އެމްޑީޕީއިން ވެރިކަމަށް އައިސް އެންމެ ފުރަތަމަ ވެސް ގެއްލުވާލީ އާންމުންގެ ތެރޭގައި އޮތް މަސްލަހަތު ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު މުޙައްމަދު ފަޒީލް ވިދާޅުވެއްޖެއެވެ.
ސިޔާސީ ޕާޓީތަކުގެ ގާނޫނަށް ހުށަހަޅާފައިވާ އިސްލާހުތަކާއި ގުޅޭގޮތުން އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަ ދައްކަވަމުން ރާއްޖޭގައި އޮތް އެންމެ ބޮޑު ސިޔާސީ ޕާޓީ އެމްޑީއަށް ފާޑު ވިދާޅުވެ ފަޒީލް ވިދާޅުވީ އެމްޑީޕީއިން ވެރިކަމަށް އައުމަށްފަހު އެންމެ ފުރަތަމަވެސް ކުރި ކަމަކީ އާންމުންގެ ތެރޭގައި އެކަކު އަނެކަަކަށް އޮންނަ އިޚްތިރާމް ގެއްލުވާލުން ކަމަށެވެ.
އަދި އެމްޑީޕީއިން ދެކޭގޮތުގައި ޑިމޮކްރަސީއަކީ އެކަކު އަނެކަކާއި ދިމާލަށް ހަޑިހުތުރު ބަހުން ވާހަކަދެއްކެން ކަމުގައި ފަޒީލް ވަނީ ސިފަކުރައްވާފައެވެ. އޭނާ ވަނީ އެއީ ޑިމޮކްރަސީއެއް ނޫން ކަމަށާއި އެއީ ދެކެން ބޭނުންވާ ވެސް ޑިމޮކްރަސީއެއް ނޫން ކަމަށެވެ.
"އެއީ އަޅުގަނޑުމެން ދެކެން ބޭނުންވާ ޑިމޮކްރަސީއެއް ނޫން. އަދި އަޅުގަނޑުމެން ގަބޫލެއް ނުކުރަން ރައްޔިތުންގެ މެޖޯރެޓީ އެގޮތަށް އެކަން ބަލައިގަންނަ ކަމަކަށް ވެސް. އެކަކު އަނެކަކަށް ވަގަށް ގޮވުން، ހަޑިހުތުރު ބަހުން އެއްޗެހި ކިޔުން މިއީ އެމްޑީޕީގެ ފަލްސަފާ،" މެމްބަރު ފަޒީލް ވިދާޅުވިއެވެ.
ފަޒީލް ވިދާޅުވީ އެމްޑީޕީއަކީ އަބަދުވެސް އެ ފަދަ ބޭއަދަބީ ގޮތަކަށް މަސައްކަތް ކުރަމުން ދިޔަ ސިޔާސީ ޕާޓީއެއް ކަމަށެވެ. އަދި އެ ޕާޓީގެ މެމްބަރުން މަޖިލީހުގައި ތިބެގެން މަޖިލީހުގެ ތަކެއްޗަަށް ގެއްލުންދިނުމާއި މަޖިލީސް ފްލޯގައި ގާނޫނު އަސާސީގެ މައްޗަށް ކޮޅަށް އެރުންފަދަ ކޮށްފައިވާކަމަށް ވިދާޅުވެ ފަޒީލްވަނީ ސިޔާސީ ހަރަކާތްތަކަކީ މިއީތޯ ސުވާލު އުފައްދަވާފައެވެ.
"އެމްޑީޕީގެ އެއްވެސް ޖަލްސާއެއްގަ ނުދާނެ ކޮންމެވެސް އެއް ބޭފުޅެއްގެ އަބުރު ކަތިނުލާ. މިހެންވުމުގެ ސަބަބުން ސިޔާސީ ޕާޓީއެއްގެ ނަމުގަ އޮތަސް ސިޔާސީ ހަރަކާތެއްގެ ގޮތަށް އަޅުގަނޑު ނުދެކެން އެމްޑީޕީން ހިންގާފަހުރި ސިޔާސީ ހަރަކާތެއް. ޒާތީ ކްނަތައްތަކެއް ގިނަ ފަހަރަށް ކޮށްފަ ހުންނާނީ." މެމްބަރު ފަޒީލް ވިދާޅުވިއެވެ.
ފަޒީލް ވަނީ ގާނޫނުތަކަށް މި ގެނެވޭ އިސްލާހުތަކުގެ ސަބަބުން ރައްޔިތުންގެ ބައިވެރިވުން ސިޔާސީ ހަރަކާތްތަކުގައި އިތުރުވެގެން ދާނެ ކަމަށެވެ.
މިހާރު ޕާޓީތަކުގެ ގިނަ ހަރަކާތްތައް ހިނގަނީ ވެރިކަން ކުރާ މާލޭގައި ކަމަށާއި އެއާ ޚިލާފަށް މި ގެނެވޭ އިސްލާހާއި އެކު ރައްރަށުގައި ސިޔާސީ ހަރަކާތްތައް ހިންގުން އިތުރަށް ފުޅާވެގެން ދާނެކަމަށް އޭނާ ވަނީ ވިދާޅުވެފައެވެ.