ކަރެކްޝަންސްއިން ބަލާ މައްސަލައަކާ ގުޅިގެން އޭސީޕީ އާސިފް ސަސްޕެންޑުކޮށްފި

މޯލްޑިވްސް ކަރެކްޝަނަލް ސާވިސްއިން ބަލަމުން އަންނަ މައްސަލައަކާ ގުޅިގެން، އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް ސަސްޕެންޑުކޮށްފިއެވެ.

ކަރެކްޝަންސްއިން "ސަން"އަށް މައުލޫމާތު ދިން ގޮތުގައި، އާސިފް ސަސްޕެންޑުކޮށްފައިވަނީ އިއްޔެއެވެ. އޭނާ ސަސްޕެންޑުކޮށްފައިވަނީ މިހާރު ބަލަމުންދާ މައްސަލައަކާ ގުޅިގެން ކަމުން، އެކަމާ ގުޅޭ އިތުރު މައުލޫމާތު ހިއްސާކުރެވެން ނެތް ކަމަށް ކަރެކްޝަންސްއިން ބުންޏެވެ.

އާސިފް އިސްކޮށް ހުންނަވާ ޕްރިޒަންސް ކުލަބުގެ އެކައުންޓުން 200،000 ރުފިޔާއަށް ވުރެ ގިނަ ފައިސާ އެކިއެކި އެކައުންޓުތަކަށް ޖަމާކުރި މައްސަލައެއް މިދިޔަ ޖުލައި މަހުގެ ތެރޭގައި ފެންމަތިވެފައިވާ ކަމަށް ދިވެހި އޮންލައިން ނޫހެއްގައި ރިޕޯޓުކޮށްފައިވެއެވެ.

'ދައުރު' ނޫހުގައިވާ ގޮތުން އެ މައްސަލައާ ގުޅިގެން ކަރެކްޝަންސްގެ މުވައްޒަފުން އާސިފަށް ތުހުމަތުތައްކޮށް، އެ މައްސަލަ ބަލައި ދިނުމަށް އެދިފައެވެ.

އާސިފް އޭސީޕީގެ މަގާމަށް އައްޔަންކޮށްފައި ވަނީ 2019 ވަނަ އަހަރުގެ ސެެޕްޓެމްބަރު މަހުގެ ތެރޭގައެވެ. އޭގެ ކުރިން އޭނާ ހުންނެވީ މާލޭ ޖަލު ހިންގުމުގައި އިސްކޮށް، ސުޕްރިޓެންޑެންޓްގެ މަގާމުގައެވެ.