ހަފުތާ ބަންދުގައި ނުވަތަ ރަސްމީ ބަންދު ދުވަސްތަކުގައި ވިޔަސް، ފަނޑިޔާރުން އައްޔަން ކުރެވިފައިވާ ކޯޓު ނުވަތަ ދާއިރާއިން ބޭރަށް، ނުވަތަ ރާއްޖޭން ބޭރަށް ވަޑައިގަންނަވާނަމަ، ޖުޑީޝަލް ސާވިސަސް ކޮމިޝަން (ޖޭއެސްސީ)އަށް އެކަން އަންގަންޖެހޭ ގޮތަށް ހަދައިފިއެވެ.
ޖޭއެސްސީން މިއަދު ވަނީ ފަނޑިޔާރުން ރަށުން ބޭރަށް ދަތުރުކުރުމާ ގުޅޭ ސާކިއުލާއެއް ނެެރެފައެވެ. އޭގައިވާ ގޮތުން އުއްތަމަފަނޑިޔާރާއި، ހައިކޯޓުގެ އިސްފަނޑިޔާރާއި، ސުޕީރިއާ ކޯޓުތަކުގެ އިސްގާޒީންނާއި، ޖުޑީޝަލް ދާއިރާތަކުގެ އިސްމެޖިސްޓްރޭޓުން ރަށުން ބޭރަށް ވަޑައިގަންނަވާނަމަ އެކަން އަންގަވަން ޖެހޭނެއެވެ.
މި ސާކިއުލާގެ ދަށުން، އުއްތަމަ ފަނޑިޔާރު ފިޔަވައި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެކަން އުއްތަމަ ފަނޑިޔާރަށް އަންގަވަންޖެހޭނެއެވެ.
އަދި ހައިކޯޓުގެ އިސްފަނޑިޔާރު ފިޔަވައި އެ ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެކަން ހައިކޯޓުގެ އިސްފަނޑިޔާރަށް އަންގަވަން ޖެހެެއެވެ. މީގެ އިތުރުން ސުޕީރިއާ ކޯޓުތަކުގެ ގާޒީން ރަށުން ބޭރަށް ވަޑައިގަންނަވާނަމަ އެ ކަން އެ ކޯޓެއްގެ އިސްގާޒީއަށް އަންގަވަންވާނެއެވެ. އަދި ޖުޑީޝަލް ދާއިރާތަކުގެ މެޖިސްޓްރޭޓުން ޤާއިމުވެ ތިއްބަވާ ރަށުން، ބޭރަށް ވަޑައިގަންނަވާނަމަ އެ ކަން އެޖުޑީޝަލް ދާއިރާއެއްގެ އިސްމެޖިސްޓްރޭޓަށް އެންގުމަށް އެ ސާކިއުލާގައިވެއެވެ.
ފަނޑިޔާރުކަމުގެ މަސްއޫލިއްޔަތު އަދާކުރުމަށް ކޮންމެ ފަނޑިޔާރަކު ވެސް އޭނާގެ ހުރިހައި ވަގުތެއް ތަޚްސީސްކުރަން ވާނެކަމަށް ގާނޫނުއަސާސީއާއި ފަނޑިޔާރުންގެ ގާނޫނު އަދި ފަނޑިޔާރުންގެ ސުލޫކީ މިންގަނޑުގައި ބަޔާންކޮށްފައި އޮވެއެވެ.