މި ފެށޭ 2025ވަނަ އަހަރުގެ ދައުލަތުގެ ބަޖެޓު، އެހެން އަހަރުތަކާ ޚިލާފަށް އެކުލަވައިލައިފައިވަނީ ވީހާވެސް ގިނަ މަޝްރޫއުތަކަށް ފުރުސަތު ލިބޭ ގޮތަށް ކަމަށް އިންފްރާސްޓްރަކްޗަރު މިނިސްޓަރު، ޑރ. އަބްދުﷲ މުއްތަލިބު މިރޭ ވިދާޅުވެއްޖެއެވެ.
ގާނޫނުގައި ބަޔާންކޮށްފައި އޮންނަނީ ދައުލަތުން ކޮންމެ އަހަރެއްގެ މައްޗަށް ޚަރަދުކުރާނެ ޕްރޮގްރާމް ބަޖެޓެއް އެކުލަވައިލައި، އެ ބަޖެޓު ރައްޔިތުންގެ މަޖިލީހަށް ހުށަހެޅުމަށެވެ.
މީގެ ކުރިން ދައުލަތުގެ ބަޖެޓުތައް ހަދާފައި ހުންނަނީ ރައްޔިތުންގެ މަޖިލީހުގެ މެންބަރުންގެ ވެސް ވަރަށް ބޮޑު ބައިވެރިވުމަކާއެކު، ދާއިރާތަކުގެ ކޮންމެ ރަށަކަށް ވެސް ބަޖެޓުން ދޭނެ ވަކި އަދަދެއްގެ ފައިސާ ކަނޑައެޅުމަށް ފަހުގައެވެ.
ޕީއެސްއެމްގެ "ރާއްޖެ މިއަދު"ގައި ވާހަކަ ދައްކަވަމުން މިނިސްޓަރު ވިދާޅުވީ ކޮންމެ ރަށަކަށް ވަކި އަދަދަކަށް ދޭނެ ފައިސާ ކަނޑައަޅައިގެން ސަރުކާރު ހިންގޭ ކަހަލަ ބަޖެޓެއް އެކުލަވައިލުމަށް ދަތިވާ ކަމަށެވެ.
"މީގެ ކުރިން އޮންނަ ގޮތަކީ ރަށެއްގެ ނަން ޖަހާފައި، ޕްރޮޖެކްޓުގެ ނަން ޖަހާފައި އޮތީމާ ދެން ސަރުކާރަށް މި ޑިމާންޑް އަންނަނީ ދެން ޕްރޮޖެކްޓު ފަށަން. އޭގެ ބަދަލުގައި މިހާރު އަޅުގަނޑުމެންނަށް މިހާރު ބަޖެޓަކުން ނޭނގޭނެ ކޮން ރަށެއްގެ ކޮން ތަނެއްގައި ކޮން ޕްރޮޖެކްޓެއްކަން ހިންގަނީ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި އަންނަ އަހަރުގެ ބަޖެޓުގެ ދަށުން ރަށްރަށުގައި ޕްރޮޖެކްޓު ހިންގާނީ، ސަރުކާރަށް އާމްދަނީ ލިބޭ މިންވަރަކަށް ބެލުމަށްފަހު، ކެބިނެޓުން ފާސްކޮށްގެންނެވެ. މި ސަރުކާރުން އަންނަ އަހަރަށް ފާސްކުރި ދައުލަތުގެ ބަޖެޓާއެކު، މީގެ ކުރިން ރަށްތަކަށް އެއިން ފައިސާ ބަހާގޮތަށް ހަގީގަތަކަށް ނުހެދޭ ފަދަ ބަޖެޓު ހެދުމުގެ އުސޫލު މި ސަރުކާރުން ނިމުމަކަށް ގެނެސްފައިވާ ކަމަށް މުއްތަލިބު ވިދާޅުވިއެވެ.
މިނިސްޓަރު އިތުރަށް ވިދާޅުވީ ހުރިހާ ތަފްސީލު ނެތި ފާސްކޮށްފައި އޮތް ބަޖެޓުގެ އެންމެ ބޮޑު އެއް ސަބަބަކީ ބަޖެޓުގެ ތެރެއިން ވީހާ ވެސް ގިނަ މަޝްރޫއުތައް ހިންގުމުގެ ފުރުސަތު ވެސް ހޯދުން ކަމަށެވެ.
"އެހެންމާ ހަގީގަތުގައި މި ދެންނެވި ގޮތަށް މުޅި ގައުމަށް، ގައުމުގެ އިގުތިސާދަށް ފައިދާވާ ގޮތަށް، ރައްޔިތުންނަށް އޭގެއިން އެންމެ މަންފާ ލިބޭ ގޮތަށް ބަލާފައި ކަންތައްތައް ކުރުމަށް ފަހިވެގެންދާ ގޮތަށޭ ބަޖެޓު ހެދިފައި މި އޮތީ،" މިނިސްޓަރު ވިދާޅުވިއެވެ.
މި ސަރުކާރުން އަންނަ އަހަރަށް ލަފާކޮށް، ރައްޔިތުންގެ މަޖިލީހަށް 56.6 ބިލިއަން ރުފިޔާގެ ބަޖެޓެއް މިދިޔަ މަހުގެ 31ގައި ވަނީ ހުށަހަޅައިފައެވެ. ނަމަވެސް އެ ބަޖެޓުން ތަފުސީލުތައް ހާމަނުވާ ކަމަށް ބުނެ އިދިކޮޅު އެމްޑީޕީން ވަނީ ކަންބޮޑުވުން ފާޅުކޮށްފައެވެ.
ނިމިދިޔަ އެމްޑީޕީގެ ސަރުކާރުން ދައުލަތުގެ ބަޖެޓަށް ނުތަކާ މިންވަރަށް މަޝްރޫއުތައް ހިމަނައި، އެ މަޝްރޫއުތަކަށް އެކަށީގެންވާ މިންވަރަށް ފައިސާ ހިމަނާފައިނުވާ ކަމަށް ބުނެ މި ސަރުކާރުން ވަރަށް ބޮޑަށް ފާޑުކިޔައެވެ. ނަމަވެސް އިދިކޮޅު އެމްޑީޕީގެ ސަރުކާރުގައި އެ ގޮތަށް، ގިނަ މަޝްރޫއުތަކެއް ބަޖެޓުކޮށްފައި އޮތީ، އެ މަސައްކަތްތައް ވީހާ ވެސް އަވަހަކަށް ނިންމުމުގެ މަގުސަދުގައި ކަމަށް އެ ޕާޓީން ބުނެއެވެ.