ފަލަސްތީނު ރައްޔިތުން ގަދަކަމުން ގެދޮރުން ނެރެ ޣައްޒާގައި ބަނޑޫހައިހޫނުކަމުގެ ސިޔާސަތެއް ގެންގުޅެގެން ނުވާނެ ކަމަށް އެމެރިކާއިން ބުނެފިއެވެ.
އެމެރިކާއިން އދ އަށް ކަނޑައަޅާފައި ހުންނަވާ ސަފީރު ލިންޑާ ތޯމަސް ގްރީންފީލްޑް އެ މޭރުމުން ވާހަކަފުޅު ދައްކަވާފައި ވަނީ އެމެރިކާގެ އަސްކަރީ އެހީތަކަށް ކުރިމަތިވެދާނެ ހުރަސްތަކުން ސަލާމަތްވުމަށްޓަކައި ޣައްޒާގެ އިންސާނީ ދަތިކަން ހައްލުކުރުމަށް އެ ގައުމުގެ އެކުވެރި އިސްރާއީލުން އެކަށީގެންވާ މަސައްކަތްތަކެއް ކުރަމުންދާ ކަމަށް ވޮޝިންޓަނުން ބުނިތާ މާގިނައިރުނުވަނީހެވެ.
"އަދިވެސް އިސްރާއީލުން ކަށަވަރު ކުރަން ޖެހޭނީ އެ ގައުމުގެ އަމަލުތައް ފުރިހަމައަށް ތަންފީޒު ކުރެވޭތޯ." އދ ސަލާމަތީ މަޖިލީހުގައި ވާހަކަފުޅު ދައްކަވަމުން ގްރީންފީލްޑް ވިދާޅުވިއެވެ.
އަދި ފަލަސްތީނުގެ ރިލީފް އެޖެންސީ (އަންރުވާ)ގެ އޮޕަރޭޝަން މަނާކުރާ ގާނޫނެއް ތަންފީޒުކުރުން އިސްރާއީލުން މަޑުޖައްސާލުމަކީ މި ދަނޑިވަޅުގައި ވަރަށް މުހިންމު ކަމެއް ކަމަށް އެކަމަނާ ވިދާޅުވިއެވެ.
"ޣައްޒާގެ ބޮޑު ބައެއް މިހާރު ވަނީ ބިމާ ހަމަވެފައި." އދ.ގެ އެކްޓިން ޗީފް ޖޮއިސް މުސުޔާ ވިދާޅުވިއެވެ. "އަޅުގަނޑު ޚުލާސާކޮށް ދަންނަވާލާއިރު، ހަނގުރާމަތައް ކުރިއަށްދާ އުތުރު ޣައްޒާއަށް އިންސާނީ އެހީތެރިކަން ވަނުމަށް އިސްރާއީލުގެ ކަމާބެހޭ ފަރާތްތަކުން ދަނީ ހުރަސް އަޅަމުން. ގާތްގަނޑަކަށް 75،000 މީހުން ތިބީ ފެނާއި ކާބޯތަކެތީން މަހުރޫމުވެފައި."
ނަމަވެސް އިސްރާއީލުން އދ އަށް ކަނޑައަޅާފައި ހުންނަ ސަފީރު ޑެނީ ޑެނަން ވަނީ ޣައްޒާގެ ބަނޑުހައިހޫނުކަމުގެ ވާހަކަ ދޮގުކޮށްފައެވެ. އަދި ޣައްޒާގެ އިންސާނީ ހާލަތު ރަނގަޅު ކުރުމަށް އިސްރާއީލުން ކުރާ މަސައްކަތްތައް ފާހަގަކޮށްފައެވެ.
ސަލާމަތީ މަޖިލީހުން މިހާރު ދަނީ ޣައްޒާގައި ޝަރުތުތަކާ ނުލައި އަދި ދާއިމީކޮށް ހަނގުރާމަ ހުއްޓާލުމަށް ހުރިހާ ފަރާތްތަކުން އިހުތިރާމް ކުރުމަށް ޝަރުތުކޮށް ހުށަހަޅާ ގަރާރެއްގެ ޑްރާފްޓެއް އެކުލަވާލުމާ ބެހޭ ގޮތުން މަޝްވަރާ ކުރަމުންނެވެ.
އަދި މުޅި ޣައްޒާއަށް ބޭނުންވާ އިންސާނީ އެހީތެރިކަން ފުރިހަމައަށް، ހަލުވި، ރައްކާތެރި އަދި ހުރަހެއް ނެތި ވަދެ، އެ އެހީތެރިކަން ބޭނުންވާ ހުރިހާ ފަލަސްތީނުގެ އާންމުންނަށް ފޯރުކޮށްދިނުމަށް މަގުފަހިކޮށްދިނުމަށްވެސް އެ ގަރާރުގައި ހުށަހަޅާފައިވެއެވެ.
އެ ގަރާރު ޑްރާފްޓްކޮށްފައިވަނީ ކައުންސިލަށް އިންތިޚާބުވި 10 މެންބަރުން ކަމަށާއި، ވީޓޯ ކުރުމުގެ ބާރު ލިބިދޭ ދާއިމީ ފަސް މެންބަރުން ކަމަށްވާ ރަޝިޔާ، ޗައިނާ، އެމެރިކާ، އިނގިރޭސިވިލާތް އަދި ފަރަންސޭސިވިލާތާއެކު މަޝްވަރާ ކުރަން ފެށީ ނޮވެމްބަރު މަހުގެ ކުރީކޮޅު ކަމަށްވެސް އިންގްލިޝް އަރަބިއާއިން ރިޕޯޓުކޮށްފައިވެއެވެ.
ރަޝިޔާއާއި ޗައިނާއިން އަންގާރަ ދުވަހު ވަނީ އެ ޑްރާފްޓަށް ތާއީދުކޮށް، ވީހާވެސް އަވަހަކަށް ވޯޓަށް އެހުމަށް ގޮވާލާފައެވެ. ގަރާރެއް ފާސްކުރުމަށް މަދުވެގެން ނުވަ ވޯޓު ބޭނުންވެއެވެ.
މިދިޔަ އަހަރު އޮކްޓޫބަރު މަހު 7 ވަނަ ދުވަހު އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް ގާތްގަޑަކަށް 43،700 މީހުން ވަނީ ޝަހީދުކޮށްލާފައެވެ. ހަމަލާތަކުގައި 103،000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ.