"ސްރީލަންކާ ބިޒްނަސް ކައުންސިލް އޮފް ދަ މޯލްޑިވްސް" މިއަދު ރަސްމީކޮށް އިފްތިތާހު ކޮށްފިއެވެ.
މި ކައުންސިލް އިފްތިތާހު ކޮށްދެއްވީ އިކޮނަމިކް މިނިސްޓަރު މުހައްމަދު ސައީދެވެ.
މި ކަމަށް ބޭއްވި ހަފްލާގައި ވާހަކަ ދައްކަވަމުން މިނިސްޓަރު ވިދާޅުވި ރާއްޖެ ތަރައްގީއަށް ކުރަމުންދާ ދަތުރުގައި ސްރީލަންކާއަކީ މުހިންމު ބައިވެރިއެއް ކަމަށެވެ.
އަދި ދެ ގައުމުގެ ދޭތެރޭގައި އުފެދިފައި އޮތް ވިޔަފާރި އަހަރަކު 160 މިލިއަން އެމެރިކާ ޑޮލަރަށްވުރެ އިތުރުވެފައިވާ ކަމަށާއި، އެއަށްވުރެ އެ އަދަދު އިތުރު ކުރެވޭނެ ކަމަށް މިނިސްޓަރު ވިދާޅުވިއެވެ. އަދި ރައީސް ޑރ. މުހައްމަދު މުއިއްޒުގެ އިގްތިސާދީ ސިޔާސަތާއެކު ދެ ގައުމުގެ ދެމެދުގައި އޮތް ވިޔަފާރީގެ ގުޅުން އަލުން ބައްޓަން ކުރެވިގެންދާ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި ރައީސްގެ ސިޔާސަތުގެ ދަށުން ދެމެހެއްޓެނިވި ތަރައްގީއަށް ރާއްޖެއިން ދޭ އަހަންމިއްޔަތު ބިނާވެފައިވަނީ ބައިނަލްއަގުވާމީ ވިޔަފާރީގެ ޓްރެންޑުތަކާ އެއްގޮތަށެވެ.
މި ކަމުގެ ސަބަބުން ވިޔަފާރިތަކަށް ފުރުސަތު އިތުރުވެ، ތިމާވެށީގެ ރައްކާތެރިކަމަށް ފޯކަސް ކުރެވި، ޒިންމާދާރު ވިޔަފާރިއެއް އުފެއްދޭނެ ކަމަށް މިނިސްޓަރު ވިދާޅުވެފައިވެއެވެ. އަދި ރާއްޖޭގެ އައު އިގުތިސާދީ ތަސައްވުރާއެކު ވިޔަފާރިތަކަށާއި، ދާއިރާގެ ފުންނާބު އުސް ތަޖުރިބާކާރުންނަށް ވެސް ފަހި ފުރުސަތުތަކެއް ހުޅުވިގެންދާނެ ކަމަށް ވިދާޅުވިއެވެ.
މިނިސްޓަރު ވިދާޅުވި ގޮތުގައި ސްރީލަންކާއާއި ރާއްޖޭގެ ވިޔަފާރިންގެ ދެމެދުގައި ވަނީ ގުދުރަތީ ގޮތުން އުފެދިފައިވާ ރަހުމަތްތެރި ކަމެކެވެ. އަދި ދެ ގައުމުގެ ވިޔަފާރީގެ ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށް މިނިސްޓަރު ވިދާޅުވިއެވެ.