އުރީދޫ ފަން ރަންގައި ރަޖިސްޓްރީވުމުގެ މުއްދަތު އަންނަ ހޮނިހިރަށް ހަމަވަނީ

އުރީދޫ ފަން ރަންގައި ރަޖިސްޓްރީވުމުގެ ފުރުސަތު ހަމަވާން ބާކީ ތިން ދުވަހަށް ވެއްޖެއެވެ.

އުރީދޫން ބުނެފައިވަނީ، ޑިސެމްބަރު 20 ވަނަ ދުވަހު ބާއްވާ މި ދުވުމުގައި ހަ އަހަރުން މަތީގެ އެންމެންނަށް ވެސް ބައިވެރިވެވޭނެ ކަމަށާއި މިދުވަމަކީ ފަސް ކިލޯމީޓަރުގެ ދުވުމެއް ކަމަށެވެ.

ފަން ރަންގެ ކިޓްތައް ލިބެން ހުންނާނީ ސްޓޭންޑަޑް ކިޓް އާއި ފަން ކިޓް ކެޓަގަރީންނެވެ. އެގޮތުން، ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭއިރު އޭގެ އަގަކީ 100 ރުފިޔާ ކަމަށް އުރީދޫން ބުނެފައިވެއެވެ.

އޭގެއިތުރުން، 210 ރުފިޔާއަށް ލިބޭ ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި ފޮތި ދަބަސް، އައިނު އަދި ބަންޑާނާ ހިމެނެއެވެ.

އުރީދޫ ފަން ރަންގެ ތެރެއިން: އުރީދޫ ފަން ރަންގައި ރަޖިސްޓްރީވުމުގެ މުއްދަތު އަންނަ ހޮނިހިރަށް ހަމަވަނީ --- ފޮޓޯ/ އުރީދޫ

އެ ދުވުމުގެ އަމާޒަކީ، ދުޅަހެޔޮ ދިރިއުޅުމަކަށް ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫން ބުންޏެވެ. މި ހަރަކާތުގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެއެވެ.

މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފައާއި ޖޮގްކޮށްފައާއި ދުވެފައި ނުވަތަ ނަށަމުންވެސް މި ދުވުން ނިންމިދާނެ ކަމަށް އުރީދޫން ބުނެފައިވެއެވެ.

އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މި ހަރަކާތްތަކުގައި 5،000 އަށްވުރެ ގިނަ މީހުން ބައިވެރިވިއެވެ.