ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރަށް ތޫނު އެއްޗަކުން ހަމަލާދިން މައްސަލައިގެ ދައުވާ އުފުލި ތިން މީހަކު ކޯޓުން މިނިވަންކޮށްފިއެވެ.
ޒަރީރަށް ހަމަލާދިނީ އޭނާ މެންބަރުކަމުގައި ހުންނަވަނިކޮށް، މިދިޔަ އަހަރުގެ މެއިމަހުގެ އެއްވަނަ ދުވަހުގެ ފަތިހު 04:15 އެހާކަންހާއިރު ބުރުޒުމަގުގައި ހުންނަ ހަބީބީ ކެފޭ ތެރެއިންނެވެ.
އެ ގޮތުން ޒަރީރުގެ ގައިގައި އަތުންނާއި ފައިން ތެޅުމަށްފަހު، އޭނާގެ ބޮލުގައި މަރުތޭލަކުން ޖަހައި ހަމަލާދީފައިވެއެވެ. މި މައްސަލައިގައި ޒަރީރު ވިދާޅުވާ ގޮތުގައި އޭނާއަށް ހަމަލާދިނީ ފަސް މީހުންގެ ގްރޫޕަކުންނެވެ.
މި މައްސަލައިގައި ދައުލަތުން ދައުވާކުރީ ތ. ކިނބިދޫ، ދީފްރަމްގޭ މުހައްމަދު އަވްޝަމާއި މާލޭ ތާޖްގޭ މުލާއިމް މުހައްމަދުގެ އިތުރުން، މާލޭ ނައިޓްވިލާ، އިބްރާހީމް އަބްދުﷲގެ މައްޗަށެވެ.
މީގެ ތެރެއިން އަވްޝަމާއި މުލާއިމްގެ މައްޗަށް އުފުލާފައިވަނީ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ދައުވާއެވެ. އަބްދުﷲގެ މައްޗަށް އުފުލީ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
ދައުލަތުން ކުރި މާރާމާރީގެ ދައުވާ އެކަށީގެންވާ މިންވަރަށް ސާބިތުކޮށްދެވިފައިނުވާ ކަމަށް ކަނޑައަޅައި، ކްރިމިނަލް ކޯޓުން ވަނީ މި ތިން މީހުން ވެސް މިއަދު މިނިވަންކޮށްފައެވެ.
ކްރިމިނަލް ކޯޓު -- ސަން ފޮޓޯ/ ފަޔާޒު މޫސާ
ހަބީބީ ކެފޭއަކީ އަނދިރިކޮށް ލަވަޖަހާފައި ހުންނަ ތަނެއް ކަމުން، އެ ތަނަށް ވަދެ ޒަރީރަށް ހަމަލާދިން މީހުންނަކީ ސީދާ ކޮން ބައެއްކަން ދައުލަތުން ހުށަހެޅި ހެކިވެރިންނަށް ވެސް ސާބިތުކޮށްދެވިފައެއް ނުވެއެވެ.
މި މައްސަލައިގައި ކްރިމިނަލް ކޯޓުން ވަނީ އަވްޝަމާއި މުލާއިމްގެ މައްޗަށް ކުރި ދައުވާ އެކަށީގެންވާ މިންވަރަށް ސާބިތުނުވާ ކަމަށް ކަނޑައަޅައި، ހުކުމްކޮށްފައެވެ.
މި މައްސަލައިގައި ހިމެނޭ އަބްދުﷲ، އެ މާރާމާރީގައި ނުހިމެނޭ ކަމަށް ޒަރީރުގެ ހެކިބަހުގައި ވެސް ބުނެފައިވެއެވެ. އަދި މި މައްސަލައިގައި ދައުލަތުގެ ފަރާތުން ހުށަހެޅި ރިޕޯޓުތަކުން ވެސް އެކަށީގެންވާ މިންވަރަށް އަބްދުﷲގެ މައްޗަށް ދައުވާ ސާބިތުކޮށްދެވިފައިނުވާތީ، ކޯޓުން ހުކުމްކުރީ އެ ގޮތަށެވެ.
ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ އަދަބަކީ 10 އަހަރާ 15 އަހަރާ ދެމެދުގެ މުއްދަތަކަށް ޖަލަށްލުމެވެ.
އަދި އެ ފަދަ ކުށެއް ކުރަން އުޅުން ނުވަތަ އެ ފަދަ ކުށެއް ކުރުމަށް އެހީތެރިވެދީ، އެ ކަމުގައި އެއްވެސް މިންވަރަކަށް ބައިވެރިވުމުގެ ކުށުގެ އަދަބަކީ ހަތް އަހަރާ 10 އަހަރާ ދެމެދުގެ މުއްދަތަކަށް ޖަލަށްލުމެވެ.