އިންޑިއާގެ ލަވަކިޔުންތެރިޔާ ދިލްޖީ ދޯސާންޖު ދާދި ފަހުން ބޭއްވި ކޮންސެޓު, ބެލްކަނީތަކުގައި ތިބެ ހިލޭ ބެލި މީހުންނަށް ޚާއްސަ މެސެޖެއް ދީފިއެވެ.
އިންޑިއާގެ އަހްމެދުއާބަދުގައި ބޭއްވި މި މިއުޒިކް ކޮންސެޓް ބަލަން ދިޔަ މީހުން ބޮޑު އަގުގައި ޓިކެޓް ގަނެގެން މިއުޒިކް ޝޯ ބަލަން ދިޔައިރު އެ ސަރަހައްދުގައި ހުރި ހޮޓާތަކުގައި ތިބި މީހުން ވަނީ ބެލްކަނިތަކުގައި ތިބެ ހިލޭ މި ޝޯ ބަލާފައެވެ.
މި ކަމާ ގުޅިގެން ޝޯ ކުރިއަށްދިޔަ ވަގުތު ދިލްޖީތު ވަނީ އެ މީހުންނާ މުޚާތަބުކޮށް ވާހަކަ ދައްކާފައެވެ.
އިންޓަނެޓުގައި މިހާރު ދައުރުވަމުން އަންނަ ވީޑިއޯއެއްގައި ދިލްޖީތު ބުނެފައިވަނީ، ހޮޓާތައް ހިންގާ މީހުންގެ ވިސްނުން ވަރަށް ރަނގަޅު ކަމަށާއި އެ ތަނުގައި މަޑުކޮށްގެން ތިބި މީހުންނަށް އިތުރު ފީއަކައިނުލާ އޭނާގެ ޝޯ ބެލުމުގެ ފުރުސަތު މަގުފަހިވެފައިވާ ކަމަށެވެ.
ދިލްޖީންތު މުހިއްމު ރޯލް ކުޅުނު ފިލްމު "އަމަރު ސިންގް ޗަމްކީލާ"--ފޮޓޯ/ފޭސްބުކް
ދިލްޖީތުގެ މި މެސެޖަށް ރައްދު ދެމުން އޯޑިއަންސްގައި ހުރި މީހަކު ބުނެފައިވަނީ، ހޮޓާތަކުގައި ތިބި މީހުން ވަކިން ޓިކެޓަށް ފައިސާ ނުދެއްކި ނަމަވެސް އެ ތަނަށް ދިޔަ މީހުނަށްވުރެ އެތައް ގުނަ އިތުރަށް ހޮޓަލުގައި ތިބި މީހުން ޚަރަދުކުރާނެ ކަމަށް ގަބޫލުކުރެވޭ ކަމަށެވެ.
ބައެއް މީހުން ސޯޝަލް މީޑިއާގައި ކޮށްފައިވާ ކޮމެންޓަތަކުގައި ބުނެފައިވާ ގޮތުގައި ބެލްކަނީތަކުގައި ޝޯ ބަލަން ތިބި މީހުންގެ ހޮޓަލުގެ އަގަކީ ރެއެއްގެ މައްޗަށް އެއް ލައްކަ އިންޑިއާ ރުޕީސްއެވެ.
މިއުޒިކީ ދާއިރާގެ އިތުރުން ފިލްމީ ދާއިރާއިން ވެސް މިހާރު ފެންނަ ދިލްޖީތަކީ އިންޑިއާގެ އިތުރުން ބައިނަލްއަޤުވާމީ އެކި ޤައުމުތަކުގައި ވެސް މިއުޒިކް ޝޯ ދެމުން އަންނަ ލަވަކިޔުންތެރިއެކެވެ.