ރޮލެކްސް ބްރޭންޑުގެ ގަޑިއެއް ހިމެނޭހެން އަގުބޮޑެތި ސާމާނުތަކެއް ވަގަށް ނެގި މީހަކު އެއް އަހަރާއި ހަ މަސްދުވަހަށް ޖަލަށް ލައިފިއެވެ.
މި މައްސަލައިގައި ކްރިމިނަލް ކޯޓުން ހުކުމްކުރީ ގދ. ތިނަދޫ ލަކީސްޓާ، އިސްހާގު ހަސަންގެ މައްޗަށެވެ. މި މައްސަލައިގެ ދައުވާގައި ބުނެފައިވަނީ މިދިޔަ އަހަރުގެ 12 ނޮވެންބަރުގައި މާލޭ ތްރީއޭވިލާގެއަށް އިސްހާގު ވަދެ، އެ ތަނުން އެޕަލް އައިފޯން 13 ޕްރޯ މެކްސްގެ ދެ ފޯނާއި، އައިފޯން-8 ޕްލަސްގެ އެއް ފޯނާއި، ރޮލެކްސް ބްރޭންޑުގެ ގަޑިއަކާއި ދަނބުކުލައިގެ ކްރިސްޓަލެއް ޖެހި ޓައިޓޭނިއަމް އަނގޮޓިއެއް ވަގަށް ނަގާފައިވާ ކަމަށެވެ.
މި މައްސަލައިގައި ދައުލަތުން އޭނާގެ މައްޗަށް ކޮށްފައިވަނީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
މި މައްސަލައިގައި ވަކީލަކާއެކު ކުރިޔަށް ދިއުމަށް އިސްހާގަށް ފުރުސަތު ދިން ނަމަވެސް، އޭނާ ނިންމީ ވަކީލަކާ ނުލައި ކުރިޔަށް ދިއުމަށެވެ. އަދި އޭނާގެ މައްޗަށް ކޮށްފައިވާ ދައުވާއަށް އިއުތިރާފުވެ ކޯޓުގައި ބުނީ، އެ ކަން އެ ގޮތަށް ކުރީ އެއްވެސް ފަރާތެއްގެ ބިރުދެއްކުމެއް ނުވަތަ މަޖުބޫރު ކަމެއް ނެތި ކަމަށެވެ.
މިއީ ޖިނާއަތުގެ ހަތަރުވަނަ ދަރަޖައިގެ ކުށެއްކަމުން، މި ކުށަށް ކަނޑައެޅޭ އަސާސީ އަދަބަކީ އެއް އަހަރާ ހައެއް ނުވަތަ ހަތް މަހަށް ޖަލަށްލުމެވެ.
ގާނޫނުލްއުގޫބާތުގައިވާ ގޮތުން ކުށްކުރި ތާރީޚުން ފެށިގެން ފާއިތުވީ ހަމަސްދުވަހުގެ ތެރޭގައި ޖިނާއަތުގެ ކުށެއް ސާބިތުވެފައިވާނަމަ، އަސާސީ މިންގަނޑުން އަދަބު ކަނޑައެޅޭ ދަރަޖަ މަތިވާނެއެވެ.
ވައްކަމުގެ އިތުރު މައްސަލައެއްގައި 2022ވަނަ އަހަރުގެ ޖޫންގައި ވެސް އޮތީ އިސްހާގުގެ މައްޗަށް އިތުރު ހުކުމެއް ކޮށްފައެވެ. އެއީ ވެސް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ކުށުގެ ދައުވާ ސާތިބުވެގެން ކުރި ހުކުމެކެވެ. އެ މައްސަލައިގައި އޭނާގެ މައްޗަށް ކަނޑައެޅީ އަށް މަހާއި ނުވަ ދުވަހުގެ ޖަލު އަދަބެކެވެ.
މީހެއްގެ މައްޗަށް ޖަލު އަދަބު ކަނޑައަޅާއިރު، އެ މައްސަލައެއްގެ ހުކުމުގެ ކުރިން އެ މީހަކު ބަންދުގައި ހޭދަކުރި މުއްދަތު، ޖަލުގައި ހުންނަންޖެހޭ ކަމަށް ކަނޑައަޅާފައިވާ މުއްދަތުން އުނިކޮށްދެއެވެ. ވައްކަމުގެ މި މައްސަލައިގައި ހުކުމުގެ ކުރިން 10 މަހާއި ތިން ދުވަސް ބަންދުގައި ހޭދަކޮށްފައިވާތީ، އިސްހާގުވަނީ ޖަލު އަދަބުން އެ މުއްދަތު އުނިކޮށްދޭން އެދިފައެވެ.
އިސްހާގުގެ މައްޗަށް ދައުލަތުން ކޮށްފައިވާ ދައުވާ، ޝައްކެއް ނެތް މިންވަރަށް ސާބިތާ ކަމަށް ކަނޑައަޅައި ކޯޓުން އޭނާގެ މައްޗަށް ހުކުމްކުރީ އެއް އަހަރާއި ހަ މަހާއި ހަތްދުވަހުގެ ޖަލު އަދަބެކެވެ. އެހެން ނަމަވެސް ޖިނާއީ އިޖުރާއަތުގެ ގާނޫނަށް ރިއާޔަތްކޮށް، އޭނާ ތަންފީޒު ކުރަންޖެހޭ އަދަބެއްގެ ގޮތުގައި ކަނޑައެޅީ ނުވަ މަހާއި ތިން ދުވަހުގެ ޖަލު އަދަބެކެވެ.
މީގެ އިތުރުން އޭނާއަށް ވަނީ އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާ ވެސް އުފުލައިފައެވެ. މި ދައުވާއަށް ވެސް އޭނާ އިއުތިރާފުވިއެވެ.
މި މައްސަލައިގައި އޭނާގެ މައްޗަށް ހުކުމްކޮށްފައި ވަނީ، ދެ މަހާއި 12 ދުވަހަށް ޖަލަށްލާން ހުކުމް ކޮށްފައެވެ.
ވައްކަމުގެ މައްސަލަތަކަކީ އެންމެ ގިނައިން ފުލުހުންނަށް ރިޕޯޓު ހުށަހެޅޭ މައްސަލައިގެ ބާވަތް ވެސްމެއެވެ. އެ ގޮތުން އަހަރުގެ މިހާތަނަށް 3،224 ވައްކަމުގެ މައްސަލައެއް ފުލުހުންނަށް ހުށަހަޅާފައިވެއެވެ.