ކުރިއަށް އޮތް ފަސް ދުވަހު ވެސް މުޅި ރާއްޖެއަށް މޫސުން ގޯސްވާނެ

ކުރިއަށް އޮތް ފަސް ދުވަހު ވެސް މުޅި ރާއްޖެއަށް މޫސުން ގޯސް ވާނެ ކަމަށް ލަފާކުރެވޭ ކަމަށް މޫސުމާ ބެހޭ ގައުމީ އިދާރާއިން މިއަދު ބުނެފިއެވެ.

އެ އިދާރާގެ އޮފިޝަލަކު 'ސަން'އަށް މައުލޫމާތު ދެއްވި ގޮތުގައި، އެންމެ ބޮޑަށް ވިއްސާރަ ކުރާނެ ކަމަށް ލަފާކުރެވެެނީ މެދު ރާއްޖެތެރެއަށާއި އުތުރުގެ އަތޮޅުތަކަށް ކަމަށެވެ.

ނަމަވެސް، މުޅި ރާއްޖެއަށް އަދިވެސް ވިއްސާރަ ކުރާނެ ކަމަށް އޮފިޝަލް ވަނީ ވިދާޅުވެފައެވެ.

"އަދިވެސް ގާތްގަނޑަކަށް ކުރިއަށް އޮތް ފަސް ދުވަހު ވެސް ވިއްސާރަކޮށް އުޅެނީ މުޅި ރާއްޖެއަށް ވެސް. ދޭތެރެއަކުން އެއް ދުވަސް އެހެން ބްރޭކެއް އުޑުމަތި ބަނަކޮށް މާ ބޯކޮށް ނުވެހި ދިޔަކަމުގައި ވިޔަސް، އަނެއްކާ އަނެއް ދެ ދުވަހުން ފަށައިގެން ވިއްސާރަ. އެކަހަލަ ގޮތަކަށް މިއުޅެނީ. އެއްކޮށް ސާފުވެގެނެއް ނުދާނެ" އަތޮޅުތަކަށް މޫސުން ލަފާކުރެވޭ ގޮތް އޮފިޝަލް އިތުރަށް ތަފުސީލު ކޮށްދެއްވިއެވެ.

މީގެއިތުރުން، މެޓުން ބުނީ، މެދު ރާއްޖެތެރެއާ އުތުރުގެ އަތޮޅުތަކަށް އިރުދެކުނާ ދެކުނުން ގަޑިއަކު ތިން މޭލާއި 13 މޭލު ބާރުމިނުގައި ވައި ޖެހޭނެ ކަމަށާއި ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 10 މޭލާ 20 މޭލު ބާރު މިނުގައި ކަމަށެވެ.

ވިލާގަނޑުގައި 35 މޭލަށް ހުރިހާ ސަރަހައްދަކަށް ވެސް ވައިގަދަވާނެ ކަމަށް މެޓުން ބުނެފައިވެއެވެ.

ކަނޑުތައް އާދައިގެ ވަރަށް ގަދަކޮށް އުޅެނީ ދެކުނުގެ އަތޮޅުތަކަށް ކަމަށާއި މެދު ރާއްޖެތެރެއާ އުތުރުގެ އަތޮޅުތަކުގެ ކަނޑުތައް މަޑުވާނެ ކަމަށް މެޓުން ބުނެއެވެ. އެކަމަކު، ވިލާގަނޑުގައި ހުރިހާ ސަރަހައްދެއްގެ ކަނޑުތައް ވެސް ގަދަވާނެ ކަމަށް އެ އިދާރާއިން ބުނެއެވެ.

އެއާއެކު، ދެކުނުގެ އަތޮޅުތަކުގެ ކަނޑުތަކުގެ ރާޅުގެ އުސްމިން ތިން ފޫޓާއި ހަ ދެމެދުގައި ހުންނާނެ ކަމަށާއި އުތުރާއި މެދު ރާއްޖެތެރޭގެ ކަނޑުތަކުގައި ރާޅު ގެ އުސްމިން ހުންނާނީ ދެ ފޫޓާ ހަތަރު ފޫޓާ ދެމެދުގައި ކަމަށް އެ އިދާރާއިން ބުނެއެވެ.

މި ހަފުތާއިން ފެށިގެން ވަނީ ރާއްޖެއަށް އަނެއްކާ ވެސް މޫސުން ގޯސްވެ، ބޯކޮށް ވާރޭވެހެން ފަށައިފައެވެ. އެގޮތުން، މިދިޔަ ހޯމަ ދުވަހު ވަނީ މާލޭގެ މަގުތަކުގައި ފެންބޮޑުވެފައެވެ.

މެޓުން އޭރު ބުނީ ތިން ދުވަސްތެރެ މޫސުން ރަނގަޅު ވާނެކަމަށެވެ.

ނަމަވެސް، މި ފެށޭ ހަފުތާގައި ވެސް މޫސުން ގޯސްވާނެތީ، މޫސުމަށް ސަމާލުވާން އެ އިދާރާއިން ވަނީ އިލްތިމާސްކޮށްފައެވެ.