ރާއްޖޭގެ ސަރަހައްދުގައި ނުގަވާއިދުން އުޅުނު ބޯޓެއް ޑްރޯންގެ އެހީގައި ހޯދައިފި

ގާނޫނާ ޚިލާފަށް ރާއްޖޭގެ ސަރަހައްދަށްވަދެ އުޅުނު ބޭރު ގައުމެއްގެ ބޯޓެއް އެމްއެންޑީއެފުން ހޯދައިފިއެވެ.

އެމްއެމްޑީއެފުން ބުނީ، އެއާކޯގެ ޑްރޯނާއި ކޯސްޓްގާޑުން ގުޅިގެން ރާއްޖޭގެ އުތުރުގެ ސަރަހައްދު ބެލެހެއްޓުމަށް ހިންގި ޚާއްސަ އޮޕަރޭޝަނެއްގައި ބޭރު ގައުމެއްގެ ބޯޓެއް ރާއްޖޭގެ ސަރަހައްދުގައި ގާނޫނާ ޚިލާފަށް އުޅެނިކޮށް ޑްރޯނުން ލޮކޭޓު ކޮށްފައިވާ ކަމަށެވެ.

މި ކަމާ ގުޅިގެން އެމްއެންޑީއެފްގެ މީޑިއާ އޮފިޝަލް "ސަން"އަށް ވިދާޅުވީ މި މައްސަލަ ބަލަމުންދާ ކަމަށާއި އިތުރު މައުލޫމާތު ލިބޭ ވަރަކުން ހާމަ ކުރަމުން ގެންދާނެ ކަމަށެވެ.

ސިފައިންގެ ޑްރޯންތައް އިފްތިތާހުކޮށްފައި ވަނީ މިދިޔަ މާޗް މަހުގެ 15ގައި ކަމަށްވާއިރު، ކަނޑުގެ ސަރަހައްދު ބެލުމަށް މީގެ ކުރިން ޑްރޯން ބޭނުންކޮށްފައިވެއެވެ.

އެންމެ ޒަމާނީ އާލާތްތަކާ އެކު އުދުއްސޭ މި ޑްރޯންތައް 70 އާއި 120 ނޮޓުގެ ސްޕީޑުގައި 27 ގަޑިއިރަށް ވުރެ ގިނައިރު ދުއްވޭނެއެވެ. އަދި، 25،000 ފޫޓަށްވުރެ މަތިން ދުއްވުމުގެ ގާބިލުކަން ވެސް މި ޑްރޯންތަކުގައި ހުރެއެވެ.