ބޮލީވުޑްގެ މަގުބޫލު އެކްޓަރު އާރް މާދަވަން (މެޑީ) އަދި ޒުވާން ބަތަލާ ފާތިމާ ސަނާ ޝޭހް އެކީގައި ސޮއިކޮށްފައިވާ ފިލްމުގެ ނަމަކީ "އާޕް ޖެއިސާ ކޮއި" ކަމަށް ރިޕޯޓުތައް ބުނެފިއެވެ.
މީގެ ކުރިން "ތަރުކީ"ގެ ނަމުގައި ގެނެސްދޭނެ ކަމަށް އިއުލާނުކުރި މި ފިލްމަކީ ޕްރޮޑިއުސަރު ކަރަން ޖޯހަރުގެ ދަރުމާ ކުންފުނިން ގެނެސްދޭ ރޮމޭންޓިކް ކޮމެޑީއެކެވެ.
މި ފިލްމުގެ ނަމާ އެކު 1980 ވަނަ އަހަރު ރިލީޒްވި މަޝްހޫރު ފިލްމު "ގުރުބާނީ"ގެ ހަނދާން އާކުރުވާ ކަމަށް ގިނަ ބަޔަކު ވަނީ ބުނެފައެވެ. މި ފިލްމަށް ދެވިފައިވާ ނަމަކީ ފިލްމު "ގުރުބާނީ"ގެ މަޝްހޫރު ލަވަ 'އާޕް ޖައިސާ ކޮއި ނެހީ' ލަވައިގެން ނަން ކަމުން އެ ފިލްމުގެ ވަރަށް ގިނަ ހަނދާންތައް އަނެއްކާ ވެސް އާ ވެއްޖެ ކަމަށް ބައެއް މީހުން އަންނަނީ ބުނަމުންނެވެ.
ފިިލްމު "ގުރުބާނީ"ގެ ލަވަ 'އާޕް ޖައިސާ ކޮއި ނެހީ'ގެ މަންޒަރެއްގައި ކުރީގެ ބަތަލާ ޒީނަތު--ފޮޓޯ/އިންޑިއަންއެކްސްޕްރެސް
ދަރުމާގެ މި ފިލްމުގެ ޑައިރެކްޓަރަކީ ވިވެކް ސޯނީއެވެ. މި ފިލްމުގެ އިތުރުން ވިވެކް ސޯނީ ވަނީ ބަތަލާ އަނަނިޔާ ޕާންޑޭއާއި އެ ކުންފުނިން ގެނެސްދިން ކާމިޔާބު ފިލްމު "ކިލް"ގެ އެކްޓަރު ލަކްޝްޔާ ހިމަނައިގެން ވެސް ލޯބީގެ ފިލްމެއް ގެނެސްދޭނެކަން އިއުލާނުކޮށްފައެވެ.
"ޗާންދު މޭރާ ދިލް"ގެ ނަމުގައި ގެނެސްދޭ އެ ފިލްމު ގެނެސްދޭނީ ދަރުމާގެ ގޮފި ދަރުމެޓިކް އެންޓަޓެއިންމަންޓްއިންނެވެ.
ފިލްމު "އާޕް ޖައިސޭ ކޮއި"އަކީ ދުވަސްވީ ފިރިހެނަކާއި ޒުވާން އަންހެން ކުއްޖަކާ ދެމެދު އުފެދޭ ލޯބީގެ ގުޅުމުގެ މައްޗަށް ބިނާކޮށް އުފައްދާ ފިލްމެކެވެ. މި ފިލްމުގެ މަސައްކަތް ވަރަށް އަވަހަށް ފަށަން ތައްޔާރުވަމުން އަންނައިރު ފިލްމު ބެލުންތެރިންނާ ހަމައަށް ގެނެސްދޭނެ އިރެއް ހާމައެއް ނުކުރެއެވެ.