މި އަހަރު ރިލީޒްކުރަން ތައްޔާރުވަމުން އަންނަ އެންމެ އުންމީދީ ފިލްމު "ޕުޝްޕާ 2" ރިލީޒްކުރުމުގެ 17 ދުވަސް ކުރިން ފިލްމުގެ އެޑްވާންސް ބުކިންއިން އެއް މިލިއަން ޑޮލަރުގެ އާމްދަނީއެއް ލިބިއްޖެއެވެ.
ފިލްމުގެ އެޑްވާންސް ބުކިން އެމެރިކާގެ ގިނަ ބަޔަކު ހައްދާފައިވާއިރު އެމެރިކާގެ އެކި ސަރަހައްދުތަކުން ފިލްމުގެ 37،000 ޓިކެޓު ވަނީ ވިކިފައެވެ. އެމެރިކާގެ 850 އެއްހާ ސަރަހައްދުން ފިލްމުގެ އެޑްވާންސް ބުކިން ހައްދާފައިވާއިރު ހަމައެކަނި އެމެރިކާއިން ފިލްމަށް ލިބޭނެ އާމްދަނީގެ އަދަދު އެއް މިލިއަން ޑޮލަރަށް ވުރެ މަތިވެދާނެކަމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.
މިހާތަނަށް އެޑްވާންސް ބުކިން ހެދުން ހަމައެކަނި ހުޅުވާލީ އެމެރިކާގައި ކަމަށާއި ވަރަށް އަވަހަށް އިތުރު މާކެޓްތަކަށް ފިލްމުގެ އެޑްވާންސް ބުކިން ހެދުމަށް ހުޅުވާލާނެ ކަމަށް ޕިންކްވިލާގައި ވަނީ ބުނެފައެވެ. މި ފިލްމުގެ ޓްރެއިލާ އިއްޔެގެ ވަގުތެއްގައި ރިލީޒްކޮށް އާއްމުކޮށްފައިވާއިރު ފިލްމަށް ގިނަ ބަޔަކު އަންނަނީ އިންތިޒާރު ކުރަމުންނެވެ.
ފިލްމު "ޕުޝްޕާ 2"ގެ ބަތަލާ ރަޝްމިކާ--ފޮޓޯ/ޕިންކްވިލާ
އަންނަ މަހުގެ ފަސްވަނަ ދުވަހު ސިނަމާތަކަށް ގެންނަން ތާވަލުކުރެވިފައި އޮތް "ޕުޝްޕާ: ދަ ރޫލް"އަކީ މަޝްހޫރު ތެލުގޫ އެކްޓަރު އައްލޫ އަރުޖުން ލީޑް ރޯލް ކުޅެ 2021ވަނަ އަހަރު ގެނެސްދިން ފިލްމު "ޕުޝްޕާ"ގެ ދެވަނަ ފިލްމެވެ.
އައްލޫ އަރުޖުންއާ އެކު ފިލްމުން ފެންނާނީ ސައުތު ސިނަމާގެ މަޝްހޫރު ބަތަލާ ރަޝްމިކާ މަންދަންނާއެވެ. ފިލްމުގެ ޓްރެއިލާ ބެލުމަށް ފަހު ފިލްމު އިންޑަސްޓްރީގެ ޓްރޭޑް އެނަލިސްޓުން ބުނެފައިވަނީ ފުރަތަމަ ފިލްމަށްވުރެ ދެވަނަ ފިލްމަށް އާއްމުންގެ ފަރާތުން ބޮޑު ތަރުހީބެއް ލިބޭނެ ކަމަށް ބެލެވޭ ކަމުގައެވެ.
އިންޑިއާގައި ވާހަކަދައްކާ އުޅޭ މައިގަނޑު ހުރިހާ ބަހަކުން މި ފިލްމު ގެނެސްދޭން ވަނީ ނިންމާފައެވެ.