ކާބޯތަކެތީގެ ރައްކާތެރިކަން ކަށަވަރުކުރާށާއި މޫސުމީ ބަދަލުތަކާ ދެކޮޅަށް ދިވެހިރާއްޖެއިން ކުރަމުން އަންނަ މަސައްކަތަށް އޭޝިއަން ޑިވޮލޮޕްމަންޓް ބޭންކް (އޭޑީބީ)ން 21 މިލިއަން ޑޮލަރު ދޭން ނިންމައި، މިއަދު އިއުލާނުކޮށްފިއެވެ.
އޭޑީބީން އިއުލާނުކުރި ޕެކޭޖުގައި ހިމެނެނީ ހަތަރު މިލިއަން ޑޮލަރުގެ ލުއި ލޯނަކާއި އެންމެ ފަގީރު އަދި ތަރައްގީވަމުން އަންނަ ގައުމުތަކަށް އެ ބޭންކުން ދޭ 17.95 މިލިއަން ޑޮލަރުގެ ހިލޭ އެހީއެކެވެ.
އެ ބޭންކްގެ އިކޮނަމިސްޓް މިޗިކޯ ކަޓަގަމި ވިދާޅުވީ، ރާއްޖޭގެ ގިނަ ރަށްތަކާއި އަތޮޅުތައް ހުންނަނީ ލޮނުގަނޑަށްވުރެ އެއް މީޓަރު އުހުގައި ކަމަށެވެ. އެހެންވެ، މޫސުމީ ބަދަލުތަކަށް ރާއްޖެއަކީ ވަރަށް ނާޒުކު ގައުމެއްކަން އޭނާ ފާހަގަކުރެއްވިއެވެ. އަދި، ކޮޅިގަނޑުތައް އިތުރުވުމުގެ ސަބަބުން މުސްތަގުބަލަށް ރާއްޖޭގެ ކާބޯތަކެތީގެ ރައްކާތެރިކަމާ މެދު ވެސް ކަންބޮޑުވުން ހުރިކަން އޭނާ ފާހަގަކުރެއްވިއެވެ.
މި އެހީގައި އައްޑޫ ސިޓީއާއި މާލޭގައި ހުރި އާލީ ވާނިން ސިސްޓަމްތައް އަޕްގްރޭޑްކުރަން ވަނީ ނިންމައިފައެވެ. އެ ސިސްޓަމްތައް ގާއިމިކުރުން ވަގުތުން މޫސުމާއި އާލީ ވާނިން ސިސްޓަމްތައް މޮނިޓާކުރެވޭނެއެވެ.
މީގެ އިތުރުން، މި ފައިސާއިން ކުޅުދުއްފުށި ސިޓީގައި ފެން ބޮޑުވުން ހައްލުކުރަން ފެން ހިންދާ ނިޒާމާއި ފިލްޓަރޭޝަން ނިޒާމު ގާއިމުކުރަން ވަނީ ނިންމާފައެވެ. އަދި، އެ ސިޓީގެ ކަނޑޫފާ ސަރަހައްދު އަލުން އާލާކޮށް، ގުދުރަތީ ވެށި ހިމާޔަތްކުރާނެ ކަމަށް ވެސް އޭޑީބީން ވަނީ ބުނެފައެވެ.
މި އެހީގައި އައްޑޫ ސިޓީއާއި ހއ. އަތޮޅުގައި ކްލައިމެޓް ސްމާޓް އާބަން ފާމިން ޓެކްނޮލޮޖީ ތައާރަފުކުރާނެ ކަމަށް ވެސް އޭޑީބީން ބުނެފައިވެއެވެ. އަދި، ހދ. ހަނިމާދޫ އެގްރިކަލްޗާ ސެންޓަރުގައި ދިރާސާ ކުރެވޭނެ މަލްޓިޕާޕަސް ފެލިޓީއެއް ބިނާކުރަން ވެސް ވަނީ ނިންމައިފައެވެ.