އިންޑިއާގެ މެގަ ސްޓާ އަމީތާބް ބައްޗަން މުމްބާއީގެ އޯޝީވޯރައިން ގަނެފައިވާ ޑުޕްލެކްސް އެޕާޓްމަންޓެއް ނުވަ މިލިއަން އެމެރިކާ ޑޮލަރަށް ވިއްކާލައިފިއެވެ.
އޯޝީވޯރައަކީ މުމްބާއީގެ އުތުރުން މަޝްހޫރު ލޯކަންޑްވާލާ ކޮމްޕްލެކްސް ކައިރީގައި އޮންނަ އަވަށެކެވެ. އިންޑިއާގެ އެންމެ އަގުބޮޑު ލައިފްސްޓައިލްގެ މީހުން ދިރިއުޅޭ އެއް އަވަށް ކަމަށްވާ އޯޝިވޯރާގައި ހުންނަ އަމީތާބްގެ މި ލަގްޒަރީ އެޕާޓްމަންޓްގައި މުޅި އެކު ހަ ކޮޓަރި ހުންނަ ކަމަށް ރިޕޯޓުތައް ބުނެއެވެ.
މި އެޕާޓްމަންޓު ވިއްކާލުމުގެ ކުރިން ބޮލީވުޑްގެ މަޝްހޫރު ބަތަލަ ކްރިތީ ސެނޮން ވަނީ 2021 ވަނަ އަހަރުގެ ނޮވެމްބަރު މަހުން ފެށިގެން މި އެޕާޓްމަންޓްގައި ކުއްޔަށް ދިރިއުޅެފައެވެ. ކްރިތީއަށް މި އެޕާޓްމަންޓް ދޫކޮށްފައިވަނީ މަހެއްގެ މައްޗަށް 69،300 (ފަސްދޮޅަސް ނުވަހާސް ތިންސަތޭކަ) އެމެރިކާ ޑޮލަރަށެވެ.
ބޮލީވުޑް އެކްޓަރު އަމީތާބް ބައްޗަން އަދި އެކްޓަރު އަބީޝެކް ބައްޗަން--ފޮޓޯ/ބޮލީވުޑްހަންގާމާ
އަމީތާބަކީ އިންޑިއާގެ ފިލްމީ ތަރިންގެ ތެރެއިން ރިއަލް ސްޓޭޓް ވިޔަފާރީގައި ވަރަށް ފުޅާ ދާއިރާއެއްގައި މަސައްކަތް ކުރަމުން އަންނަ އެކްޓަރެކެވެ. މިހާރު ވެސް ފިލްމީ ދާއިރާގައި ވަރަށް އެކްޓިވް މަސައްކަތް ކުރަމުން އަންނަ 82 އަހަރުގެ އެކްޓަރުގެ ރިއަލް އެސްޓޭޓް ވިޔަފާރީގެ ދަށުން ހުރި ޕްރޮޕަޓީތަކުގެ އަގު 23 މިލިއަން އެމެރިކާ ޑޮލަރަށް އަރާނެ ކަމަށް ރިޕޯޓުތައް ބުނެއެވެ. އޭގެ ތެރޭގައި އިންޑިއާގެ މުމްބާއީގެ އިތުރުން، ޕޫނޭ، ގުރުގައޯން އަދި އިންޑިއާއިން ބޭރު ޤައުމުތަކުގައި ވެސް އެކްޓަރުގެ އަމިއްލަ ޕްރޮޕަޓީތައް އެބަހުރި ކަމަށް ރިޕޯޓުތައް ބުނެއެވެ.
ބޮލީވުޑްގެ 'ޝެހެންޝާހް'ގެ ނަމުން މަގުބޫލު އެކްޓަރު އެންމެފަހުން ކުޅުނު ފިލްމުތަކުގެ ތެރޭ، މިދިޔަ އަހަރު ރިލީޒްކުރި ތެލުގޫ ސައިންސް ފިކްޝަން ފިލްމު "ކަލްކީ" އަދި ސައުތު އެކްޓަރު ރަޖްނީކާންތާ އެކު ކުޅުނު ތަމަޅަ ފިލްމު "ވެއްޓައިޔަން" ހިމެނެއެވެ.