ރާއްޖޭގައި ގަވާއިދާ ޚިލާފަށް އުޅޭ ފަސްހާހެއްހާ ބިދޭސީން މި ސަރުކާރުން ވެރިކަމަށް އައި ފަހުން ޑީޕޯޓުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ސަރުކާރަށް އެއް އަހަރު ފުރުމާ ގުޅޭ ގޮތުން ޕީއެސްއެމްއިން ކުރިއަށްގެންދިޔަ ޕްރޮގްރާމެއްގައި އިހުސާން ވިދާޅުވީ ރައީސް ޑރ. މުޙައްމަދު މުއިއްޒު ހޯމް މިނިސްޓްރީއަށް މައިގަނޑު ހަތަރު ކަމެއް ހަވާލުކުރެއްވި ކަމަށެވެ. އޭގެ ތެރޭގައި ރާއްޖޭގައި ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުން ހިމެނޭ ކަމަށް އޭނާ ވިދާޅުވިއެވެ.
އިހުސާން ވިދާޅުވީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މުޅި ރާއްޖޭގައި މިހާރު 138 ރަށެއްގައި ބަޔޮމެޓްރިކްސް ނެގުމުގެ މަސައްކަތް ކުރިއަށް ގެންދާ ކަމަށެެވެ. އޭގެތެރެއިން 10،000އަށްވުރެ ގިނަ މީހުންގެ ބަޔޮމެޓްރިކްސް މިހާރު ނަގައިފައިވާކަން އޭނާ ފާހަގަކުރެއްވިއެވެ.
މިނިސްޓަރު އަލީ އިހުސާން: ސަރުކާރަށް އެއް އަހަރުވީއިރު 5،000 ބިދޭސީން ޑީޕޯޓުކޮށްފައިވާ ކަމަށް ވިދާޅުވި ---
"ހަމައެއާއެކުގައި މުޅި ރާއްޖެ އެއްކޮށް ބަޔޯމެޓްރިކްސް ނަގައި، ދިވެހިރާއްޖޭގައި ތިބި ބިދޭސީންގެ ހުރިހާ އެންމެންގެ ބަޔޯމެޓްރިކްސް ނަގައި ނިމޭނެ އަންނަ އަހަރުގެ އޭޕްރިލް މަހު،" އޭނާ ވިދާޅުވިއެވެ.
ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މި ސަރުކާރުން ޚާއްސަ ސިޔާސަތުތަކެއް ކަނޑައަޅައިފައިވާކަން ފާހަގަކުރައްވައި އިހުސާން ވިދާޅުވީ ގަވާއިދާ ޚިލާފަށް ވިޔަފާރިކޮށް ކުށްތަކަށް އަރައިގަންނަ ބިދޭސީން ހައްޔަރުކޮށް 48 ގަޑީރުގެ ތެރޭގައި ޑިޕޯޓުކުރެވޭނެ ނިޒާމެއް ގާއިމުކޮށްފައިވާ ކަމަށެވެ.
"އެ ނިޒާމުގެ ތެރެއިން ގާތަގަނޑަކަށް ފަސްހާހެއްހާ ބިދޭސީން މިހާރު ވަނީ ރާއްޖެއިން ބޭރުކުރެވިފައި،" އޭނާ ވިދާޅުވިއެވެ.
އިހުސާން ވިދާޅުވީ ސަރުކާރަށް އަހަރެއްވީއިރު، ޖުމްލަ ގޮތެއްގައި މުޅި ދާޚިލީ ދާއިރާ ހަރުދަނާ ކުރުމަށް މުހިންމު މަސައްކަތްތަކެއް ކުރެވިފައިވާ ކަމަށެވެ. އަދި ގޭންގު ކުށްތަކާއި މަސްތުވާތަކެތީގެ މައްސަލަތަކަށް ދާއިމީ ހައްލެއް ހޯދުމަށް މިހާރު ހަދައިފައި އޮތް ގާނޫނުތަކުގައި ހުރި މައްސަލަތައް ދެނެގަނެ، މައްސަލަތައް ހައްލުކޮށް އެއަށް ބޭނުންވާ ބިލް ޑްރާފްޓް ކުރުމަށްފަހު އެޓާނީ ޖެނެރަލްގެ އޮފީހަށް ފޮނުވާފައިވާކަން އޭނާ ފާހަގަކުރެއްވިއެވެ.
އިމިގްރޭޝަނުން މީގެ ކުރިން ވަނީ، މި އަހަރަށް އަމާޒަކީ ވެސް ގަވާއިދާ ޚިލާފަށް އުޅޭ 5،000 ބިދޭސީން ފޮނުވައިލުން ކަމަށް ބުނެފައެވެ.
އެ ޚިދުމަތުން އަންނަނީ ގަވައިދާ ޚިލާފަށް ވިޔަފާރި ކުރާ ބިދޭސީން ހޯދުމަށް ބޮޑެތި އޮޕަރޭޝަންތައް ހިންގަމުންނެވެ.