ފަހި ދިރިއުޅުން ކޯޕަރޭޝަން (އެފްޑީސީ)އިން ހުޅުމާލޭ ދެވަނަ ފިޔަވަހީގައި ތަރައްގީކުރާ 32 ހައުސިން ޓަވަރުގައި ހަދާ 127 ކޮމާޝަލް ޔުނިޓު ދޫކުރަން ތައްޔާރުވެއްޖެއެވެ.
އެ ޕްރޮޖެޓުގެ ތަފުސީލުތައް ހިއްސާކުރަން މިއަދު ބޭއްވި ނޫސްވެރިންގެ ބައްދަލުވުމެއްގައި އެފްޑީސީގެ އޮފިޝަލަކު ވިދާޅުވީ، މި މަޝްރޫއުގެ ދަށުން ޓަވަރުތައް ބަހާފައިވަނީ ހަ ޒޯނަކަށް ކަމަށެވެ. އަދި 580-62،00 އަކަފޫޓާ ދެމެދުގެ ސައިޒްތަކުގެ އެ ޔުނިޓްތައް ހުންނާނީ ހުރިހާ ޓަވަރެއްގެ ގްރައުންޑު ފްލޯއާއި އެއް ވަނަ ފްލޯގައި ކަމަށް އޭނާ ވިދާޅުވިއެވެ.
އޮފިޝަލް ވިދާޅުވީ އެ ޔުނިޓުތައް ހެދުމުގެ މަގުސަދަކީ ޓަވަރުތަކުގައި މީހުން ދިރިއުޅެން ފެށުމުގެ ކުރިން އަސާސީ ޚިދުމަތްތައް ގާއިމުކުރުން ކަމަށެވެ.
އެފްޑީސީން ބުނި ގޮތުގައި، އެ ޔުނިޓުތައް ރީޓެއިލް ފިހާރަތަކާއި ކްލިނިކްތަކާއި ކޮމިއުނިޓީ ސްޕޭސްތަކާއި ރެސްޓޯރަންޓްތަކާއި ކްލިނިކްތަކާއި އޮފީސްތައް ހަދަން ދޫކުރާނެއެވެ.
މިގޮތުން، ޖާގަތައް ދޫކުރާނީ ކޮންމެ ޓަވަރަކުން ގިނަވެގެން ދެ މިނިޓުރޭ ފިހާރައަކަށް ދެވޭ ގޮތަށް އަދި ސިއްޙީ ޚިދުމަތްތައް ދޭ ތަނަކަށް ގިނަވެގެން 10 މިނިޓު ތެރޭ ދެވޭ ގޮތަށް ކަމަށް އެ ކުންފުނިން ބުންޏެވެ.
ޓަވަރެއްގެ ކޮމާޝަލް ޔުނިޓަށް ހާއްސަ ސަރަހައްދު. ޓަވަރުތަކުގައި 127 ޖާގަ ވަނީ ކޮމާޝަލް ބޭނުމަށް ކަނޑައަޅާފައި --- ސަން ފޮޓޯ
އެފްޑީސީން ބުނީ އެ ޔުނިޓުތަކުގެ ދޫކުރުމުގައި އަލަށް ވިޔަފާރި ފަށާ ފަރާތްތަކަށް އިސްކަންދޭނެ ކަމަށެވެ.
އެއާއެކު، އަންނަ ހަފުތާގައި ޒޯން އެކެއްގެ ޔުނިޓުތަކަށް އެޕްލިކޭޝަން ހުޅުވާލަން މަސައްކަތް ކުރާނެ ކަމަށާއި ޒޯން އެކެއްގެ ޓަވަރުތަކުގެ މަސައްކަތް ޖުމްލަކޮށް ނިމިފައިވާ ކަމަށް އޮފިޝަލް ވިދާޅުވިއެވެ.
އެ ޓަވަރުތަކުގައި ކުރަމުން އަންނަނީ ސާވިސް ކުރުމުގެ މަސައްކަތް ކަމަށާއި އެ ޔުނިޓުތައް ވިއްކަން ހަމަޖެހިފައި ވަނީ މާކެޓު ރޭޓުގައި ކަމަށް އޭނާ ވިދާޅުވިއެވެ.
އެފްޑީސީން ތަރައްގީކުރަމުން އަންނަ ޓަވަރުތަކަކީ މިދިޔަ ސަރުކާރުގެ ބޯހިޔާވަހިކަމުގެ ސްކީމްގެ ދަށުން 4،000 ފުލެޓް ދިނުމަށް އަޅާ ޓަވަރުތަކެކެވެ. އެ ފުލެޓުތައް ލިބޭނެ މީހުންގެ ލިސްޓެއް ކުރީ ސަރުކާރުން އިއުލާން ކުރި ނަމަވެސް އެ ލިސްޓުގައި މައްސަލަތަކެއް އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)އިން މައްސަލަ ބެލިއެވެ.
އެއަށްފަހު މި ސަރުކާރުގެ ހައުސިން މިނިސްޓްރީން ވެސް ލިސްޓު މުރާޖާ ކުރަމުން އަންނައިރު، ލިސްޓު ނެރޭނެ ތާރީޚުތަކެއް ދިން ނަމަވެސް އެ ތާރީޚުތަކުގައި ލިސްޓު ނެރެވިފައިނުވެއެވެ. އަދި މިހާރު އެ ލިސްޓު ނެރުން ވަނީ މުއްދަތެއް ނެތް ގޮތަށް ފަސްކޮށްފައެވެ.
މީގެ ކުރިން އެފްޑީސީން ވަނީ، މި އަހަރު ނިމުމުގެ ކުރިން ހުރިހާ ޓަވަރެއްގެ ފިނިޝިން މަސައްކަތް އެއްކޮށް ނިންމާލެވޭނެ ކަމަށް ބުނެފައެވެ.