ދުނިޔޭގެ ހަކުރު ބަލީގެ ދުވަހާ ގުޅުވައި މ. މުލަކުގައި އެ އަތޮޅުގެ ރައްޔިތުންނަށް ޚާއްސަކޮށް ހަކުރު ބަލީގެ ސްކްރީނިން ޕްރޮގްރާމެއް ކުރިއަށް ގެންގޮސްފިއެވެ.
ދުނިޔޭގެ ހަކުރު ބަލީގެ ދުވަހަކީ ނޮވެމްބަރު 14އެވެ. އެގޮތުން މިއަހަރުގެ ހަކުރު ބަލީގެ ދުވަހުގެ ޝިއާރަކީ "ބްރޭކިން ބެރިއާސް، ބްރިޖިން ގެޕްސް" އެވެ.
މި ދުވަހާ ގުޅިގެން މުލަކުގެ ސިއްޙީ މަރުކަޒުގައި ކުރިއަށް ދިޔަ ސްކްރީނިން ޕްރޮގްރާމަކީ ސިއްޙީ މަރުކަޒާއި، މުލަކު ކައުންސިލާއި، މުލަކު ޕޮލިހުން އިސްނަގައިގެން ކުރިއަށް ގެންދިޔަ ހަރަކާތެކެވެ.
މި ސްކްރީނިން ޕްރޮގްރާމް ކުރިއަށް ގެންގޮސްފައި ވަނީ އައިޖީއެމްއެޗްގެ އެތެރެހަށީގެ ޚާއްސަ ޑޮކްޓަރު މުހައްމަދު އަލީއާއި އިތުރު ހަތަރު ޑޮކްޓަރުންގެ ޓީމަކުންނެވެ.
ހަކުރު ބަލީގެ ދުވަހާ ގުޅިގެން މުލަކުގައި ކުރިއަށްގެންދިޔަ ސްކްރީނިން ޕްރޮގްރާމްގެ ތެރެއިން -- ސަން ފޮޓޯ
މި ސްކްރީނިން ޕްރޮގްރާމްގެ އެންމެ ބޮޑު އަމާޒަކަށް ވީ، ބައްޔާ ގުޅޭ މައުލޫމާތު ދިނުމާއި، ކަންކަން އޮޅުންފިލުވައިދިނުމެވެ. އަދި ހަކުރު ބަލި ރަށުގައި ހުރީ ކިހާ މިންވަރަކަށްތޯ ދެނެގަތުމަށްޓަކައެވެ.
ސްކްރީނިން ޕްރޮގްރާމްގައި ވާހަކަދައްކަވަމުން ޑރ. މުހައްމަދު އަލީ ވިދާޅުވީ ރާއްޖޭގެ އާބާދީގެ ނިސްބަތުން ބަލާއިރު ހަކުރު ބަލި ހުުރި މީހުން ގިނަ ކަމަށެވެ. އެގޮތުން ދިވެހިރާއްޖޭގައި 2020 ވަނަ އަހަރާއި 2021 ވަނަ އަހަރާ ދޭތެރޭ ހެދި ސާވޭއަކުން ދައްކާ ގޮތުގައި ރާއްޖޭގެ ކޮންމެ 100 މީހުންގެ ތެރެއިން 14 މީހުންނަކީ ހަކުރު ބަލި ހުންނަ މީހުން ކަމަށް މުހައްމަދު އަލީ ވިދާޅުވިއެވެ. އަދި އެވްރެޖްކޮށް ހަކުރު ބަލީގެ މީހުން މިހާރު ވެސް ރާއްޖޭގައި އުޅޭނެ ވަރަކީ އެއީ ކަމަށް ވިދާޅުވިއެވެ.
އައިޖީއެމްއެޗްގެ އެތެރެހަށީގެ ޚާއްސަ ޑޮކްޓަރު މުހައްމަދު އަލީ -- ސަން ފޮޓޯ
ޑރ. މުހައްމަދު އަލީ ވިދާޅުވީ މުލަކުގައި ކުރިއަށްދިޔަ ސްކްރީނިން ޕްރޮގްރާމްގައި ބައްޔާ ގުޅޭގޮތުން މީހުންނަށް މައުލޫމާތުދިނުމާއި، ބޭސް ބޭނުންކުރަމުން ދިޔުމުގެ މުހިންމުކަން ކިޔައިދީފައިވާނެ ކަމަށެވެ.
ސްކްރީނިން ޕްރޮގްރާމްގެ އިތުރުން ހަކުރު ބަލީގެ ދުވަހާ ގުޅިގެން މުލަކުގައި ކަލާ ރަންއެއް ބާއްވަން ވަނީ ނިންމާފައެވެ. މި ރަން އޮންނާނީ މާދަމާ ހަވީރުއެވެ. ހުރިހާ އުމުރެއްގެ މީހުންނަށް ބައިވެރިވެވޭ ގޮތަށް ބާއްވާ މި ރަން ގައި ވީހާވެސް ގިނަ ބަޔަކު ބައިވެރިވުމަކީ ހިންގާ ކޮމިޓީގެ ވަރަށް ބޮޑު އެދުމެކެވެ.