މިދިޔަ އޮކްޓޯބަރު މަހުގެ ކުރީކޮޅު ކަލަސް ޗެނަލްއިން ދައްކަން ފެށި މަޝްހޫރު ރިއަލިޓީ ޝޯ "ބިގް ބޮސް" ސީޒަން 18އަށް އެމެރިކާގެ މަޝްހޫރު ކާޑޭޝިއަން އާއިލާގެ މެމްބަރުންތަކެއް ގެންނަން ނިންމާފައިވާ ކަމަށް ފިލްމީ ޚަބަރުތައް ބުނެފިއެވެ.
އިންޑިއާގެ ޓައިމްސް އެންޓަޓެއިންމަންޓްގައި ބުނެފައިވާ ގޮތުގައި 18 ވަނަ ސީޒަންގައި ބައިވެރިވުމަށް ހުށަހަޅާފައި ވަނީ ކާޑޭޝިއަން އާއިލާގެ އެންމެ މަގުބޫލު މެމްބަރުން ކަމަށްވާ ކިމް، ކައިލީ އަދި ކެންޑަލްއެވެ.
"ބިގް ބޮސް" ގެނެސްދޭ ފަރާތްތަކުން ކާޑޭޝިއަން އާއިލާގެ ތިން ބެއިންނަށް ހުށަހެޅި މި ހުށަހެޅުން ގަބޫލުކޮށްފިނަމަ 18 ވަނަ ސީޒަންގެ ބައިވެރިންގެ ގޮތުގައި ކުރިއަށް އޮތް ޑިސެމްބަރު މަހު މި އާއިލާގެ މެމްބަރުން ފެންނާނެކަމަށް ރިޕޯޓުތައް ބުނެއެވެ.
ކަލަސް ޗެނަލްގެ 'ބިގް ބޮސް' ޝޯގެ ހޯސްޓު އެކްޓަރު ސަލްމާން ޚާން--ފޮޓޯ/ޓައިމްސްނައު
އެއާއެކު، "ބިގް ބޮސް" ޝޯއަށް ބޭރު ދުނިޔޭގެ ގިނަ ބައެއްގެ ސަމާލުކަން ލިބި ބައިނަލްއަޤްވާމީ ގޮތުން ބޮޑު މަޝްހޫރުކަމެއް ލިބޭނެ ކަމަށް ރިޕޯޓުތައް ބުނެއެވެ. ކާޑޭޝިއަން އާއިލާއަކީ ދުނިޔޭގެ ވަރަށް ގިނަ ބައެއްގެ މެދުގައި ބޮޑު މަގުބޫލުކަމެއް ލިބިފައިވާ ސެލެބްރިޓީ އާއިލާއެކެވެ.
"ކީޕިންގް އަޕް ވިތު ދަ ކާޑޭޝިއަންސް"ގެ ނަމުގައި ރިއަލިޓީ ޝޯއެއް ގެނެސްދީ ބޮޑު މަޝްހޫރުކަމެއް ހޯދި މި އާއިލާގެ މެމްބަރުންނަކީ މޮޑަން ޕޮޕް ކަލްޗާގެ އައިކަންސްގެ ގޮތުގައި ގިނަ ބަޔަކު ބަލައިގަންނަ މެމްބަރުންނެވެ.
މީގެ ކުރިންވެސް "ބިގް ބޮސް" ޝޯއަށް ބައިނަލް އަޤްވާމީ ގޮތުން ފާހަގަކޮށްލެވޭ ސެލެބްރިޓީން ވަނީ ގެނެސް ބައިވެރިކޮށްފައެވެ. އޭގެތެރޭގައި ދެވަނަ ސީޒަންއިން ފެނުނު އިނގިރޭސިވިލާތުގެ ޓެލެވިޒަން ޝަހްސިއްޔަތު ޖޭޑް ގޫޑީ އަދި ކެނޭޑިއަން އެމެރިކަން ބަތަލާ ޕަމޭލާ ޑެނީސް ހިމެނެއެވެ.