ޕޮލިޓެކްނިކްގެ ޖެނުއަރީ އިންޓޭކްގެ ކޯސްތަކެއްގައި ހިލޭ ތަމްރީނުކޮށްދިނުމަށް ނިންމައިފިއެވެ.
ޕޮލިޓެކްނިކުން ވަނީ އަންނަ ޖެނުއަރީ އިންޓޭކުގައި އެކި ލެވެލްތަކުގެ ކޯސްތަކުގައި ބައިވެރިވާން ފުރުސަތު ހުޅުވާލާފައެވެ. މިގޮތުން، މަސައްކަތްތެރިކަމުގެ ދާއިރާއަށް ނުކުތުމަށް ބޭނުންވާ ޒުވާނުންނަށް ޚާއްސަކޮށް ހިލޭ ކޯސްތަކެއް ކުރިއަށް ގެންދާނެ ކަމަށް ޕޮލިޓެކްނިކުން ބުނެއެވެ.
ހިލޭ ތަމްރީނު ކޮށްދޭ ކޯސްތަކުގެ ތެރޭގައި އާކިޓެކްޗާ، އޮޓޯމޭޓިވް އިންޖީނިއަރިން، ސިވިލް އިންޖީނިއަރިން، އިލެކްޓްރިކަލް އިންޖީނިއަރިން، އިންޖީން ރިޕެއާ އެންޑް މެއިންޓެނެންސް، ޕްރޮގްރާމިން، ވެލްޑިން، ކޭކް ޑެކަރޭޝަން، ފޮޓޯގްރަފީ އަދި ވަޑާންކުރަން ދަސްކޮށްދޭ ކޯސްތައް ހިމެނެއެވެ.
ޕޮލިޓެކްނިކްގެ ކޯސްތަކުގެ ތެރޭގައި ސެޓްފިކެޓް އެކަކުން ފެށިގެން ޑިޕްލޮމާ ފެންވަރުގެ ކޯސްތައް ހިމެނޭއިރު، އަންނަ މަހުގެ 15ގެ ނިޔަލަށް ކޯސްތަކަށް އެޕްލިކޭޝަން ހުށަހެޅޭނެއެވެ.