ވޮޝިންޓަން (10 ނޮވެންބަރު 2024) : އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕާ ދެކޮޅަށް އެމެރިކާގެ ބައެއް ސްޓޭޓްތަކުގެ އިސްވެރިން ވާހަކަދައްކަވައި ޓްރަމްޕަށް އެއްބާރުލުން ނުދޭނެކަމުގެ އިންޒާރު ދޭން ފައްޓަވައިފިއެވެ.
ޓްރަމްޕަށް އިންޒާރުދެއްވި ގަވަރުނަރުންގެ ތެރޭގައި އެމެރިކާގައި އިގުތިސާދީ ގޮތުން އެންމެ ބާރުގަދަ ސްޓޭޓްކަމަށްވާ ކެލިފޯނިޔާގެ ގަވަރުނަރު ގަވިން ނިއުސޮމް ހިމެނެއެވެ. ޓްރަމްޕަށް އިންޒާރު ދެއްވަމުން އިއްޔެ އޭނާ ވިދާޅުވީ، އެމެރިކާގެ ފެޑްރަލް ނިޒާމުގައި ސްޓޭޓްތަކަށް ބޮޑު ބާރެއް ލިބިފައިވާ ކަމަށާއި އެކަން ޓްރަމްޕް ހަނދާން ކުރައްވަން ޖެހޭނެ ކަމުގައެވެ.
ޓްރަމްޕާ އިދިކޮޅު ޑިމޮކްރެޓިކް ޕާޓީއަށް ނިސްބަތްވާ ނިއުސޮމް ވިދާޅުވީ، ހިޖުރަވެރިން ބޭރުކުރުމާއި ތިމާވެއްޓާދެކޮޅަށް ކުރަން ޓްރަމްޕް ނިންމަވާފައިވާ ކަންކަމަށް އޭނާގެ ސްޓޭޓުން އެއްބާރުލުން ނުދޭނެކަމުގައެވެ.
ޓްރަމްޕާ ދެކޮޅަށް ކުރެވޭނެ އެތައް ކަމެއް އެބަހުރިކަން ފާހަގަކުރައްވަމުން އޭނާ ވިދާޅުވީ، ޓްރަމްޕް ބޭނުންވާ ގޮތަށް އެމެރިކާގެ ހުރިހާ ކަމެއް ކުރެވޭނެ ކަމަށް ޓްރަމްޕާއި އެ މަނިކުފާނުގެ ޓީމުން ދެކޭނަމަ މުސްތަގުބަލު ވަރަށް ގޯސްވާނެ ކަމުގައެވެ.
އެމެރިކާގައި ޣައިރު ގާނޫނީ ގޮތުން ދިރިއުޅޭ އެތައް މިލިއަން ހިޖުރަވެރިން އުޅޭއިރު ފުލުހުންނާއި ސިފައިން ނެރެ އެ މީހުން ހައްޔަރުކޮށްގެން ޖަމާއީކޮށް އެ މީހުން އެމެރިކާއިން ބޭރުކުރާނެ ކަމަށް ރިޔާސީ ކޭންޕެއިންގައި ޓްރަމްޕްވަނީ ވިދާޅުވެފައެވެ. މިއީ ޓްރަމްޕްގެ ރިޔާސީ ވައުދެއް ވެސް މެއެވެ.
ކެލިފޯނިޔާގެ ގަވަރުނަރު ނިއުސޮމް ވިދާޅުވީ، ކެލިފޯނިޔާގައި މިކަން މިގޮތަށް ކުރުމުގެ ފުރުސަތު ޓްރަމްޕަށް ނުދޭނެ ކަމުގައެވެ. ކެލިފޯނިއާގެ އިގުތިސާދަކީ ގާތްގަނޑަކަށް ހަތަރު ޓްރިލިއަން ޑޮލަރުގެ ބޮޑު އިގުތިސާދެކެވެ. މިއީ ޔޫރަޕްގެ ބޮޑު ބާރެއްކަމަށްވާ އިނގިރޭސިވިލާތުގެ އިގުތިސާދަށް ވުރެ ވެސް ބޮޑު އިގުތިސާދެކެވެ. އަދި، ފަރަންސޭސިވިލާތުގެ އިގުތިސާދަށްވުރެ ވެސް ބޮޑު އިގުތިސާދެކެވެ. ކެލިފޯނިއާގެ އިގުތިސާދަކީ ގާތްގަނޑަކަށް ބިޔަ އިންޑިއާގެ އިގުތިސާދާ ދާދި އެއްވަރުގެ އިގުތިސާދެކެވެ.
ކެލިފޯނިޔާގެ އެޓާނީ ޖެނެރަލް ރޮބް ބޮންޓާ ވެސް ވަނީ ޓްރަމްޕާ ދެކޮޅަށް ގާނޫނީ ގޮތުން ހަރަކާތްތެރިވާނެކަމުގެ އިންޒާރު ދެއްވާފައެވެ. ސެންފްރަންސިސްކޯގެ ގޯލްޑަން ގޭޓް ބްރިޖް ސަރަހައްދުގައި އިއްޔެ ބޭއްވި އެއްވުމެއްގައި ބޮންޓާ ވިދާޅުވީ، ޓްރަމްޕް ބޭނުންހާ ގޮތެއް ހަދަން ގައުމު ދޫކޮށްނުލެވޭނެ ކަމުގައެވެ.
ޓްރަމްޕްގެ ދެވަނަ ދައުރުގައި ކުރިމަތިވާނެ ގޮންޖެހުންތަކަށް ގާނޫނީ ގޮތުން ކުރުމަތިލުމަށް ކެލިފޯނިޔާ ތައްޔާރުވަމުން ދާކަމަށް އޭނާ ވިދާޅުވިއެވެ. ބޮންޓާ ވިދާޅުވި ގޮތުގައި ޓްރަމްޕްގެ ފުރަތަމަ ދައުރުގައި ދޫދިން ގޮތެއް ދެވަނަ ދައުރުގައި ދޫ ނުދިނުމަށް އެމެރިކާގެ ގިނަ ސްޓޭޓްތަކުން މަސައްކަތް ކުރާނެ ކަމުގައެވެ.
"ވެރިކަމުގެ ނާޖާއިޒު ފައިދާ ނެގުމުގެ ފުރުސަތު ދެވަނަ ދައުރުގައި ޓްރަމްޕަށް ނުދިނުމަށް އެމެރިކާގެ އެތައް ސްޓޭޓަކުން ގާނޫނީ ގޮތުން ތައްޔާރު ވަމުން އެބަދޭ،" ބޮންޓާ ވިދާޅުވިއެވެ.
ޓްރަމްޕާ ދެކޮޅަށް ތެދުވާނެ ސްޓޭޓްތަކުގެ ތެރޭގައި ކެލިފޯނިޔާ ކުރީ ސަފުގައި އޮންނާނެ ކަމަށް ވެސް އޭނާ ވިދާޅުވިއެވެ. ރިޕޯޓްތައް ބުނާގޮތުން ޓްރަމްޕްގެ ސިޔާސަތުތައް ތަންފީޒުކުރަން ދެވަނަ ދައުރުގައި އޭނާއަށް ބޮޑު ގޮންޖެހުމެއް ކުރިމަތިވާނެެއެވެ.
ޑިމޮކްރެޓިކް ޕާޓީގެ ސްޓޭޓް ސަރުކާރުތައް އޮންނަ ސްޓޭޓްތަކުން ޓްރަމްޕާ ދެކޮޅަށް ގާނޫނީ ގޮތުން ތެދުވުމުގެ އިތުރުން އޭނާގެ ބައެއް ސިޔާސަތުތައް ތަންފީޒުކުރުމަށް އެ ސްޓޭޓްތަކުން އެއްބާރުލުން ނުދިނުމަކީވެސް އެކަށީގެންވާ ކަމެކެވެ.
ޑިމޮކްރެޓުންނަކީ އެއްޖިންސުން ގުޅުން ހިންގުމާއި އެއްޖިންސުން ކައިވެނިކުރުމާއި ޓްރާންސް ޖެންޑާ އަދި ފެމިނިޒަމް ފަދަ އާއިލީ ތަބީއީ ދިރިއުޅުން ހަލާކުކޮށްލާ ފަނާކުރަނިވި ފިކުރުތައް ފެތުރުމުގެ ޕާޓީއެކެވެ. މިއާ ޚިލާފަށް ޓްރަމްޕަކީ އެމެރިކާގައި ކުރިން އޮތް ކޮންޒަވެޓިވް އާއިލީ ފިކުރަށް ތަބާވާ ބޭފުޅެކެވެ.
ކުރިން 1960 ގެ އަހަރުތަކުގައި އެމެރިކާގައި އުފެދުނު ފިކުރެއްކަމަށްވާ ފެމިނިޒަމްއަކީ އަންހެނުންނާއި ފިރިހެނުން ޖައްސައި، ދެ ޖިންސް ފިތުނަވެރިކުރުވާ ފަނާކުރަނިވި ފިކުރެއްކަމަށް ޓްރަމްޕްވަނީ ސިފަކުރައްވައިފައެވެ. އެއީ، އަންހެނުންގެ ހައްގުތައް ހޯދައިދޭ ފިކުރެއް ނޫންކަމާއި އެއީ އާއިލީ ދިރިއުޅުން ހަލާކުކޮށްލާ އަދި އެމެރިކާގައި ވެސް ފަހުން ފެއިލްވެފައިވާ އައިޑިއޮލޮޖިކަލް ހަރަކާތެއް ކަމަށް ޓްރަމްޕް ވަނީ ސިފަކުރައްވާފައެވެ.
ޓްރަމްޕަކީ ޑިމޮކްރެޓުން ޕްރޮމޯޓްކުރާ އެބޯޝަނާއި އެއް ޖިންސުން ގުޅުން ހިންގުމާއި އެއް ޖިންސުން ކައިވެނިކުރުންފަދަ ލެބަރަލް ފިކުރުތަކާ ވެސް ވަރަށް އިދިކޮޅު ބޭފުޅެކެވެ.
ކެލިފޯނިއާގެ އިތުރުން ޑިމޮކްރެޓިކް ޕާޓީގެ ވެރިކަންތައް އޮންނަ ސްޓޭޓްތައްކަމަށްވާ ވޮޝިންޓަން، ނިޔުޔޯކް، އިލިނޯއި އަދި އޮރިގަން ފަދަ ސްޓޭޓްތަކުގެ ގަވަރުނަރުން ވެސް ވަނީ ޓްރަމްޕަށް އިންޒާރުދެއްވާފައެވެ.
ނިޔުޔޯކްގެ އަންހެން ގަވަރުނަރު ކެތީ ހޮޝޯލްވަނީ ނިއުޔޯކްގެ ރައްޔިތުން ގެތެރޭގައި ހިމެނޭ އެއް ޖިންސުން ގުޅުން ހިންގާ މީހުންނާއި ޓްރާންސް ޖެންޑާ ނުވަތަ ޖިންސު ބަދަލުކޮށްގެން އުޅޭ މީހުންނަށް ގޯނާކޮށް އެ މީހުންގެ ޖިންސީ މިނިވަންކަމަށް ހުރަސްއަޅަން ޓްރަމްޕް މަސައްކަތްކޮށްފިނަމަ ފިސާރި ވަރުގަދައަށް އޭނާއަށް ދެކޮޅަށް ތެދުވާނެކަމުގެ އިންޒާރު ދެއްވާފައެވެ.
ނަމަވެސް، ޓްރަމްޕްގެ ރިޕަބްލިކަން ޕާޓީ ވަނީ އެމެރިކާގެ ޕާލަމެންޓްގައި ހިމެނޭ ސެނެޓްގެ އަޣްލަބިއްޔަތު ވެސް ހޯދާފައެވެ. އަދި، ހައުސް އޮފް ރެޕްރެޒެންޓެޓިވްސްގެ އަޣްލަބިއްޔު ހޯދުމާ ވެސް މިހާރު ރިޕަބްލިކަން ޕާޓީ އުޅެނީ ވަރަށް ކައިރީގައެވެ.