"ފުރިހަމަ ސިއްޙަތަކަށް މުޅި ގައުމު އެކުގައި" ގެ ނަމުގައި ޚާއްސަ އެކްސްޕޯއެއް ފަށައި ސިއްޙީ ކަންތައްތަކާ ބެހޭ ފޮތެއް މިރޭ ނެފިއެވެ.
ހުޅުމާލޭ ސެންޓްރަލް ޕާކުގައި މިކަމަށް ހާއްސަކޮށްގެން މިރޭ ބޭއްވި ރަސްމިއްޔާތު ޝަރަފުވެރިކޮށްދެއްވައި، އެކްސްޕޯ ފައްޓަވައިދެއްވައި، މި ފޮތް ނެރެދެއްވީ ރައީސުލްޖުމްހޫރިއްޔާގެ ނައިބު ހުސައިން މުޙައްމަދު ލަތީފެވެ.
ސިއްހީގޮތުން ދުޅަހެޔޮ އާދަތަކަށް އަމާޒުކޮށްގެން "ފުރިހަމަ ސިއްޚަތަކަށް މުޅި ގައުމު އެކުގައި" ގެ ނަމުގައި ބާއްވާ ހެލްތް އެކްސްޕޯ 2024ގެ މަގްސަދަކީ ދުޅަހެޔޮ މުޖްތަމައެއް ބިނާކުރުމަށް ކުރެވޭ މަސައްކަތްތައް ދެއްކުމާއި ސިއްޚީ ގޮތުން ދުޅަހެޔޮ އާދަތަކަށް ހޭލުންތެރިކޮށް މައުލޫމާތު ފޯރުކޮށްދިނުމެވެ.
ދެ ދުވަހުގެ މުއްދަތަށް ކުރިއަށްގެންދާ މި އެކްސްޕޯގައި ސިއްޚީ ވުޒާރާގެ އިތުރުން ހޮސްޕިޓަލްތަކާއި ސިއްޚީ ޚިދުމަތްދޭ އެހެނިހެން ތަންތަނުގެ އިތުރުން މަދަނީ ޖަމާތްތަކާއި އަމިއްލަ ފަރާތްތައް ހިމެނޭހެން 50 އަށްވުރެ ގިނަ ސްޓޯލް ހިމެނެއެވެ.
ތަފާތު އުމުރުފުރާތަކުގެ އިތުރުން ބިދޭސީންނަށް ހާއްސަކޮށްގެން ކުރިއަށްގެންދެވޭ މި އެކްސްޕޯގައި ކުޑަކުދީންނަށް ވެސް ބައިވެރިވެވޭނެ ގޮތް ވަނީ ހަމަޖެހިފައެވެ.
އެގޮތުން ކުޑަކުދީންގެ ހެލްތް ޗެކަޕާއި ހެދިބޮޑުވުމަށް ބޭނުންވާ ކާނާގެ އިތުރުން ވެކްސިނޭޝަނާއި އަދި މި ނޫންވެ ސް އެހެނިހެން މައުލޫމާތު ފޯރުކޮށްދޭނެއެވެ.
މި ރަސްމިއްޔާތުގައި ވާހަކަދައްކަމުން ސިއްޚަތާއި ބެހޭ ވަޒީރު އަބްދުﷲ ނާޒިމް އިބްރާހީމް ވަނީ އެކްސްޕޯގައި ހިމެނޭ ފަރާތްތަކަށް ޝުކުރު އަދާކުރައްވާފައެވެ. އަދި ވަކިން ޚާއްސަ ގޮތެއްގައި ދިރާގުން ވެދިން އެހީތެރިކަން ވަޒީރު ނާޒިމް ފާހަގަކުރެއްވިއެވެ.