އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ޖުމްހޫރީ ޕާޓީގެ ލީޑަރު، ރައްޔިތުން މަޖިލީހުގެ މާމިގިލީ ދާއިރާގެ މެންބަރު ގާސިމް އިބާރާހީމްގެ ނަމުގައި ސްކޭމެއް ހިންގާތީ އެ ކަމާ ސަމާލުވުމަށް ގާސިމް މިއަދު އެދިވަޑައިގެންފިއެވެ.
ވިޔަފާރިވެރިޔާ ގާސިމް އެކްސްގައި ކުރެއްވި ޕޯސްޓެއްގައި ވިދާޅުވީ، ސޯޝަލްމީޑިއާގެ އެކި މަންސަތަކުގައި ފޮޓޯއާއި ވީޑިއޯ ބޭނުންކޮށްގެން އޭއައިގެ އެހީގައި ހަދާފައިވާ ވީޑިއޯއެއް ދައުރުކުރާ ކަމަށެވެ.
މިގޮތުން، އޯޑިއޯ ވެސް ހިމެނޭ އެ ވީޑިއޯތަކުގައި އެކި ކަހަލަ އޮފްޝޯ ޓްރޭޑުކުރުމަށާއި އިންވެސްޓުކޮށްގެން އަވަހަށް ނަފާ ލިބޭނެ ފަދަ މާލީ މުއާމަލާތްތަކުގެ ފުރުސަތު އޭނާ ދިވެހީންނަށް ހޯއްދަވައިދެއްވާ ކަމަށް ދައްކުވައިދީފައި ހުންނަ ކަމަށް ގާސިމް ވިދާޅުވިއެވެ.
ގާސިމް: އޭއައިން ހަދާފައިވާ ގާސިމްގެ ސްކޭމްތަކެއް ދައުރުކުރާތީ އެކަމަށް ސަމާލުވާން އެދެފި --- ސަން ފޮޓޯ/ މާހިލް އާތިފް
ރާއްޖޭގެ ގައުމީ ބޭންކު މެދުވެރިވެ، އެ ސްކީމުގެ ފައިދާ ހަމަޖެހޭނެ ކަމަށް ބަޔާންކޮށް، އޭނާގެ ނަމުގައި ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންގެ ތެރެއިން ބަޔަކަށް އޮޅުވާލައިގެން ޒަމާނީ ގޮތެއްގައި ސްކޭމް ކުރުމަށް ހިންގަމުންދާ ދަށު ދަރަޖައިގެ އަމަލެއްގެ ގޮތުގައި އޭނާ ވަނީ ސިފަކުރައްވާފައެވެ.
މީގެ އިތުރުން، މި ވީޑިއޯތައް ފަތުރަމުން ދަނީ އިންސްޓަގްރާމާއި ފޭސްބުކް އަދި ޚާއްސަކޮށް ޓިކްޓޮކްގައި ކަމަށްވާއިރު، މިފަދަ އެއްވެސް ސްކޭމެއްގައި ޖެހިވަޑައިނުގަތުމަށް ގާސިމް ވަނީ ރައްޔިތުންގެ ކިބައިން އެދިވަޑައިގެންފައެވެ.
އެއްވެސް ބޭފުޅަކު މި ދެންނެވިފަދައިން އާޓިފިޝަލް އިންޓެލިޖެންސް މެދުވެރިކޮށް ތައްޔާރުކޮށްފައި ހުންނަ ހަޤީޤަތެއް ނެތް ވީޑިއޯ ކްލިޕް ފަދަ ތަކެތި ސޯޝަލް މީޑިއާގެ އެކި މަންސަތަކާއި، އެކި ވައިބާ ގްރޫޕްތަކާއި، ވަޓްސްއެޕް ގްރޫޕްތަކުގައި، ޝެއާކޮށް ހެދުމުން ދުރުވެވަޑައިގަތުމަކީ ވެސް އަޅުގަނޑުގެ ވަރަށް ބޮޑު އެދުމެކެވެ،ގާސިމް އިބްރާހިމް
ގާސިމް ވިދާޅުވީ، މިފަދަ ބައެއް ވީޑިއޯތަކަކީ ހަގީގަތެއް ކަމަށް ހީކޮށް، ބައެއް ފަރާތްތަކުން އޭނާއަށް ވެސް އެފަދަ ކްލިޕްތައް ފޮނުވާ ކަމަށެވެ. އެކަމަކު، އެއީ ހަގީގަތެއް ނޫން ކަމަށް އޭނާ ތަކުރާރުކޮށް ވިދާޅުވިއެވެ.
އެކި ގޮތްގޮތުން މަކަރާއި ހީލަތް ހަދައިގެން ފޭރުމުގެ މައްސަލަތައް މީގެ ކުރިން ވަނީ ސޯޝަލް މީޑިއާއަށް ފެންމަތިވެފައެވެ. މިދިޔަ މަހު ވަނީ މޯލްޑިވްސް ޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލްގެ ނަމުގައި ސްކޭމް ކޯލްތަކެެއް ކުރާތީ އެކަމަށް ސަމާލުވުމަށް މެނޭޖިން ޑިރެކްޓަރު ޝަކީލް ވެސް އެދިވަޑައިގެންނެވިއެވެ.