ރާއްޖެއަކީ ދުރުވިސްނޭ ހަރުދަނާ ގައުމެއްކަން ރައީސް ޑރ. މުޙައްމަދު މުއިއްޒު ސާބިތުކޮށްދެއްވައިފި ކަމަށް ރައްޔިތުން މަޖިލީހުގެ މާމިގިލި ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެއެވެ.
އދ. އާންމު މަޖިލީހުގެ 79ވަނަ ބައްދަލުވުމުގައި ރައީސް މުއިއްޒު ދެއްވި ތަގުރީރަށް ތައުރީފު ކުރައްވައި، ގާސިމް އެކްސްގައި ކުރެއްވި ޕޯސްޓެއްގައި ވިދާޅުވީ، ޖިއޮގްރަފީ ގޮތުން ރާއްޖެ ކުޑަ ނަމަވެސް، މީގެ ކުރިން ވެސް އދ. ގެ އާންމު މަޖިލީހުގެ ސެޝަންތަކުގައި ބައެއް ވެރިން ބައިވެރިވެވަޑައިގެން، ރާއްޖެއަށް ކުރިމަތިވާ ގޮންޖެހުންތަކާ ގުޅޭ ގޮތުން އަޑު އުފުއްލަވާފައިވާ ކަމަށެވެ.
ގާސިމް ވަނީ ރާއްޖެ ތަމްސީލުކޮށްދެއްވުމަށް ރައީސް ކުރެއްވި މަސައްކަތްޕުޅަށް ޝުކުރު އަދާކުރައްވާފައެވެ.
"މި ލޮބުވެތި ޤައުމަކީ ފަޚުރުވެރި، ކެރޭ، ހަރުދަނާ، ދުރުވިސްނޭ، ޢިލްމާއި ހުނަރު ލިބިފައިވާ، ތަރައްޤީއަށް އުންމީދު ކުރާ ތަޞައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ޤައުމެއްކަން، ރައީސް ޑރ މުޢިއްޒު އެވަނީ ވަރަށް ސާބިތު ކަމާއި އެކު ދައްކުވައިދެއްވާފައެވެ." ގާސިމް ވިދާޅުވިއެވެ.
ގާސިމް ވާހަކަ ދައްކަވަނީ: ވިދާޅުވީ ރާއްޖެއަކީ ދުރުވިސްނޭ ގައުމެއްކަން ރައީސް ސާބިތުކޮށްދެއްވައިފި ކަމަށް --- ފޮޓޯ: ޖޭޕީ
މީގެއިތުރުން، ގާސިމް ވަނީ، އދ.ގައި ރައީސް ދެއްވި ތަގުރީރަށް ދުނިޔޭގެ ސަމާލުކަން ލިބުނު ކަން ފާހަަގަކުރައްވާފައެވެ.
ނުސީދާކޮށް، ކުރީގެ ރައީސް އަބްދުﷲ ޔާމީން އަބްދުލް ޤައްޔޫމަށް އިޝާރާތްކުރައްވައި، ގާސިމް ވިދާޅުވީ، ސަރުކާރުގެ އިދިކޮޅު ފަރާތްތަކަށް ވެރިކަމުގެ ފަސް އަހަރުގެ ދައުރެއް ލިބިވަޑައިގެން ނަމަވެސް، އދ.ގައި ރާއްޖެ ތަމްސީލުކޮށްލަން ކެރިވަޑައިނުގަތްކަމަށެވެ. އެފަދަ ބޭފުޅަކަށް ރައީސް މުއިއްޒުގެ ތަގުރީރު އޮޅުން ފިލާވަޑައިނުގަތް ކަމަށްވިޔަސް ދުނިޔޭގެ ބޮޑެތި މީޑިއާތަކުގެ 'ފަލަ' ސުރުޚީގައި އެމަނިކުފާނުގެ ތަގުރީރު ހިމެނިފައިވާ ކަމަށެވެ.
ރައީސް މުއިއްޒަކީ އދ.ގެ ސަލާމަތީ މަޖިލީހުގެ ތަޅުމުގައި ތަގުރީރު ކުރެއްވި ރާއްޖޭގެ ފުރަތަމަ ރައީސްކަން ފާހަގަކުރައްވައި ގާސިމް ވިދާޅުވީ، އެ މަޖިލީހުގައި ކުރިއަށް ދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ ޗެއާއެއްގެ ހައިސިއްޔަތުން މުހިންމު ރޯލެއް އެމަނިކުފާނު އަދާކުރައްވާފައިވާ ކަމަށެވެ.
ރައީސް ޑރ. މުހައްމަދު މުއިއްޒާއި ގާސިމް އިބްރާހިމް ސަލާމްކުރައްވަނީ:ރާއްޖެއަކީ ދުރުވިސްނޭ ގައުމެއްކަން ރައީސް ސާބިތުކޮށްދެއްވައިފި ކަމަށް ގާސިމް ވިދާޅުވޭ -- ފޮޓޯ/ ރައީސް އޮފީސް
އެއާއެކު، އދ.ގައި އެމަނިކުފާނު ތަގުރީރު ކުރެއްވި މައުޟޫތަކަށް ގާސިމް ވަނީ އަލިއަޅުއްވާލައްވާފައެވެ. އެގޮތުން، ދިވެހި ގައުމުގެ ވިންދާ ގުޅިފައިވާ ފަލަސްތީނު މައްސަލާގައި އިސްރާއިލުން ހިންގަމުންދާ ޖަރީމާތައް ކުށްވެރިކުރައްވާ ދެއްކެވި ވާހަކަފުޅު އެކި ގައުމުތަކުން ބަލައިގަތީ ވަރަށް ބޮޑު ތަރުހީބަކާއެކުގައި ކަމަށް ގާސިމް ވިދާޅުވެފައިވެއެވެ.
"2040 ގައި ދިވެހިރާއްޖޭގެ މިނިވަންކަމަށް 75 އަހަރު ފުރޭއިރު، އެ ދުވަސް އަންނަންވާއިރު ދިވެހިރާއްޖެއަކީ، ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި އޮތުމަށް މާދަމާއަށް ޓަކައި އެމަނިކުފާނު ކުރައްވާ ތަޞައްވަރުތައް މުޅި ދުނިޔޭގެ ކުރިމަތީގައި ހާމަކޮށްދެއްވާ، މި ދިވެހިފަސްގަނޑާއި، ރައްޔިތުންނާ މެދު ތިޔަ ދައްކުވައިދިން ފަޚުރުވެރި ނަމޫނާއަށް ޓަކައި، މަނިކުފާނަށް އަދިވެސް އެއްފަހަރު ހިތުގެ އިޚްލާޞްތެރި ތަހްނިޔާއާއި ޝުކުރު އަދާކުރަމެވެ." އެ ޕޯސްޓުގައި ބުނެފައިވެއެވެ.
ރައީސް މުޢިއްޒު އދ. ގެ އާންމު މަޖިލީހުގެ 79ވަނަ ބައްދަލުވުމުގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު، މިއަދު ވަނީ މާލެއަށް ވަޑައިގެންފައެވެ.