މި ސަރުކާރަށް ޑޮލަރު މައްސަލަ ހައްލުނުކުރެވޭ ގޮތަށް ހުރިހާ ދޮރެއް ބަންދުކޮށް، ކުރީ ސަރުކާރުން އޮތީ ދަންތުރަތަކެއް ފަރުމާކޮށްފައި ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެއެވެ.
އިކޮނޮމިކް މިނިސްޓްރީގައި ނޫސްވެރިންނާ ބައްދަލުކުރައްވައި މިނިސްޓަރު ވިދާޅުވީ، ޑޮލަރުގެ މައްސަލައަކީ އެންމެ ކަމަކާ ގުޅިފައި އޮތް މައްސަލައެއް ނޫން ކަމަށެވެ.
މިނިސްޓަރު ވިދާޅުވި ގޮތުގައި، ހުރިހާ ވެސް މައްސަލައަކީ މިދިޔަ ސަރުކާރުގައި ޒިންމާދާރު ކަމެއް ނެތި ފައިސާ ޗާޕުކުރުމާއި ބަޖެޓުގައި މަޖިލިސް އިންތިޚާބާ ދިމާކޮށް ސިޔާސީ ހަރަކާތްތަކެއް ހިންގަން ރާވާފައި އޮތުމެވެ.
މިސާލަކަށް 30 މިލިއަން ރުފިޔާގެ މަޝްރޫއަކަށް އޮވެދާނެ އެއްލައްކަ ރުފިޔާ ޖަހާފައި، ހުރިހާ ދަންތުރައެއް ވަރަށް ރީޗަށް ފަރުމާކޮށްފައި، ދެން އަންނަ ސަރުކާރަކަށް އެކަން [ޑޮލަރު މައްސަލަ ހައްލު] ކުރެވޭނެ ހުރިހާ ދޮރެއް ބަންދުކޮށްފައި ހުރީ
މީގެއިތުރުން، ޑޮލަރުގެ މައްސަލައިގެ ވާހަކަ 19ވަނަ ރައްޔިތުންގެ މަޖިލީހުން ފެށިގެން ދައްކަވަން ފެށި ކަމަށާއި ފައިސާ ޗާޕުކޮށްފައި ބާޒާރަށް ނުނެރުމަށް އޭރުގެ ސަރުކާރަށް ގޮވާލަމުން ދިޔަ ކަމަށް މިނިސްޓަރު ސައީދު ވިދާޅުވިއެވެ.
ރައީސް މުއިއްޒާއި މިނިސްޓަރު ސައީދު: މިނިސްޓަރު ވިދާޅުވީ ޑޮލަރު މައްސަލަ ހައްލު ކުރަން ގިނަ މަސައްކަތްތަކެއް މި ސަރުކާރުން ކުރަމުން އަންނަ ކަމަށް --- ފޮޓޯ/ ރައީސް އޮފީސް
މިގޮތުން، އޭރު ފައިސާ ޗާޕުކުރީ ޚަރަދަށް ޒިންމާ ގާނޫނު ސަސްޕެންޑުކޮށްގެން ކަމަށާއި މައްސަލައަކީ 8،000 މިލިއަން ރުފިޔާގެ ފައިސާ އޭރުގެ ސަރުކާރުން ޗާޕުކުރި މައްސަލަ ކަމަށް މިނިސްޓަރު ތުހުމަތުކުރެއްވިއެވެ.
ނަމަވެސް، މި ސަރުކާރު އައުމަށްފަހުގައި ފައިސާ ޗާޕުނުކުރާ ކަން މިނިސްޓަރު ވަނީ ފާހަގަކުރައްވާފައެވެ.
"އަޅުގަނޑު ތިވިދާޅުވީ އިންޓަވިއުގައި ދެއްކި ވާހަކައިން ކުޑަ ކުޑަ ތަންކޮޅެއް އަޅުގަނޑުމެނާ ވާދަވެރި ބައެއް ފަރާތްތަކުން ނަގައިގެން އެ އަނބުރަނީ އިނގޭތޯ؟ އޭއްޗިހީގައި ފުލް ޓެކްސްޓަށް ވަޑައިގަތީމަ އަސްލު މާނަ އެނގިވަޑައިގަންނަވާނީ. އެހެން މި ދެންވެނީ ދެތިން މަހެއް ތެރޭ ހައްލުވާނެޔޭ ކިޔާފަ އިންނަ ތަންކޮޅެއް. އެއީ ޓުއަރިޒަމްގެ ހާލަތު އޭރު ރަނގަޅު ވަމުން އަންނާތީ ހާލަތަށް ވުރެ ރަނގަޅުވާނެ ވާހަކަ. އެހެން ނަމަވެސް، ލޯންގް ޓާމް ހައްލެއް އަންނާނީ ލައްކަ މަސައްކަތްކޮށްގެން ކަން. އެއީ ފުލް ޖުމްލައަކީ" މިނިސްޓަރު ވިދާޅުވިއެވެ.
އިތުރަށް މިނިސްޓަރު ވިދާޅުވީ، ކޮންޒިއުމާ މާކެޓަށް ބޭނުންވާ ވަރަށް ބޮޑެތި ބަލްކުތައް ޗައިނާއިން ނުވަތަ އިންޑިއާއިން ގެނައުމުން ޑޮލަރަށް ބަރޯސާވާ މިންވަރު ވަރަށް ބޮޑު ތަނުން ކުޑަވާނެ ކަމަށެވެ.
ބޭންކުން ރަސްމީކޮށް ޑޮލަރު ވިއްކާ ރޭޓަކީ އަދިވެސް 15.42 ރުފިޔާ ކަމަށްވީ ނަމަވެސް، ކަޅުބާޒާރުގައި ޑޮލަރުގެ އަގު ވަނީ ވަރަށް ބޮޑަށް އުފުލިފައެވެ. މިގޮތުން، މިހާރު ކަޅުބާޒާރުގެ ޑޮލަރު ވިއްކާ ރޭޓު ހުރީ 19 ރުފިޔާއަށް ވުރެ މަތީގައެވެ.
އެހެންވެ، ޑޮލަރާ ގުޅުން ހުރި މައްސަލަތައް ހައްލު ކުރަން އެކި ގޮތްގޮތަށް މަސައްކަތް ކުރަމުން އަންނަ ކަމަށް މިނިސްޓަރު ވަނީ ވިދާޅުވެފައެވެ.