ޤަތުލުއާންމުތަކަށް މަގުފަހިކޮށްދިން ކަމަށް ތުހުމަތުކޮށް ބަންގްލަދޭޝް ކުރީގެ ސަރުކާރުގެ މަތީ ފެންވަރުގެ 13 އޮފިޝަލަކަށް ދައުވާކޮށްފިއެވެ.
އޭގެތެރޭގައި ކުރީގެ 11 ވަޒީރުންނާއި ފަޑިޔާރެއް އަދި ކުރީގެ ސަރުކާރުގެ ސެކްރެޓަރީއެއްވެސް ހިމެނެއެވެ.
ބަންގްލަދޭޝްގެ ކުރީގެ ބޮޑު ވަޒީރު ޝައިޚް ޙަސީނާގެ ވެރިކަމުގައި މުޒާހަރާތަކުގައި ބައިވެރިވި އާންމުންގެ ތެރެއިން 700 އަށްވުރެ ގިނަ މީހުން މަރާލިކަމުގެ ތުހުމަތު ހަސީނާއަށާއި އެ ސަރުކާރުގެ އިސް ފަރާތްތަކަށް ވަނީ ކޮށްފައެވެ. އޭގެތެރެއިން ގިނަ ބަޔަކު ވަނީ ހަސީނާގެ ވެރިކަން ވެއްޓުމާއެކު ހައްޔަރުވެސްކޮށްފައެވެ. އެކަމަނާގެ ސިޔާސީ އިދިކޮޅު ފަރާތްތައް ގިނަ އަދަދަކަށް ބަންދުކޮށް، ޝަރީއަތުން ބޭރުން މަރާލާފައިވާ ކަމަށްވެސް ގިނަ ބަޔަކު ތުހުމަތުކުރެއެވެ.
"އަޅުގަނޑުމެން މިއަދު ދައުވާ ލިބޭ 13 މީހުން ހާޒިރުކޮށްފިން، އޭގެ ތެރޭގައި ކުރީގެ 11 ވަޒީރުންނާއި ބިއުރޯކްރެޓަކާއި ފަނޑިޔާރަކު ހިމެނޭ." ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލްގެ ޗީފް ޕްރޮސެކިއުޓަރު މުޙައްމަދު ތާޖުލް އިސްލާމް ނޫސްވެރިންނާ ވާހަކަ ދައްކަވަމުން ވިދާޅުވިއެވެ.
"އެމީހުންނަކީ ރޭވުމުގައި ބައިވެރިވުމާއި، އަނިޔާވެރިކަމަށް ބާރުއެޅުމާއި، ގާނޫނު ތަންފީޒުކުރާ އޮފިސަރުންނަށް ބަޑިޖަހަން އަމުރުކުރުމާއި، ނަސްލު ނައްތާލުމަށް ބައިވެރިވި ބައެއް." އިސްލާމް ވިދާޅުވިއެވެ.
ކޯޓަށް ހާޒިރުކުރި މީހުންގެ ތެރޭގައި އިން ހަމައެކަނި އަންހެނަކީ ސޯޝަލް އެފެއާޒް މިނިސްޓަރު ދީޕޫ މޯނީ ކަމަށް ނޫސްތަކުން ރިޕޯޓުކޮށްފައިވެއެވެ.
ކުރީގެ އިސް އޮފިޝަލުންގެ އިތުރުން މީހުން މެރުމާއި އިންސާނިއްޔަތާ ޚިލާފު އެކި އަމަލުތައް ހިންގުމުގެ ދައުވާގައި ހަސީނާ ކޯޓަށް ހާޒިރުކުރުމުގެ މަސައްކަތްވެސް ބަންގްލަދޭޝް ސަރުކާރުން އަންނަނީ ކުރަމުންނެވެ.
އެގޮތުން މިހާރުވެސް ވަނީ އުމުރުން 77 އަހަރުގެ ހަސީނާ ހައްޔަރުކުރުމުގެ އަމުރެއް ނެރެފައެވެ. ހަސީނާ އެންމެ ފަހުން ފެނިފައިވަނީ އޭނާގެ ރަސްމީ ގެޔަށް މުޒާހަރާގެ ބައިވެރިން ވަދެގަންނަން އުޅުނު ވަގުތު ހެލިކޮޕްޓަރެއްގައި ވަޑައިގެން އިންޑިއާގެ ސަރަހައްދަކަށް ފައިބައިވަޑައިގަންނަވަނިކޮށެވެ.
ބަންގްލަދޭޝްގެ ވަގުތީ ރައީސް ޔޫނުސް ވިދާޅުވީ މިވަގުތު އެންމެ ބޮޑު އަމާޒަކީ ހަސީނާގެ ވެރިކަން ނިމުމަކަށް ގެނައި މުޒާހަރާތައް ހުއްޓުވަން އަނިޔާވެރި އަމަލުތައް ހިންގި މީހުންނަށް ހައްގު އަދަބު ދިނުން ކަމަށެވެ.
ނޯބެލް ސުލްހައިގެ އިނާމު ހާސިލްކޮށްފައިވާ އުމުރުން 84 އަހަރުގެ ޔޫނުސް ސަރުކާރުގެ "ޗީފް އެޑްވައިޒަރު"ގެ މަގާމަށް ހަމަޖެއްސީ ހަސީނާގެ 15 އަހަރުގެ ވެރިކަން ނިމުނުތާ ދުވަސްތަކެއް ފަހުން، އޮގަސްޓް މަހުގެ ނުވަ ވަނަ ދުވަހު އެވެ.
މި މަހު ކުރީކޮޅު ބަންގްލާދޭޝް އިން ވަނީ ހައްޔަރުކުރަން ބޭނުންވާ މީހުން ހޯދަން އިންޓަޕޮލްގެ ރެޑް ނޯޓިސް ނެރުމަށް އެދޭނެ ކަމަށް ވެސް ބުނެފައެވެ.
އިންޑިއާއަކީ ވެސް އިންޓަޕޮލްގެ މެންބަރު ގައުމެކެވެ. ނަމަވެސް ރެޑް ނޯޓިސް ނެރުނަސް ހަސީނާ ހައްޔަރުކޮށް ބަންގްލާދޭޝްއާ ހަވާލުކުރަން އިންޑިއާއަށް ލާޒިމެއް ނުވާނެއެވެ.
މެމްބަރު 196 ގައުމުގެ މެދުގައި ފުލުހުން ގުޅިގެން މަސައްކަތްކުރުމަށް ހަދާފައިވާ އޮންނަ އިންޓަޕޮލްގެ އުސޫލު އޮންނަ ގޮތުން ރެޑް ނޯޓިސް ނެރެފައި އޮތަސް މީހަކު ހައްޔަރުކުރާއިރު އެ ގައުމެއްގެ ގާނޫނުތަކަށް ވެސް ތަބާވާން ޖެހެއެވެ.