މޯލްޑިވްސް މީޑިއާ ކައުންސިލް (އެމްއެމްސީ)އިން ދިން ނޫސްވެރިކަމުގެ އެވޯޑުގެ މައްސަލަ ބަލަން އެ ކައުންސިލް ހާޒިރުކުރި، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ ބައްދަލުވުން މިއަދު ވެސް ސިއްރުކޮށްފިއެވެ.
އިއްޔެ ވެސް އެމްއެމްސީގެ މެންބަރުން މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުކުރިއެވެ. ނަމަވެސް އެ ކޮމިޓީ ބައްދަލުވުން ވެސް ސިއްރުކުރިއެވެ.
މިއަދު އެ ކައުންސިލްގެ މެންބަރުން ހާޒިރުކުރި ކޮމިޓީ ސިއްރުކުރުމަށް ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އެ ހުށަހެޅުމަށް ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން ވަނީ ތާއީދުކުރައްވާފައެވެ.
ނަމަވެސް އެ ހުށަހެޅުން ފާސްކުރުމަށް އެހި ވޯޓު އިއުލާނު ނުކުރަނީސް ކޮމިޓީގެ ލައިވް ކަނޑާލައި، ކޮމިޓީ ވަނީ ސިއްރުކޮށްފައެވެ.
މި ދެ ދުވަހު ކޮމިޓީއަށް މީޑިއާ ކައުންސިލް ހާޒިރުކޮށްފައި ވާއިރު މިފަހުން މީޑިއާ ކައުންސިލުން ދިން އެވޯޑުގެ މައްސަލަ ބޮޑުވެފައިވަނީ ތަހުގީގީ ނޫސްވެރިކަމުގެ ވީޑިއޯ ކެޓަގަރީން ދިން އެވޯޑަކާ ގުޅިގެންނެވެ.
އެންމެ ފުރަތަމަ އެ ކަން ސަމާލުކަމަށް އައީ އެވޯޑު ހަފުލާ އޮތް ރޭ އެވޯޑުގެ ނޮމިނޭޝަން ޕަބްލިކް ސާވިސް މީޑިއާ (ޕީއެސްއެމް)ގެ ލައިވުން ދެއްކުމާ އެކުއެވެ. އެގޮތުން، ލައިވް ތެރޭ ކުރިއާލައި އެންގުމެއް ނެތި ދެއްކި އެ ކޮންޓެންޓަކީ ޕީއެސްއެމަށް އޮޅުވައިލައި ދެއްކި އެއްޗެއްކަމަށް ތުހުމަތުކޮށް ބަޔާނެއް ނެރުނެވެ. އެއީ އެ ކުންފުނީގެ އެޑިޓޯރިއަލްއާ ޚިލާފު، ނޫސްވެރިކަމުގެ މިންގަނޑުތަކާ ވެސް ޚިލާފު ކޮންޓެއްޓެއް ކަމަށް ބުނެފައިވެއެވެ.
އެ މައްސަލައިގައި، ޕީއެސްއެމްގައި 30 އަހަރަށްވުރެ ގިނަ ދުވަހު ޚިދުމަތްކުރެއްވި، އެމްއެމްސީގެ ރައީސްކަން ކުރައްވާ އަހްމަދު މުސްތަފާ، ކުންފުނީގައި އަދައިކުރައްވަމުން އައި ޓެކްނިކަލް މެނޭޖަރުގެ ވަޒީފާއިން ވެސް ވަކިކުރިއެވެ. ނަމަވެސް، ފަހުން އެނާގެ ވަޒީފާ ވަނީ އިއާދަކޮށްދީފައެވެ.
އެމްއެމްސީ އެވޯޑަށް މި ފަހަރުގެ ހުށަހެޅުންތައް އިންސާފުކުރެއްވި ހަތް ފަނޑިިޔާރުން ވެސް ވަނީ، ތަހުގީގީ ނުސްވެރިކަމުގެ ވީޑިއޯ ކެޓަގަރީން އެވޯޑު ލިބުނު އުފެއްދުމަށް އެވޯޑު ދިނީ އުސޫލާ ޚިލާފަށް ކަމަށް ބުނެ ބަޔާނެއް ނެރެފައެވެ.