ކ. ތިލަފުށި ކުޑަގިރި ފަރަށް އެރި އިންޑިއާގެ ބޯޓަކުން އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ)އަށް ތިން މިލިއަން ރުފިޔާ ދައްކަން ސިވިލް ކޯޓުން މިއަދު ހުކުމް ކޮށްފިއެވެ.
އިންޑިއާގެ "އެމްއެސްވީ މަރިޔާ ސިންތަޔަތިރާއި ރިޔާނާ" ނަމަކަށް ކިޔާ އެ ބޯޓު ކުޑަގިރި ފަރަށް އެރީ ބާދަގަނޑުތަކެއް ބަރުކޮށްގެން ދަތުރުކުރަނިކޮށް މިދިޔަ އަހަރުގެ ޖެނުއަރީ މަހުގެ 31 ވަނަ ދުވަހުއެވެ.
އެ މައްސަލައިގައި ފަރަށް ލިބުނު ގެއްލުންތައް ބަލައި، ބޯޓުގެ ވެރިފަރާތް ތިން މިލިއަން ރުފިޔާއިން ޖޫރިމަނާކޮށް އެ ފައިސާ 30 ދުވަހުގެ ތެރޭގައި ދެއްކުމަށް އީޕީއޭއިން އެންގީ މިދިޔަ އަހަރުގެ މާޗު މަހުގައެވެ.
އީޕީއޭގެ ފަރާތުން ސިވިލް ކޯޓަށް މައްސަލަ ހުށަހެޅީ، އެ ބޯޓުގެ ވެރި ފަރާތުން ޖޫރިމަނާގެ ފައިސާ ދައްކާފައިނުވާތީއެވެ. އެއީ 3،098،710 ރުފިޔާގެ ޖޫރިމަނާއެކެވެ.
ސިވިލް ކޯޓަށް ހުށަހެޅި މައްސަލައިގައި އީޕީއޭއިން އެދިފައިވަނީ އެ ބޯޓުގެ ވެރިފަރާތް ކަމުގައިވާ އެސްއެމްޓީޓީ ޖެސިންތަގެ ކިބައިން ފައިސާ ނަގައިދިނުމަށެވެ. އެއީ ރާއްޖޭން ބޭރުގައި އުޅޭ ފަރާތެއް ކަމުން، އެ ފަރާތުގެ ޣައިރު ހާޒިރުގައި މައްސަލަ ނިންމައިދިނުމަށް އެދި ސިވިލް ކޯޓަށް ވަނީ ހުށަހަޅައިފައެވެ.
އެއާ އެކު ސިވިލް ކޯޓުން ހުކުމް ކުރީ، "އެމްއެސްވީ މަރިޔާ ސިންތަޔަތިރާއި ރިޔާނާ" ބޯޓުން ދައްކަންޖެހޭ ޖޫރިމަނާގެ 3،098،710 ރުފިޔާ، މިއަދުން ފެށިގެން 14 ދުވަހުގެ ތެރޭގައި ދައްކައި ޚަލާސްކުރުމަށެވެ.
މިއީ ރާއްޖެއަށް ކާގޯ އެތެރެކުރާ ބޯޓެކެވެ.