މިދިޔަ ހޯމަ ދުވަހު 40 އަހަރު ފުރުނު ސައުތު ބަތަލާ ނަޔަންތާރާގެ އުފަންދުވަހާ ގުޅުވައިގެން ވަރަށް މާނަފުން ފިލްމެއްގެ ޓީޒާއެއް ބެލުންތެރިންނަށް ދޫކޮށްލައިފިއެވެ.
"ރައްކައީ"ގެ ނަމުގައި ގެނެސްދޭ މި ފިލްމަކީ އެންމެ އަވަހަށް ބެލުންތެރިންނަށް ނަޔަންތާރާ ފެންނާނެ ފިލްމެވެ. ފިލްމުގައި ނަޔަންތާރާ ކުޅެނީ އަންހެން ދަރިއަކު ސަލާމަތްކުރަން ވެގެން ކޮންމެ ފަދަ ނުރައްކަލަކާ ވެސް ކުރިމަތިލާން ތައްޔާރަށް ހުރި ހިތްވަރު ގަދަ މަންމައެއްގެ ރޯލެވެ.
ފިލްމުގައި ނަޔަންތާރާ ފެންނާނެ ގޮތް ދައްކާލާފައިވާއިރު މި ފިލްމަށް ގިނަ ބަޔަކު އަންނަނީ އިންތިޒާރު ކުރަމުންނެވެ.
ސައުތު ޑައިރެކްޓަރު ސެންތިލްގެ މި ފިލްމު ބެލުންތެރިންނަށް ގެނެސްދޭން ނިންމާފައިވާ ތާރީޚެއް ރަސްމީކޮށް އިއުލާނުކޮށްފައިނުވާއިރު ފިލްމު ގެނެސްދޭން ނިންމާފައިވަނީ އިންޑިއާގައި އާއްމުކޮށް ވާހަކަދައްކާ އުޅޭ ހުރިހާ ބަހުރުވައަކުންނެވެ.
ބޮލީވުޑްގެ ފިލްމު "ޖަވާން"ގައި ބަތަލާ ނަޔަންތާރާ ޝާހްރުކް ޚާންއާ އެކު--ފޮޓޯ/ފޭސްބުކް
ނަޔަންތާރާ އެންމެ ފަހުން ބެލުންތެރިންނަށް ފެނިފައިވަނީ މިދިޔަ އަހަރު ރިލީޒްކުރި ފިލްމު "އަންނަޕޫރަނީ: ދަ ގޯޑެސް އޮފް ފުޑް"އިންނެވެ. ފިލްމު "ޖަވާން"އިން ބޮލީވުޑަށް ތައާރަފުވެފައިވާ ބަތަލާގެ ފިލްމީ ކެރިއަރުގެ ވާހަކަ ކިޔައިދޭ ޚާއްސަ ޑޮކިއުމެންޓްރީއެއް މި މަހުގެ 18 ވަނަ ދުވަހު ނެޓްފްލިކްސްގައި ޕްރީމިއާކޮށްފައިވާއިރު ވަރަށް ގިނަ ބަޔަކު އަންނަނީ ނަޔަންތާރާއަށް މަރުހަބާގެ މެސެޖުތައް ފޮނުވަމުންނެވެ.
މި ޑޮކިއުމެންޓްރީ ފިލްމުގައި ނަޔަންތާރާގެ ހަޔާތާ ގުޅޭގޮތުން މިހާތަނަށް ބެލުންތެރިންނަށް ފެނިފައިނުވާ މަންޒަރުތަކާ ވާހަކަތަކެއް ހިމަނާފައިވާ ކަމަށް ރިޕޯޓުތައް ބުނެއެވެ. ހަމައެއާ އެކު ބަތަލާގެ ކައިވެނީގެ ރަސްމިއްޔާތުގައި އާއްމުނުކުރާ ވަރަށް ގިނަ ވީޑިއޯ ކްލިޕްތައް މި ޑޮކިއުމެންޓްރީ ފިލްމުން ފެންނާނެ ކަމަށް ރިޕޯޓުތައް ބުނެއެވެ.