މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ އެހީތެރިކަމާއެކު ރަށްރަށުގައި މުދައްރިސުން ތަމްރީނު ކުރުން ފުޅާކުރަން މަސައްކަތް ކުރާ ކަމަށް އެޑިއުކެޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެއެވެ.
މުދައްރިސުން ތަމުރީނުކުރުމުގެ ގައުމީ ޕްރޮގްރާމް ފެށުމަށް މިއަދު ހެނދުނު ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ޝަފީއު ވިދާޅުވީ، ތައުލީމީ ދާއިރާއަށް މިވަގުތު އޮތް އެންމެ ބޮޑު ގޮންޖެހުމަކީ ޓީޗަރުންގެ ދަތިކަން ކަމަށެވެ. އެގޮތުން މުދައްރިސުން ތަމުރީނުކުރުމުގެ ގައުމީ ޕްރޮގްރާމްގައި ޓީޗަރުންގެ ދަތިކަން ހުރި ދާއިރާތަކަށް އިސްކަންދޭނެ ކަމަށް މިނިސްޓަރު ވިދާޅުވިއެވެ.
ޝަފީއު ވިދާޅުވީ ރަށުގައި ހުރެގެން މަތީ ތައުލީމްގެ ފުރުސަތު ފަހިވެގެންދިޔުމަކީ ރައްޔިތުންގެ ވަރަށް ބޮޑު އެދުމެއް ކަމަށެވެ.
އަޅުގަނޑުމެން ގައުމީ ޔުނިވަސިޓީއާ، އިސްލާމިކް ޔުނިވަސިޓީއާ، އަދި އަޅުގަނޑުމެންނާ އެކު މަސައްކަތްކުރުމަށް އެއްބަސްވެފައިވާ ވިލާ ކޮލެޖާ އެކުގައި އެމްކިއުއޭގެ އެހީތެރިކަމާއެކުގައި މި މަސައްކަތްކުރަނީ މި ޕްރޮގްރާމްގައި ވީހާވެސް ގިނަ މާއްދާތަކެއް ދަރިވަރުން ރަށުގައި ތިބެގެން ކިޔެވޭނެ މަގުފަހިކުރުން، އެޑިއުކެޝަން މިނިސްޓަރު ޑރ. އިސްމާއިލް ޝަފީއު
ޝަފީއު ވިދާޅުވީ މާލެއަށް ހިޖުރަކޮށް، މާލޭގަ ދިރިއުޅުމުގެ ޚަރަދުތައްކުރުމަކީ އެއީ ކޮންމެ ކޮންމެ އާއިލާއަކަށް ފަސޭހަކަމަކަށް ނުވާނެ ކަމަށެވެ. ރައީސް ޑރ. މުޙައްމަދު މުއިއްޒުގެ ސިޔާސަތުގައި ވާގޮތުގެ މަތިން ދަރިވަރުންނަށް އެ ފުރުސަތު ފަހިކުރަމުން ދަނީ އެ ކުދިން ރަށުގައި ތިބެގެން ކިޔެވޭނެ ގޮތެއް މި ޕްރޮގްރާމްގެ ތެރެއިން ފަހިކޮށްދިނުމަށް ކަމަށް ވިދާޅުވިއެވެ.
މިނިސްޓަރު ވިދާޅުވި ގޮތުގައި ވަރަށް ގިނަ މާއްދާތަކުން ޓީޗަރުން ލިބުން ދައްޗެވެ. އެގޮތުން ދެހާހެއްހާ ޓީޗަރުން ތައުލީމީ ދާއިރާއަށް ބޭނުންވާ ކަމަށާއި ހަމައެކަނި ޕްރައިމަރީ ގްރޭޑްތަކަށް ވެސް 250 ޓީޗަރުން ބޭނުންވާ ކަމަށް ވިދާޅުވިއެވެ.
ރައީސް މުއއިްޒާއި އެޑިއުކެޝަން މިނިސްޓަރު ޑރ. އިސްމާއިލް ޝަފީއު -- ފޮޓޯ/ ރައީސް އޮފީސް
މިއަދު ފެށި ޕްރޮގްރާމްގައި ގާތްގަނޑަކަށް 140 ކުދިން ބައިވެރިވިކަން ފާހަގަކުރައްވައި މިނިސްޓަރު ވިދާޅުވީ އުންމީދަކީ އަންނަ އަހަރު 150އަށްވުރެ ގިނަ ކުދިން އެ ޕްރޮގްރާމްގައި ބައިވެރިވުންކަމަށެވެ.
މިނިސްޓަރު ވިދާޅުވީ މިވަގުތު ޓީޗަރުންގެ ދަތިކަން އެންމެ ބޮޑީ ހިސާބު، އިނގިރޭސި އަދި ސައިންސްގެ މާއްދާތަކަށް ކަމަށެވެ. އޭގެތެރޭގައި ފިޒިކްސް، ބައޮލޮޖީ އަދި ކެމިސްޓްރީ ހިމެނެއެވެ.
ބިޒްނެސް ސްޓްރީމްގެ މާއްދާތަކަށް ވުރެ ސައިންސް ސްޓްރީމްގެ މާއްދާތަކަށް ޓީޗަރުން ބެނުންވާ މިންވަރު ބޮޑުވެފައި މިވަނީ. ހިސާބު މާއްދާގައި ހުރިހާ ކުދިން ބައިވެރިވާނެ. އެއީ މަޖުބޫރު މާއްދާއެއް ވީމަ. އަދިވެސް އަތޮޅުތެރޭގައި ސައިންސް ސްޓްރީމްގެ މާއްދާތައް ކިޔަވައިދިނުން، ބިޒްނެސް ސްޓްރީމްގެ މާއްދާތަކާ އެއްވަރަށް ފަހިވެފައެއް ނެތް، އެޑިއުކެޝަން މިނިސްޓަރު ޑރ. އިސްމާއިލް ޝަފީއު
މިނިސްޓަރު ވިދާޅުވީ ސައިންސްއިން ފާސްވާ ދަރިވަރުންގެ އެވްރެޖަށް ބަލައިލާއިރު ގާތްގަނޑަކަށް 40 އިންސައްތައާ ހަމައަށް އަރާކަމަށެވެ. އެގޮތުން އަތޮޅުތެރޭގެ ވަރަށް ގިނަ ރަށްތަކުގައި ސައިންސް ކިޔަވައިދޭން ދަތިކަން ފާހަގަކުރެއްވައި މިނިސްޓަރު ވިދާޅުވީ 6،000 ދަރިވަރުން އޯލެވެލް ހަދާނަމަ ސައިންސްގެ މާއްދާތައް ހަދަނީ ގާތްގަނޑަކަށް 2،000 އަދި 2،500 އާ ދޭތެރޭގެ އަދަދަކަށް ކަމަށެވެ.
މިނިސްޓަރު ވިދާޅުވީ ގައުމެއް ކުރިއަރާދިޔުމުގެ އެންމެ މުހިންމު ނިޒާމަކީ ތައުލީމުގެ ނިޒާމު ކަމަށެވެ. ތައުލީމީ ނިޒާމު ކުރިއަރުވަން ރައީސްގެ ލަފާފުޅާއެކު މަސައްކަތްކުރައްވާނެ ކަމަށް މިނިސްޓަރު ވިދާޅުވިއެވެ.
ރަށުގައި ތިބެގެން މަތީ ތައުލީމު ހާސިލުކުރުމުގެ ފުރުސަތު ފަހިކޮށްދެއްވުމަށް މަސައްކަތް ކުރައްވާނެކަމުގެ ޔަގީންކަން ރައީސް ވަނީ މީގެ ކުރިން ވެސް ދެއްވާފައެވެ.