ރައްޔިތުންގެ މަޖިލިސް އިދާރާގެ އެންމެ އިސް ތިން މަގާމުކަމަށްވާ އަމީންއާއްމާއި، ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމުގައި މިހާރުވެސް ތިއްބެވި ބޭފުޅުންގެ މަގާމުތައް ދަމަހައްޓަން މަޖިލީހުގެ އިއްތިފާގުން މިއަދު ފާސްކޮށްފިއެވެ.
އެ ތިން މަގާމުގައި މިވަގުތު ތިއްބަވާ ބޭފުޅުންނަކީ:
- އަމީންއާއްމު: ފާތިމަތު ނިއުޝާ
- ކައުންސެލް ޖެނެރަލް: ފާތިމަތު ފިލްޒާ، މަގާމަށް އައްޔަނުކުރެއްވީ 18 ޑިސެމްބަރު 2012ގައި
- ސާޖެންޓް އެޓް އާމްސް: މޭޖާ ޖެނެރަލް ރިޓަޔާޑް ތަލްހަތު ހަސަން، މަގާމަށް އައްޔަނުކުރެއްވީ 27 މާޗު 2024ގައި
މިއަދުގެ މަޖިލީހުގެ ޖަލްސާގައި ނެގި ވޯޓުގައި އަމީންއާއްމު، ނިއުޝާގެ މަގާމު ދަމަހައްޓަން 79 މެންބަރުންގެ އިއްތިފާގުން ވަނީ ފާސްކޮށްފައެވެ.
ކައުންސެލް ޖެނެރަލް، ފިލްޒާގެ މަގާމު ދަމަހައްޓަން ނެގި ވޯޓުގައި 80 މެންބަރުންގެ އިއްތިފާގުން ވަނީ އެ މަގާމު ދަމަހައްޓަން ފާސްކޮށްފައެވެ.
އަދި ސާޖެންޓް އެޓް އާމްސް، ތޮލްހަތުގެ މަގާމު ދަމަހައްޓަން 80 މެންބަރުންގެ އިއްތިފާގުން ވަނީ ފާސްކޮށްފައެވެ.
މަޖިލީހުގެ ގަވާއިދު ބުނާ ގޮތުގައި އެ ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހާ ހިނދަކު ހިނގަމުންދާ މަޖިލީހުގެ އަމީންއާންމާއި މަޖިލީހުގެ ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމަށް މީހުން އައްޔަންކުރަންވާނެ ކަމަށެވެ.
ފާތިމަތު ފިލްޒާ ކައުންސެލް ޖެނަރަލް ކަމަށް އައްޔަން ކުރީ 17 ވަނަ ރައްޔިތުންގެ މަޖިލީހުގައި 70 މެމްބަރުންގެ އަޣުލަބިއްޔަތުންނެވެ. ފިލްޒާ ވަނީ ބަންޑާރަ ނައިބުގެ އޮފީހުގައި ގާނޫނީ ވަކީލެއްގެ ގޮތުގައި ވެސް މީގެ ކުރިން މަސައްކަތް ކުރައްވާފައެވެ.
މޭޖާ ރިޓަޔާޑް ތަލްހަތަކީ އެމްއެންޑީއެފްގައި 21 އަހަރު ޚިދުމަތް ކުރައްވާފައިވާ ބޭފުޅެކެވެ. އެ ޚިދުމަތުން އޭނާ ރިޓަޔާ ކުރެއްވީ 15 ޖެނުއަރީ 2020 ގައެވެ.