ކްރިމިނަލް ކޯޓުން ޝަރީއަތް ނިމެންދެން ބަންދުކޮށްފައިވާ މީހުންގެ ބަންދު، ޕްރޮސިކިއުޓާ ޖެނެރަލް (ޕީޖީ) އޮފީހުން ގަވައިދުން މުރާޖާ ނުކުރާ ކަމަށް އެ އޮފީހުގެ އޮޑިޓުގައި ބުނެފިއެވެ.
އޮޑިޓާ ޖެނެރަލްގެ އޮފީހުން ވަނީ، 2018އިން 2021 ވަނަ އަހަރުގެ ނިޔަލަށް ޕީޖީ އޮފީހުން ދައުވާކުރުމާ ގުޅޭ ގޮތުން ކޮށްފައިވާ މަސައްކަތްތަކުގެ އޮޑިޓެއް މި ހަފުތާގައި ނެރެފައެވެ.
އެ އޮޑިޓުގައިވާ ގޮތުން ޝަރީއަތް ނިމެންދެން މީހުން ބަންދުކުރާ ހާލަތްތަކުގައި، އެ އަމުރު ކޮންމެ 30 ދުވަހަކުން މުރާޖާ ކުރަން ޖެހޭ ކަމަށް ނިންމައި، 2019 ވަނަ އަހަރުގެ އޮކްޓޯބަރު 20ގައި ޖިނާއީ މައްސަލަތަކުގައި އަމަލުކުރާނެ މައިގަނޑު ސިޔާސަތު އިސްލާހު ކޮށްފައިވެއެވެ.
ނިސްބަތުން ގިނަ އަދަދެއްގެ ބަޔަކު ޝަރީއަތް ނިމެންދެން ބަންދުގައި ތިބިއިރު ބަންދުގައި ތިބޭތާ ދެ އަހަރަށް ވުރެ ގިނަ ދުވަސް ފާއިތުވި އިރުވެސް ބަންދު މުރާޖާކޮށްފައިވާކަން އެނގެން ނެތް މީހުން ތިބި ކަމަށް އޮޑިޓުގައިވެއެވެ. އަދި 2019 ވަނަ އަހަރު ސިޔާސަތު އިސްލާހު ކުރި ފަހުން ވެސް އެގޮތުގެ މަތިން ބަންދު މުރާޖާ ކުރަމުން ގޮސްފައިނުވާކަން ފާހަގަވާ ކަމަށް އެ ރިޕޯޓުގައިވެއެވެ.
"މިގޮތުން އެ އިސްލާހަށް ފަހުގައި ވެސް ބަންދު މުރާޖާކުރުމަށް ވަރަށް ގިނަ ދުވަސް ނަގާކަން ފާހަގަކުރަމެވެ." އޮޑިޓުގައިވެއެވެ.
އެ ރިޕޯޓުގައި ވަނީ އެ މައްސަލަ ފާހަގަވި ބައެއް ހާލަތްތަކުގެ މިސާލު ދައްކައިފައެވެ. އެގޮތުން މެއި 6، 2015 ވަނަ ދުވަހު ބަންދުކުރުމަށް އަމުރުކުރި މީހެއްގެ ބަންދު މުރާޖާ ކުރަން ފުރަތަމަ ހުށަހަޅައިފައިވަނީ 1،709 ދުވަސް (ހަތަރު އަހަރާއި އަށް މަސް) ފަހުން ކަމަށް ރެކޯޑްތަކުން ދައްކައިފައިވެއެވެ. އަދި 2019 ވަނަ އަހަރު ގެނައި އިސްލާހަށް ފަހު ވެސް، އެ މީހާގެ ބަންދު މުރާޖާ ކުރަން ފުރަތަމަ ގެންދިޔައީ 81 ދުވަސް ފަހުން ކަމަށް އެ ރެކޯޑުތަކުން ދައްކައެވެ.
އޮޑިޓްގައި ވަނީ، ކަނޑައެޅިފައިވާ އުސޫލެއްގެ ދަށުން ބަންދުގައި ތިބޭ މީހުން ބަންދުގައި ބަހައްޓަން ޖެހޭކަން ގަވައިދުން މުރާޖާ ނުކުރާނަމަ އެފަދަ މީހުންގެ ކަންކަން ވަކިވަކިން ނުބެލި ގިނަ ދުވަސްތަކެއް ވަންދެން ބަންދުގައި ތިބެންޖެހުމުން އަސާސީ ހައްގުތައް ހިފެހެއްޓޭ ކަމަށް ބުނެފައެވެ.
"މިގޮތުން މިފަދަ މީހުންގެ ކުށް ސާބިތުނުވާ ހާލަތްތަކާއި ބަންދުގައި ތިބޭ މުއްދަތު އެ މީހުންނަށް ހުކުމްކުރާ ކުށުގެ އަދަބަށް ވުރެ ދިގުވާ ހާލަތްތައް ވެސް މެދުވެރިވެފައިވާކަން ފާހަގަކުރަމެވެ." އޮޑިޓްގައިވެއެވެ.
އެހެންވެ އޮޑިޓާ ޖެނެރަލްގެ އޮފީހުން ވަނީ، ބަންދު މުރާޖާ ކުރުމުގެ މަސައްކަތް ހަރުދަނާކޮށް، 2019ގައި ގެނައި އިސްލާހާ އެއްގޮތަށް އަމަލު ކުރުމަށް އިލްތިމާސްކޮށްފައެވެ. އަދި އެ ސިޔާސަތުގެ ދަށުން ކުރާ މަސައްކަތްތަކުގެ ލިޔެކިޔުންތައް ހަރުދަނާ ގޮތެއްގައި ބެލެހެއްޓުމަށް ވެސް ޕީޖީ އޮފީހަށް ލަފާދީފައިވެއެވެ.
ޝަރީއަތް ނިމެންދެން ބަންދު ކުރުން ނުވަތަ ވާނުވާ ބަންދުގެ މައްސަލަ ހައްލުކުރުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން އެކަމަށް ކުރަންޖެހޭ ގާނޫނީ މަސައްކަތްތައް ކުރަމުން އަންނަ ކަމަށް މި އަހަރުގެ މާޗު 14 ގައި ރައީސް ވިދާޅުވެފައިވެއެވެ.
ގައިދީންގެ ހައްގުތަކަށް މަސައްކަތް ކުރާ ޖަމިއްޔާ މޯލްޑިވްސް ހިއުމަން ރައިޓްސް އެންޑް ޑިޓެއިނީ ވޮޗުން މިދިޔަ ޖުލައި މަހު އާންމުކޮށްފައިވާ މައުލޫމާތުގައިވާ ގޮތުން އެހާތަނަށް ވެސް 350އެއްހާ މީހުން ޝަރީއަތް ނިމެންދެން ބަންދުކޮށްފައިވެއެވެ.