އދ.ގެ ފެރޭމްވޯކް ކޮންވެންޝަން އޮން ކްލައިމެޓް ޗޭންޖްގެ ދަށުން ބާއްވާ ކޮޕް 29ވަނަ ކޮންފަރެންސްގައި ބައިވެރިވެވަޑައިގަތުމަށް ރައީސް ޑރ. މުޙައްމަދު މުއިއްޒު އަޒަރްބައިޖާންގެ ބާކޫއަށް ވަޑައިގެންފިއެވެ.
އިއްޔެ ފަށާފައިވާ ކޮޕް 29 ބާއްވާނީ މި މަހުގެ 22 ވަނަ ދުވަހާ ހަމައަށެވެ.
ރައީސް އޮފީހުން ބުނި ގޮތުގައި، ހައިދަރް އަލިޔޭވް ބައިނަލްއަޤުވާމީ ވައިގެ ބަނދަރުން ރައީސް މުއިއްޒަށް އަޒަރްބައިޖާން ސަރުކާރުގެ އިސް އޮފިޝަލުން ވަނީ ހޫނު މަރުޙަބާއެއް ދަންނަވާފައިވާ ކަމަށެވެ.
ކޮޕް29ގެ އެޖެންޑާގައި، އެން ހޭންސްޑް ޓްރާންސްޕޭރެންސީ ނެޓްވޯކް ފުރިހަމަ ކުރުމަށާއި ހުރިހާ މެންބަރުން ހިއްސާކުރާ މާލީ އައު ލަނޑުދަނޑިއެއް ކަނޑައެޅުމަށާއި ބައިނަލްއަޤުވާމީ ގޮތުން އެއްބާރުލުންދިނުން އިތުރުކުރުމުގެ އިތުރުން ނޭޝަނަލީ ޑިޓަރމައިންޑް ކޮންޓްރިބިއުޝަންސް (އެންޑީސީ) ތަރައްޤީކުރުމުގައި ހުރި ގޮންޖެހުންތަކުން އަރައިގަނެވޭނޭ ގޮތްތަކާމެދު މަޝްވަރާކުރުމަށް ސަމާލުކަން ދިނުމަށް ވަނީ ނިންމާފައިވާ ކަމަށް އެ އޮފީހުން ބުނެފައިވެއެވެ.
މީގެއިތުރުން، ރައީސް މުއިއްޒު އަޒަރުބައިޖާނަށް ވަޑައިގަތީ ސައުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ ދަޢުވަތަކަށް އެ ގައުމުގެ ވެރިރަށް ރިޔާދުގައި ބޭއްވި ޖޮއިންޓް ޢަރަބް-އިސްލާމިކް އެކްސްޓްރާއޯޑިނަރީ ސަމިޓުގައި ބައިވެރިވެވަޑައިގަތުމަށް ފަހުގައެވެ.
އެ ސަމިޓުގައި އެމަނިކުފާނު ވަނީ އިޒްރޭލުގެ އިސްތިޢުމާރީ ބާރުތަކުން ފަލަސްޠީނާއި ލުބްނާނަށް ދެމުންދާ ހަމަލާތަކާމެދު ސަރަހައްދީ އަދި އިސްލާމީ ޤައުމުތަކުގެ އިސްވާރުން ކުރެއްވި މަޝްވަރާގައި ބައިވެރިވެވަޑައިގެންފައެވެ.
މި ދަތުރުފުޅުގައި ރައީސްގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވާ ކަމަށް ރައީސް އޮފީހުން ބުނެފައިވެއެވެ.