އިންޓާއާ އެއްވަރުވެ، ނަޕޯލީއަށް ހާސްކަން

އިޓާލިއަން ސެރީއާގައި އެންމެ ފަހުގެ ޗެމްޕިއަން އިންޓާ މިލާނާއި އެއްވަނައިގައި އޮތް ނަޕޯލީ ބައްދަލުކުރި މެޗު އެއްވަރުވެއްޖެއެވެ.

އިންޓާގެ ދަނޑުގައި ކުޅުނު މި މެޗު ނިމުނީ 1-1 އިން ދެ ޓީމުގެ އެއްވަރުވެގެންނެވެ.

މެޗުގެ 23 ވަނަ މިނެޓުގައި ނަޕޯލީންވަނީ މެޗުގެ ލީޑު ވެސް ނަގައިފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ސްކޮޓް މެކްޓޮމިނޭއެވެ. މެޗުގެ ނަތީޖާ އިންޓާއިން އެއްވަރުކޮށްފައިވަނީ ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ހަކާން ޗަލަނޮގްލޫ ނަޕޯލީގެ ގޯލަށް ވަރަށް ދުރުން ފޮނުވާލި ހަމަލާއަކުންނެވެ.

މެޗުގައި އިންޓާއަށް ޕެނަލްޓީއެއް ލިބިގެން ދިޔަ ނަމަވެސް މިހާތަނަށް ޖެހި 19 ޕެނަލްޓީ ވެސް ކާމިޔާބުކޮށްފައިވާ ޗަލަނޮގްލޫ ފޮނުވާލި ޕެނަލްޓީ ދިޔައީ ދަނޑި ކައިރިން ބޭރަށެވެ.

މިމެޗު އެއްވަރުވުމާ އެކު ތާވަލުގެ އެއްވަނައިގައި ނަޕޯލީގެ ލީޑު މިހާރު ވަނީ އެއް ޕޮއިންޓަށް ކުޑަވެގެން ގޮސްފައެވެ.

ނަޕޯލީ ތާވަލްގެ އެއްވަނައިގައި މިހާރު އޮތީ ކުޅުނު 12 މެޗުން ލިބިފައިވާ 26 ޕޮއިންޓާ އެކުގައެވެ. އަދި، 25 ޕޮއިންޓާ އެކު ދެވަނަ، ތިންވަނަ އަދި ހަތަރުވަނައިގައި އުޅެނީ އެޓަލާންޓާ، ފިއޮރެންޓީނާ އަދި އިންޓާއެވެ.

މި މުބާރާތުގައި އެޓަލާންޓާއާއި އުދިނޭސީ ބައްދަލުކުރި މެޗު 2-1 އިން ކާމިޔާބުކޮށްފައިވަނީ އެޓަލާންޓާއިންނެވެ.

މެޗުގެ ފުރަތަމަ ލަނޑު ފުރަތަމަ ހާފުގެ އިތުރު ވަގުތުގައި އުދިނޭސީގެ ހަސާން ކަމާރާ ޖަހާ އެޓީމަން ލީޑު ނަގައިދީފައިވަނިކޮށް، އެޓަލަންޓާއިން ކާމިޔާބުކުރި ދެ ލަނޑު ލަނޑުގެ ތެރެއިން ފުރަތަމަ ލަނޑު މެޗުގެ 56 ވަނަ މިނެޓުގައި މާރިއޯ ޕަސަލިޗް ޖަހައިދިންއިރު ފަހު ލަނޑަކީ އޭގެ ހަތަރު މިނެޓު ފަހުން އުދިނޭސީގެ އިސާކް ތޯރޭ އަތުން ބައިކޮޅަށް ވަން ލަނޑެކެވެ.

މެޗުން ބަލިވުމުން އުދިނޭސީ އޮތީ 16 ޕޮއިންޓާ އެކު ތާވަލުގެ ނުވަވަނައިގައެވެ.