ބޭރުފައިސާއާ ބެހޭ ގަވާއިދަށް ގެނައި ބަދަލާ ގުޅިގެން އުފެދިފައިވާ ގޮންޖެހުންތަކަށް ހައްލު ހޯދުމަށް ޓަކައި ސަރުކާރުން އެ ވިޔަފާރިވެރިންނާއެކު މަޝްވަރާކޮށްގެން ކުރިޔަށް ދިއުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ ޕީއެންސީ މެންބަރު އަހުމަދު ތޯރިގު (ޓޮމް) މިރޭ ގޮވާލައްވައިފިއެވެ.
ބޭރުފައިސާއާ ބެހޭ ގަވާއިދުގެ ދަށުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިންވަނީ ޓޫރިޒަމް ދާއިރާގެ ވިޔަފާރިތަކުން ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުކޮށްފައެވެ.
މި ކަމާ ގުޅިގެން ވިޔަފާރިވެރިން ކަންބޮޑުވުން ފާޅުކުރަމުންދަނިކޮށް، ސަރުކާރަށް އަހަރުފުރުން ފާހަގަ ކުރުމަށް ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވަނީ އެމްއެމްއޭގެ ގަވާއިދު ބަދަލުނުކުރާނެ ކަމަށް ހަރު އަޑުން ތަކުރާރުކޮށް ވިދާޅުވެފައެވެ.
ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ތޯރިގު އެދިވަޑައިގަތީ ބޭރުފައިސާއާބެހޭ ގާނޫނަށް ގެނައި އިސްލާހާ ގުޅިގެން އުފެދިފައިވާ ޚިޔާލު ތަފާތުވުންތަކުގެ ތެރެއިން، ރާއްޖޭގެ ބޮޑެތި ވިޔަފާރިވެރިންނަށް ސިޔާސީ ގޮތުން މަލާމާތްކޮށް ފުރައްސާރަ ނުކުރުމަށެވެ. އިގުތިސާދީ ގޮތުން ދަތި މި ދަނޑިވަޅުގައި އެ ވިޔަފާރިވެރިންނާއެކު މަޝްވަރާކޮށްގެން މި ކަމުގައި ހައްލެއް ހޯދޭނެ ކަމަށް ގަބޫލު ކުރައްވާ ކަމަށް އޭނާ ވިދާޅުވިއެވެ.
"...އަޅުގަނޑު އުންމީދުކުރަނީ، ސަރުކާރުން ވިޔަފާރިވެރިންނާ ވާހަކަ ދައްކައިގެން ފޮރިން އެކްސްޗޭންޖުގެ މި މައްސަލައަށް ހައްލެއް ހޯދޭނެ ކަމަށް" ތޯރިގު ވިދާޅުވިއެވެ.
ބޭރުފައިސާއާބެހޭ ގަވާއިދު އޮތް ގޮތުން ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން މާރުކުރަން މަޖުބޫރުވާނެއެވެ. އަދި ގެސްޓު ހައުސްތަކަށް އަންނަ ކޮންމެ ފަތުރުވެރިއަަކަށް 25 ޑޮލަރު މާރުކުރަން މަޖުބޫރުވާނެއެވެ.
މި ގަވާއިދަށް އެއްބާރުލުން ދީގެން ފަތުރުވެރިކަމުގެ ޚިދުމަތްދޭ ފަރާތްތަކުން ޑޮލަރު މާރުކޮށްފި ނަމަ، ކުރިއަށްއޮތް ތަނުގައި ރައްޔިތުންނަށް ބޮޑެތި ފައިދާތަކެއް ލިބޭނެ ކަމަށް ރައީސް ވިދާޅުވެފައިވެއެވެ. އެ ގޮތުން މިހާރު ރާއްޖޭން ބޭރަށް ފުރާ ދިވެހީންނަށް ގަންނަން ލިބޭ 500 ޑޮލަރު، 2026ގެ ފުރަތަމަ ކުއާޓަރާ ހަމަޔަށް 1،000 ޑޮލަރަށް ބޮޑުކޮށްދިނުމުގެ ފުރުސަތު ސަރުކާރަށް ލިބޭނެކަމަށް އެ މަނިކުފާނު ވިދާޅުވިއެވެ.
މީގެ އިތުރުން ރައީސް ފާހަގަކުރެއްވި ކަންކަމުގެ ތެރޭގައި، 2026ވަނަ އަހަރުގެ ފުރަތަމަ ކުއާޓަރުގެ ތެރޭގައި ކްރެޑިޓް ކާޑުގެ ލިމިޓު 1400އަށް ބޮޑުކުރުމާއި ވިޔަފާރިވެރިންނަށް ތަކެތި އިމްޕޯޓު ކުރުމަށް ދޭ ޓީޓީ ބޮޑުކުރުން ވެސް ފާހަގަކުރެއްވިއެވެ.
އެމްއެމްއޭއިން ބުނި ގޮތުގައި އެންމެ ރިޒޯޓެއް ފިޔަވައި އެހެން ހުރިހާ ރިސޯޓަކުންވަނީ ބޭރުފައިސާއާބެހޭ ގަވާއިދުގެ ދަށުން ރަޖިސްޓަރީ ވެފައެވެ.