް ވަނީ ހުކުމްކޮށްފައެވެ. އަދި އެ ފައިސާ ހޯދުމަށް ގާނޫނީ ވަކީލުންނަށް ޚަރަދުކޮށްފައިވާ 25،000 ރުފިޔާ ނަގައިދޭނެ ތަނެއް ވެސް ނެތް ކަމަށް ވަނީ ހުކުމްކޮށްފައެވެ.
ފާހަގަކޮށްލެވޭ ގޮތުގައި މި ސަރުކާރުން ވެރިކަމާ ހަވާލުވީ ފެނަކައަކީ "ކޮރަޕްޝަންގެ ހާއްޔެއް"ގެ ގޮތުގައި ސިފަކުރަމުންނެވެ. އަދި އެ ކުންފުނި އޮތީ 1.7 ބިލިއަން ރުފިޔާއިން ދަރުވާލާފައި ކަމަށް ފެނަކައިން ވަނީ މީގެ ކުރިން ބުނެފައެވެ.
ނަމަވެސް މި ވެރިކަމަށް ހަތް މަސް ދުވަސްތެރޭ ފެނަކައިގެ ދަރަނީގެ ގޮތުގައި ހުރި ފައިސާގެ ތެރެއިން 300 މިލިއަން ރުފިޔާ ދައްކައިފައިވާ ކަމަށް އެ ކުންފުނިން ވަނީ ބުނެފައެވެ. އަދި ފައިސާ ދޫކޮށް ޚަލާސްކުރި ފަރާތްތަކުގެ ތެރޭގައި 278 ވެންޑަރުން ހިމެނޭ ކަމަށް ވަނީ ބުނެފައެވެ.
މީގެ އިތުރުން ގެއްލުމުގައި ހިންގަމުން އައި އެ ކުންފުންޏަށް މި އަހަރުގެ ދެވަނަ ކުއާޓަރުގައި ހަތް މިލިއަން ރުފިޔާގެ ފައިދާއެއް ވެފައިވާ ކަމަށް ވެސް ފެނަކައިން ބުނެފައިވެއެވެ.