ރައްޔިތުންގެ މަޖިލީހުގެ މެންބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރަން މިއަދު ހުށަހެޅި ބިލު، އިދިކޮޅު އެމްޑީޕީން އިހުތިޖާޖު ކުރަމުން ދަނިކޮށް މަޖިލީހުން މިއަދު ފާސްކޮށްފިއެވެ.
ސަރުކާރުގެ ފަރާތުން މި އިސްލާހުތައް ގާނޫނުއަސާސީގައި ހިމަނަން ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
ސަރުކާރުން ވަނީ މައިގަނޑު ތިން ކަމެއް ގާނޫނުއަސާސީގައި ހިމަނަން މިއަދު ހުށަހަޅުއްވާފައެވެ. އެއީ؛
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން - ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
- ގާނޫނުއަސާސީއަށް އިޞްލާޙެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ޤާނޫނަކުންނެވެ. އެއީ، 70 މެންބަރުންނެވެ.
މި ބިލަކީ މަޖިލިސް މެންބަރުންގެ ޖުމްލަ އަދަދުގެ ހަތަރުބައިކުޅަ ތިންބައި މެންބަރުންގެ އަގުލަބިއްޔަތުން ފާސްވާ ބިލަކަށްވުމާ އެކު، ރިޔާސަތަށް ވޯޓުގައި ބައިވެރިވެވޭނެކަން މަޖިލިސް ރައީސް އަބްދުއްރަހީމް އަބްދުﷲ ވަނީ އިއުލާން ކުރައްވައިފައެވެ.
މި އިސްލާހު މުޅި މަޖިލީހުގެ ކޮމިޓީން މިއަދު ފާސްކޮށްފައިވަނީ ވެސް 75 މެންބަރުންގެ ތާއީދާ އެކުގައެވެ.
އަވަސް އަރުވާލައިގެން ގާނޫނުއަސާސީ އިސްލާހުކުރާ ކަމަށް ބުނެ، އިދިކޮޅު އެމްޑީޕީން ވަނީ މި ބިލުގެ މަސައްކަތް ކުރިޔަށް ގެންދިޔަނުދިނުމަށް ޓަކައި ތަޅުމުގައި އަޑުގަދަކޮށް މަސައްކަތަށް ހުރަސް އެޅުމަށް ވެސް މަސައްކަތް ކޮށްފައެވެ.
މިއަދުގެ ޖަލްސާގައި މަޖިލީހުގެ ރައީސް އަބްދުއްރަހީމް: ސަރުކާރުގެ ފަރާތުން ގާނޫނުއަސާސީ އިސްލާހުކުރަން ހުށަހެޅި ބިލް ވަނީ 75 މެންބަރުންގެ ތާއިދާއެކު ފާސްކޮށްފައި -- ފޮޓޯ/ މަޖިލިސް
އެހެން ނަމަވެސް ރިޔާސަތުން ވަނީ އެ ބިލު މުޅި މަޖިލީހުގެ ކޮމިޓީން ދިރާސާކޮށް ނިންމި ގޮތަށް ފާސްކުރުމަށް ވޯޓަށް އަހައިފައެވެ. އެއީ މުޅި މަޖިލީހުގެ ކޮމިޓީން އިސްލާހު ފާސްކޮށް ނިންމި ގޮތުގެ ރިޕޯޓަށް އެމްޑީޕީ މެންބަރު މީކާއީލް އަހުމަދު ނަސީމް އިސްލާހެއް ހުށަހެޅުއްވި ނަމަވެސް އެ އިސްލާހު ބޭރުކޮށްލުމަށް ފަހުގައެވެ.
އޭނާ ހުށަހެޅުއްވި އިސްލާހުގައިވަނީ ރައްޔިތުންގެ މަޖިލީހުގެ މެންބަރުކަމުން ވަކިވާނެ ހާލަތްތައް ބަޔާންކޮށްފައެވެ. އޭގެ ތެރޭގައި ހިމެނެނީ:
- ސިޔާސީ ޕާޓީއެއްގެ މެންބަރެއްގެ ހައިސިއްޔަތުން މަޖިލީހަށް އިންތިޚާބުވެފައިވާ މެންބަރެއްގެ އަމިއްލަ އިސްނެގުމަށް އޭނާ އިންތިޚާބުވީ ޕާޓީއަކުން ވަކިވުން ނުވަތަ އެހެން ސިޔާސީ ޕާޓީއަކަށް ބަދަލުވުން
އަމިއްލަ ގޮތުން އިންތިޚާބުވެފައިވާ މެންބަރަކު ސިޔާސީ ޕާޓީއެއްގެ މެންބަރަކަށްވުން - އެ މީހަކު މަޖިލީހަށް އިންތިޚާބުވެފައިވަނީ ސިޔާސީ ޕާޓިއެއްގެ މެންބަރެއްގެ ހައިސިއްޔަތުން ކަމަށް ވެފައި، ޕާޓީގެ ނިންމުމާ ޚިލާފަށް މަޖިލީހުން ނުވަތަ ކޮމިޓީއެއްގައި ނިންމާ ނިންމުމަށް ވޯޓު ދިނުމުގެ ސަބަބުން ޕާޓީގެ އަސާސީ ގަވާއިދާ އެއްގޮތަށް ޕާޓީން ވަކިކުރެވޭނީ އޭނާ އިންތިޚާބު ކުރުމަށް ވޯޓުދިން މީހުންގެ އަޣުލަބިއްޔަތުން ކަމަށް ނިންމުން
- މެންބަރަކު މަގާމުން ވަކި ކުރުމަށް އޭނާ އިންތިޚާބުކުރުމަށް ވޯޓުދިނުމުގެ ހައްގު ލިބިފައިވާ މީހުންގެ 25 އިންސައްތަ ސޮއިކޮށް މަޖިލީހަށް ޕެޓިޝަނެއް ހުށަހަޅައި، ކޮމިޓީން ދިރާސާކޮށް، ދާއިރާގެ އާންމު މެންބަރުންގެ ވޯޓެއް ނެގުން
މީކާއީލް ހުށަހެޅުއްވި އިސްލާހުގައިވާ ގޮތުން ޕާޓީން ވަކިކުރި މެންބަރު، މަގާމުގައި ބެހެއްޓުމަށް ދާއިރާގެ ރައްޔިތުންގެ މެދުގައި ފެންނަ ނުފެންނަ ވޯޓެއް ނަގައި، އެ ވޯޓުން ފާސްވެއްޖެނަމަ، މެންބަރު އެ ވަގުތުން ފެށިގެން މަގާމުން ވަކިވާނެއެވެ. އެހެން ނަމަވެސް އެ ގޮތަށް ދާއިރާ ރައްޔިތުންގެ މެދުގައި ނަގާ ވޯޓުން ފާސްނުވެއްޖެނަމަ، އެ މެންބަރަކު ދައުރުގެ ބާކީ ބައިގައި ހުންނާނީ ވަކި ޕާޓީއަކަށް ނިސްބަތްނުވާ އަމިއްލަ މެންބަރެއްގެ ގޮތުގައެވެ.
މި އިސްލާހަށް ވަނީ ކަނޑިތީމު ދާއިރާގެ އެމްޑީޕީ މެންބަރު އަމީން ފައިސަލް ތާއީދު ކުރައްވައިފައެވެ.
މި އިސްލާހު ބަލައިގަތުމަށް ވޯޓު ދެއްވީ 13 މެންބަރުން އެކަންޏެވެ. އަދި 77 މެންބަރުންގެ އަޣުލަބިއްޔަތުން ފާސްވީ އެ އިސްލާހު ބަލައިނުގަތުމަށެވެ.
އެއަށްފަހު ކޮމިޓީން ފާސްކުރި ގޮތަށް ބިލަށް ވޯޓަށް އެހުމުން، 75 މެންބަރުންގެ ތާއީދާ އެކުވަނީ އެ ބިލު ފާސްކޮށްފައެވެ. އެ ބިލާ ދެކޮޅަށް ވޯޓު ދެއްވީ 13 މެންބަރުންނެވެ.
މި މައްސަލައިގައި މިއަދު މެންދުރުފަހު އެމްޑީޕީންވަނީ މަޖިލިސް އިދާރާ ސަރަހައްދުގައި އިހުތިޖާޖު ވެސް ކޮށްފައެވެ.