ބޭރުގެ ފައިނޭންސިންގެ ގޮތުގައި ހޯދަންޖެހޭ ފައިސާ ހޯދުމަށް ފަހު ނޫނީ މަޝްރޫއުތައް ނުފެށުމަށް މަރުކަޒީ ބޭންކު، އެމްއެމްއޭގެ ގަވަރުނަރު އަހުމަދު މުނައްވަރު އެދިވަޑައިގެންފިއެވެ.
ރައްޔިތުންގެ މަޖިލީހުގައި މިއަދު އޮތް ބަޖެޓު ދިރާސާކުރާ ކޮމިޓީގައި ވާހަކަ ދައްކަވަމުން ގަވަރުނަރު ވިދާޅުވީ މަޝްރޫއުތައް ހުއްޓުނަ ނުދީ ކުރިޔަށް ގެންދިއުމަށްޓަކައި ފޮރިން ފައިނޭންސް މުހިންމު ކަމަށެވެ.
"ޕްރޮޖެކްޓުތައް ތަރުތީބުވެގެންދާންވާނީ ބޭނުންވާ ބޭރުގެ އަދި ޑޮމެސްޓިކް ފައިނޭންސިން ހޯދުމަށް ފަހުގައި، އެހެންވީމާ ޕްރޮޖެކްޓުތައް ނުހުއްޓި ކުރިއަށް ގެންދިއުމަށް އެއަށް ބޭނުންވާ ފައިސާ، ޚާއްސަ ގޮތެއްގައި ފޮރިން ފައިނޭންސިން މުހިންމު. އެ ވާގޮތަކީ ކޮންމެ ކަމެއް ވެސް ޑޮލަރާ ޖެހިގެންދާއިރު، ރިޒާވަށް އޭގެ އަސަރު ކުރޭ" ގަނަރުނަރު ވިދާޅުވިއެވެ.
ސަރުކާރުގެ ފަރާތުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. އެ ބަޖެޓުގެ ފައިނޭންސިންއަށް 766 މިލިއަން ޑޮލަރު ނުވަތަ 12 ބިލިއަން ރުފިޔާ ބޭނުންވެއެވެ. އެއީ މާލީ ރިފޯމުގެ މަސައްކަތަށް ވަރަށް މުހިންމު ފައިސާއެއް ކަމަށާއި، އެ ފައިސާ ނުލިބިއްޖެނަމަ، ދައުލަތުގެ ރިޒާވަށް އަސަރު ކުރާނެ ކަމަށް ގަވަރުނަރު ވިދާޅުވިއެވެ.
ރާއްޖޭގެ މާލީ ހާލަތު ގޯސްވި ސަބަބެއްގެ ގޮތުގައި ގަވަރުނަރު ފާހަގަ ކުރެއްވީ މިދިޔަ ސަރުކާރުގައި ކޮވިޑަށް ފަހު ދައުލަތުގެ ރިކަރަންޓު ޚަރަދުތައް އިންތިހާއަށް އިތުރުވެގެން ދިއުމެވެ. އަދި ފައިނޭންސް ނުކުރެވޭ ވަރަށް މަޝްރޫއުތައް ފެށުމެވެ. އެއްފަހަރާ މި މައްސަލަ ހައްލު ނުކުރެވޭނެކަން ގަވަރުނަރު ފާހަގަ ކުރެއްވިއެވެ.
މީގެ އިތުރުން މާލީ ރިފޯމުގެ ތެރެއިން ސަރުކާރު ކުންފުނިތަކުގެ މުސާރައާއި ސިވިލް ސާވިސްގައި މަސައްކަތްކުރާ މުވައްޒަފުންގެ މުސާރަ އެއްވަރުކުރަން ޖެހޭ ކަމަށް ވެސް މުނައްވަރު ވިދާޅުވިއެވެ. އެހެންނޫން ނަމަ، ރިފޯމްގެ ހެޔޮ ބަދަލު ފެންނާނެ ކަމަށް ގަބޫލުނުކުރައްވަ ކަމަށް ވެސް އޭނާ ވަނީ ވިދާޅުވެފައެވެ.
މަޖިލީހުގެ ބަޖެޓު ދިރާސާ ކޮމިޓީގެ މިއަދުގެ ބައްދަލުވުމުގައި ވަނީ މަރުކަޒީ ބޭންކް (އެމްއެމްއޭ)އާއި ފިނޭންސް މިނިސްޓްރީގެ އިތުރުން އޮޑިޓާ ޖެނެރަލްގެ އޮފީހާ ބައްދަލު ކޮށްފައެވެ.