މިހާރު ދިރާގުން ކުރިއަށް ގެންދާ 'ވިން އަ ސްޕީޑް ބޯޓު' ޕްރޮމޯޝަންގައި ދޭ އަލް ޝާލީ 'މަޖެލަން 32' ބޯޓު ބަނުމުގެ މަސައްކަތް ފަށައިފިއެވެ.
ދިރާގުން ބުނި ގޮތުގައި، އެ ލޯންޗަކީ އަރާމު ޑެކަކާއި ކެބިންއެއްގެ އިތުރުން ބަދިގެއެއް ވެސް ހިމެނެހޭން ފަރުމާކޮށްފައިވާ ލޯންޗެއް ކަމަށާއި ލޯންޗުގައި އަޅަން ބޭނުންވާ ޔަމަހާ ބްރޭންޑުގެ 175 ހޯސްޕަވަރުގެ ދެ އައުޓްބޯޑު އިންޖީނު ވެސް ލިބޭނެ ކަމަށެވެ.
މި ލޯންޗު ބަންނަ ފަރާތް ކަމަށްވާ އަލް ޝާލީ މެރިން މޯލްޑިވްސްގެ ޖެނެރަލް މެނޭޖަރު އިސްމާއިލް ޝަރީފް ވިދާޅުވީ، އެ ޓީމުން މަސައްކަތް ކުރަމުން ދަނީ އެންމެ ފެންވަރު ރަނގަޅު ބޯޓެއް ނަސީބުވެރި ފަރާތަކަށް ފޯރުކޮށްދޭން ކަމަށާއި މި ލޯންޗު ކަސްޓަމަރުންނާ ހަމައަށް ގެނެސްދިނުމަކީ ލިބޭ އުފަލެއް ކަމަށެވެ.
"މި ހައި ސްޕީޑް ލޯންޗު ވެގެން ދާނީ އަލް ޝާލީ މެރިން އިން އަބަދު ވެސް ދިވެހިންނަށް ގެނެސްދެމުން އަންނަ އުފެއްދުންތެރިކަމުގެ ލާމަސީލު މިސާލަކަށް" އޭނާ ވިދާޅުވިއެވެ.
ދިރާގުން ބުނީ، މި ލޯންޗު ވެގެންދާނީ ދުއްވާލަން ދިޔުމަށާއި ޕިކްނިކް ދަތުރު ދިޔުމަށް ނުވަތަ އާއިލާ އެއްކޮށް މަސްދަތުރު ދިޔުމަށް ވެސް ފުރިހަމަ ލޯންޗަކަށް ކަމަށެވެ.
މި ޕްރޮމޯޝަންގައި ދިރާގު ޕޯސްޓްޕެއިޑް، ޕްރީޕެއިޑް އަދި ފައިބާ ބްރޯޑްބޭންޑް ކަސްޓަމަރުންނަށް ވެސް ބައިވެރިވެވޭނެއެވެ. ހައި ސްޕީޑް ލޯންޗު ހޯދުމުގެ ފުރުސަތު ދެގުނަވަނީ މިމަހު ޕްރޮމޯޝަންގައި ބައިވެރިވާ ކަސްޓަމަރުންނަށެވެ. އެގޮތުން، ޕްރޮމޯޝަންގައި ބައިވެރިވުމަށް:
- ޕްރީޕެއިޑް ކަސްޓަމަރެއްނަމަ: 400 ރުފިޔާއިން މަތި ރީޗާޖް ކުރުމުން ބައިވެރިވެވޭނެއެވެ.
- ޕޯސްޓްޕެއިޑް ކަސްޓަމަރެއްނަމަ: 400 ރުފިޔާއަށްވުރެ މަތީގެ ޕެކޭޖެއް ނެގުމުން ބައިވެރިވެވޭނެއެވެ.
- ރެސިޑެންޝަލް ފައިބާ ބްރޯޑްބޭންޑް ކަސްޓަމަރެއްނަމަ: 30އެމް އިން މަތީގެ ޕެކޭޖަށް ސަބްސްކްރައިބް ކުރުމުން ބައިވެރިވެވޭނެ.