ގއ. ކަނޑުހުޅުދޫގައި ރޭ ހިނގި މާރާމާރީގައި އަނިޔާވި އެކަކުގެ ހާލު ސީރިއަސްވެ، އިތުރު ފަރުވާއަށް މާލެ ގެންނަން ފުރުވާލާފައިވާ ކަމަށް އެ ރަށު ސިއްހީ މަރުކަޒުން މިއަދު ބުނެފިއެވެ.
ފުލުހުން ބުނި ގޮތުގައި، އެ ރަށުގައި ދެ މީހެއްގެ މެދުގައި މާރާމާރީ ހިނގައިގެން ރިޕޯޓުކުރީ ރޭ 21:37 ހާއިރުއެވެ.
މި މާރާމާރީގައި 37 އަހަރާއި 40 އަހަރުގެ ދެ ފިރިހެނުންނަށް ވަނީ އަނިޔާވެފައެވެ. އެ މީހުންނަށް ގއ. އަތޮޅު ހޮސްޕިޓަލުގައި ފަރުވާ ދެމުން އަންނަ ކަމަށް ފުލުހުން ބުނެއެވެ.
މި މާރާމާރީގައި އަނިޔާވި މީހުންގެ އިތުރު ތަފްސީލު ހިއްސާކުރައްވަމުން ކަނޑުހުޅުދޫ ހެލްތު ސެންޓަރުގެ އޮފިޝަލު "ސަން"އަށް ވިދާޅުވީ، މާރަމާރީގައި އަނިޔާވި ދެ މީހުން އިތުރު ފަރުވާއަށް ރޭގެ ވަގުތެއްގައި ވިލިނގިލީގައި ހުންނަ, ގއ. އަތޮޅު ހޮސްޕިޓަލަށް ފޮނުވާލާފައިވާ ކަމަށެވެ.
މިގޮތުން، މާރާމާރީގައި އެކަކުގެ ކޮނޑު ކަށިގަނޑާއި އަތް ޒަހަމު ވެފައިވާ ކަމަށް އޭނާ ވިދާޅުވިއެވެ. އިތުރު ފަރުވާއަށް މާލެއަށް ގެންނަން ފުރުވާލީ އެ މީހާ ކަމަށް އޮފިޝަލް ވަނީ ވިދާޅުވެފައެވެ.
"މިހާރު ލިބިފައިވާ މައުލޫމާތުން އިތުރު ފަރުވާއަށް އެކަކު މާލެއަށް އެބަ ފޮނުވާލާ. މިހާރު ދަތުރު ފައްޓައިފި ކާޑެއްދުއަށް ދާން އިނގޭތޯ އަޅުގަނޑުމެނަށް މައުލޫމާތު ލިބިފައިވާ ގޮތުން. ކާޑެއްދޫ ތްރޫކޮށް މާލެ އައިޖީއެމްއެޗަށް ހެން ހީވަނީ ފާދާ ޓްރީޓްމަންޓަށް." އޮފިޝަލް އިތުރަށް ތަފްސީލު ކޮށްދެއްވިއެވެ.
މީގެ އިތުރުން، މާރާމާރީގައި އަނިޔާވި ދެވަނަ މީހާގެ ބޮލުގެ ބޮޑު ބައެއް ފަޅައިގެން ގޮސްފައިވާ ކަމަށާއި އޭނާގެ ގައިގެ އިތުރު ތަންތަނަށް ވެސް އަނިޔާތައް ލިބިފައި ހުރި ކަން އޮފިޝަލް ވަނީ ފާހަގަކުރައްވާފައެވެ.
ނަމަވެސް އެ މީހާގެ ހާލު ސްޓޭބަލް ކަމަށް އޮފިޝަލް ވިދާޅުވިއެވެ.