އައިފިލްމްސްއާއި ކަޒްމިކް އިންޓަނޭޝަނަލްއިން އެންމެ އަވަހަށް ދެން ގެނެސްދިނުމަށް ހަމަޖެހިފައިވާ "ދޭދަރު ރުއިން"ގެ ޓިކެޓު ވިއްކަން ފަށައިފިއެވެ.
ދެ ކުންފުނި ގުޅިގެން އަލަށް ނެރުމަށް ހަމަޖެހިފައިވާ ފިލްމު ދޭދަރު ރުއިން އިއުލާނުކޮށްފައިވަނީ މިދިޔަ ސެޕްޓެމްބަރު މަހުގެ ތެރޭގައެވެ.
އަންނަ ހަފުތާ ބުދަ ދުވަހުގެ ރޭގައި ޕްރިމިއާ ކުުރުމަށް ހަމަޖެހިފައިވާ މި ފިލްމުގެ ޓިކެޓު މިހާރު ވަނީ ވިއްކަން ފަށައިފައެވެ. އޮލިމްޕަހު ޓިކެޓު ކައުންޓަރުން ފިލްމުގެ ޓިކެޓު ގަންނަން ލިބޭއިރު 7242555 ގުޅައިގެން ވެސް ޓިކެޓް ބުކް ކުރެވޭނެ އެވެ.
އައިފިލްމްސްއާއި ކަޒްމިކަށް އެކްޝަން ތުރިލާއަކީ އާ ޖޯންރާއެއް ނޫނެވެ. އެގޮތުން، އައިފިލްމްސްއިން ވަނީ "ނީނާ" ފަދަ ވަރުގަދަ އެކްޝަން ތުރިލާ ރިލީޒްކޮށްފައެވެ. އަދި، ކަޒްމިކްއިން ވަނީ "ދަރަކަ" ގެނެސްދީފައެވެ.
ނަމަވެސް މި ފިލްމަކީ ދިވެހި ފިލްމު އިންޑަސްޓްރީއަށް ވަރަށް ތަފާތު ފިލްމަކަށް ވާނެ ކަމަށް ޕްރޮޑަކްޝަނުން ބުނެއެވެ. އެގޮތުން އިންސާނީ ވަގުފާރިއަށް ރާއްޖޭގައި އަލިއަޅުވާލާ ފުރަތަމަ ފިލްމަށް މި ފިލްމު ވެގެން ދާނެ ކަމަށް ޕްރޮޑަކްޝަނުން ބުނެއެވެ.
މީގެއިތުރުން ރޭވިގެން ކުރެވޭ ކުށްތަކާއި ގެވެށި އަނިޔާއާއި ކުޑަކުދިންނަށް ނުރައްކާވުމާއި ކުޑައިރު ލިބޭ ނަފްސާނީ ގެއްލުމަށް ވެސް މި ފިލްމުގައި އަލިއަޅުވާލާނެ ކަމަށް ޕްރޮޑަކްޝަނުން ބުނެއެވެ.
ދޭދަރު ފިލްމުގައި ލީޑުން ފެންނާނީ މި ވަގުތު ދިވެހި ފިލްމު އިންޑަސްޓްރީގައި ލީޑް ރޯލުން އެންމެ ޑިމާންޑު ބޮޑު އެއް ތަރި ކަމަށްވާ ޝަރަފުއްދީން އަބްދުﷲ އެވެ. އެގޮތުން، މި އަހަރު މިހާތަނަށް ނެރުނު ތިން ފިލްމަކުން ވެސް އޭނާ ވަނީ ފެނިގެން ގޮސްފައެވެ. އެއީ، "ފުރޭތަ" އާއި "ކަންބަޅި" އަދި "މީ އިޝްގު" އެވެ.
ޝަރަފްގެ އިތުރުން ފިލްމުގެ މުހިއްމު ރޯލުން ދެން ފެންނާނީ މައިހާ އާދަމް ޒާހިރުއެވެ. ފިލްމުގެ އިތުރު ރޯލަކުން ނޭޕަލްގެ އެކްޓަރެއް ކަމަށްވާ ސުޝްމާ ސުބޭދީ ވެސް ފެންނާނެ ކަމަށް ޕްރޮޑަކްޝަނުން ވަނީ ހާމަކޮށްފައެވެ.
މި ފިލްމުގެ ޑައިރެކްޝަންގެ މަސައްކަތްކުރަނީ އަހްމަދު އައްޒާމެވެ. މި ފިލްމުގެ ޕްރޮޑިއުސަރުންގެ ގޮތުގައި މަސައްކަތްކުރާނީ އައިފިލްމްސްގެ މޮޅެތި ފިލްމުތައް ގެނެސްދިން އިލްޔާސް ވަހީދެވެ.
އިލްޔާސްގެ އިތުރުން ފިލްމުގެ ޕްރޮޑަކްޝަންގައި އާސިމް އަލީ ވެސް މަސައްކަތްކުރާނެއެވެ.