ރޭ ރާއްޖޭގައި ފެށި ބޮޑީބިލްޑީން މުބާރާތާއި ގުޅިގެން އެ ޖަމިއްޔާއަށް އަމާޒުވި ފާޑުކިޔުންތަކާ އެއްކޮށް، އެކަމަށް ބޮޑީބިލްޑިން އެސޯސިއޭޝަނުން މިއަދު މައާފަށް އެދިއްޖެއެވެ.
އެ ޖަމިއްޔާއިން މިއަދު ނެރުނު ނޫސްބަޔާނެއްގައި ބުނީ، ރާއްޖޭގައި މިކަހަލަ ބައިނަލްއަގުވާމީ މުބާރާތެއް ހޮސްޓުކުރަން މަސައްކަތް ކުރީ ގައުމުގެ ނަން ބައިނަލްއަގުވާމީ ކުޅިވަރުގެ ދާއިރާގައި ރަނގަޅު ކުރުމަށް ކަމަށާއި އެ ކަމަކުގެ ސަބަބުން ރާއްޖޭގެ ފަތުރުވެރިކަމާއި އިގްތިޞާދަށް ލިބޭނެ ކުރިއެރުންތަކަށް ބަލައިގެން ކަމަށެވެ.
މިގޮތުން، މި މުބާރާތް ރާއްޖޭގައި ހޮސްޓު ކުރަން ފުރުސަތު ލިބުނީ އެހެން ގައުމުތަކާ ވާދަކޮށް، ދުރާލާ މަސައްކަތް ކޮށްގެން ކަމަށް އެ ޖަމިއްޔާއިން ބުނެފައިވެއެވެ.
ހަމައެއާއެކު އެ މުބާރާތް ބާއްވަން ނިންމީ، ކޮންޓްރެކްޓު ހެދުމަށްފަހު މުބާރާތް ނުބާއްވަން ނިންމައިފިނަމަ ރާއްޖޭގެ ކުޅިވަރު އެސޯސިއޭޝަންތަކަށް، މާލީ ގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަކަށް ވިސްނުމަށް ފަހުގައި ކަމަށް އެ އެސޯސިއޭޝަނުން ބުނެއެވެ.
މީގެއިތުރުން، މުބާރާތް ބޭއްވީ ފަތުރުވެރިން ދިރިއުޅޭ ވައްޓަފާޅިއާ އެއްގޮތަށް އުޅެވޭ ރިސޯޓެއް ކަމަށްވާ ކެނެރީފް ރިސޯޓުގައި ކަމަށާއި ރައީސް ޑރ. މުޙައްމަދު މުއިއްޒާއި ސްޕޯޓްސް މިނިސްޓްރީން ދީފައިވާ އިރުޝާދާ އެއްގޮތަށް އެ މުބާރާތް ކުރިއަށް ގެންދަން މަސައްކަތް ކުރި ކަން ބޮޑީބިލްޑިން އެސޯސިއޭޝަނުން ވަނީ ފާހަގަކޮށްފައެވެ.
ނަމަވެސް، މުބާރާތާ ގުޅުވައި ފެތުރެމުންދާ ޚަބަރުތަކުން އާންމުންގެ ކަންބޮޑުވުންތައް ހުރިކަން ފާހަގަކޮށް އެ ޖަމިއްޔާއިން ވަނީ އެ ކަމަށްޓަކައި އާންމުންނާއި ރައީސް މުއިއްޒުގެ ކިބައިން މައާފަށް އެދިފައެވެ.
"މުސްތަގްބަލުގައި މި ފަދަ ކަމެއް ތަކުރާރުނުވާނެ ކަމުގެ ޔަގީންކަން އަރުވަމެވެ" އެ ޖަމިއްޔާއިން ބުނެފައިވެއެވެ.
ފާހަގަކޮށްލެވޭ ގޮތުގައި، މި މުބާރާތަށް ގިނަ އާންމުންގެ ނުރުހުން އަމާޒުވީ، ދެ ޖިންސުގެ މީހުން އެއްކޮށް، ނިވާކަން ކުޑަ ހެދުމެއްގައި ސްޓޭޖުމަތިން ފެނުމާއި އެ މުބާރާތް ފެށުމުގެ ކުރިން ގުރުއާން ކިޔެވުމުންނެވެ.