ބަންގްލަދޭޝްގައި ޑެންގީގެ ބަލިމަޑުކަން ފެތުރި، އެ ބަލީގައި މަރުވި މީހުންގެ އަދަދު 400 އަށްވުރެ މަތިވެއްޖެއެވެ.
ވިއްސާރަ މޫސުން ކަމުން ބަލިވާ މީހުން އިތުރުވެ، ހޮސްޕިޓަލްތަކުގައި އެޑްމިޓްކުރާ މީހުންވެސް އިތުރު ކަމަށް ބޭރުގެ މީޑިއާތަކުން ރިޕޯޓުކުރެއެވެ.
ޑެންގީ ޖެހިގެން މިއަހަރުގެ މިހާތަނަށް 407 މީހުން މަރުވެފައިވާއިރު، 78595 މީހުން ހޮސްޕިޓަލްގައި އެޑްމިޓްކޮށްފައިވާ ކަމަށް ބަންގްލަދޭޝްގެ ރަސްމީ ހިސާބުތަކުން ދައްކައެވެ.
މި މަހުގެ މެދުތެރޭއާ ހަމައަށް 4،173 ބަލިމީހުންނަށް ފަރުވާ ދެމުން އަންނައިރު، އޭގެ ތެރެއިން 1،835 މީހުންނަށް ފަރުވާ ދެމުން އަންނަނީ ވެރި ރަށް ޑާކާގައެވެ. ބާކީތިބި 2،338 މީހުންނަށް އަންނަނީ އެހެން ހިސާބުތަކުގައި ފަރުވާދެމުންނެވެ.
މޫސުމަށް އަންނަ ބަދަލުތަކުގެ ސަބަބުން ބަލި ޖައްސާ މަދިރި އާލާވާ ކަމަށާއި، އެހެން އަހަރުތަކާ ޚިލާފަށް އޮކްޓޫބަރު މަހުވެސް ވިއްސާރަ ކުރުމުގެ ސަބަބުން މަދިރި އުފެދުން އިތުރުވެފައިވާ ކަމަށް އެ ގައުމުގެ ޕްރޮފެސަރެއް ކަމަށްވާ ކަބީރުލް ބަޝާރު ވިދާޅުވިއެވެ.
ބަލި އަވަހަށް ދެނެގަނެ ރަނގަޅަށް ފަރުވާ ދީފިނަމަ، ޑެންގީ ޖެހިގެން މަރުވާ މީހުންގެ އަދަދު އެއް ޕަސެންޓަށް ވުރެ ދަށްވެދާނެ ކަމަށް ޑރ އޭބީއެމް އަބްދުالله ވިދާޅުވިއެވެ.
މިދިޔަ އަހަރު ޑެންގީ ޖެހިގެން ރެކޯޑު އަދަދަކަށް މީހުން މަރުވެފައިވެއެވެ. އެގޮތުން އެ ބަލި ޖެހިގެން 1705 މީހުން މަރުވެފައިވާއިރު، 321،000 މީހުންނަށް އެ ބަލި ޖެހިގެން ރިޕޯޓުކޮށްފައިވެއެވެ.
މަދިރިން ރައްކާތެރިވުމަށް ފިޔަވަޅުތައް އަޅަން ސިއްޚީ އޮފިޝަލުން އިލްތިމާސްކޮށްފައިވާއިރު، މަދިރި އާލާވާ ތަންތަން ނައްތާލުމަށް ހަރުކަށި ފިޔަވަޅުތައް އަޅަން ވަނީ ގޮވާލާފައެވެ.
ޑެންގީއަކީ ގިނަ ފަހަރަށް އާދައިގެ އަލާމާތްތައް ފުރަތަމަ ފެނި ކުއްލިއަކަށް ހާލު ގޯސްވާ ބައްޔެކެވެ.