މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ)އިން ކޮންމެ އަހަރަކު ނެރޭ 'މޯލްޑިވްސް ފައިންޑާ'ގެ މިއަހަރުގެ އަދަދު މިއަދު ރަސްމީކޮށް ނެރެފިއެވެ.
މި މަޖައްލާ ނެރެދެއްވީ ލަންޑަންގައި މިހާރު ކުރިއަށްދާ ވޯލްޑް ޓްރެވަލް މާކެޓު ފެއާގައި ޓޫރިޒަމް މިނިސްޓަރު އިބްރާހިމް ފައިސަލެވެ.
މި މަޖައްލާ ނެރެފައިވަނީ އެމްއެމްޕީއާރުސީއާއި ޓޫރިޒަމް މިނިސްޓްރީ ގުޅިގެންނެވެ.
މި މަޖައްލާގައި ރާއްޖޭގެ އެކި ކަންކަން ހިމަނާފައިވާއިރު، ރާއްޖޭގެ ކެއިންބުއިމާއި، ސަގާފަތުގެ އިތުރުން ރީތި އެކި މަންޒަރުތަކުގެ މައުލޫމާތު ހިމަނާފައިވެއެވެ.
މީގެ އިތުރުން، މި އަހަރުގެ އަދަދުގައި ފަތުރުވެރިކަމުގެ ދާއިރާގައި ފާހަގަކޮށްލެވޭ ޝަޚްސިއްޔަތުތަކާއި، ހުނަރުވެރިންނާއި އެކި ވިޔަފާރީތަކުގެ ލިޔުންތަކުގެ އިތުރުން ދަތުރުވެރިންނަށް ބޭނުންވާ މުހިންމު މައުލޫމާތު ހިމަނާފައިވެއެވެ.
މި މަޖައްލާ އިފުތިތާހުކުރުމުގެ ރަސްމިއްޔާތުގައި ވާހަކަދައްކަވަމުން މަޓާޓޯގެ ސީއީއޯ އާމިނަތު ސޫޒަން ވިދާޅުވީ މަޖައްލާ ނެރުމުގެ މައިގަނޑު މަގުސަދަކީ ދިވެހިރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއެރުވުމާއި، ބައިނަލްއަގްވާމީ ފެންވަރުގައި ރާއްޖޭގެ ފަތުރުވެރިކަން އިޝްތިހާރުކޮށް، އިތުރު ފަތުރުވެރިން ރާއްޖެއަށް ޒިޔާރަތްކުރުމަށް ހިތްވަރު ދިނުން ކަމަށެވެ.